路線：鯉魚門三家村>鯉魚門燈塔>天后廟>廢礦場>砵甸乍炮台(山腳)>徫奕信徑3段>歌賦炮台(山腰)>魔鬼山>徫奕信徑3段>五桂山>芧湖山(堡壘)>徫奕信徑3段(殘破公仔廟)>馬游塘>小夏威夷徑>將軍澳村>寶琳
全長：15.21 km
時間：5小時23分
油塘係我最喜歡嘅行山地點之一，行過 N 次。呢條路線唔長又多野睇，而且交通方便，就好似係喺市區入面行山一樣。如果唔慣(或者擔心)一個人去行山嘅朋友可以考慮以呢條路線試試。因為接近市區電話接收完全冇問題，而且路唔算難行，如果揀行山季節去應該不愁冇人問路。有乜唔對路又有唔少地方可以中途走人，真係好正。感受下一個人行山影相自由自在嘅樂趣。 當然，行山之前做準備同了解路線應係常識吧。
(update @ 20150918 – 補加路線地形/景點概略圖，可按圖放大)
GPX 路線記錄可隨便 download
Total climbing: 793 m
Total time: 05:22:41
起點係鯉魚門三家村口，由油塘站行過嚟大約要 10 分鐘左右
依，呢到有表演睇喎，不過今日係嚟行山
繼續沿路直行
由呢到行入去街市
三家村呢到係出名食海鮮嘅地方，有好多海鮮酒家，亦有海鮮檔賣各種各樣嘅海產
除左食海鮮，呢到仲有賣特色野食手信嘅鋪頭，有一間係做新鮮出爐雞仔餅。不過我都係鍾意食呢間啲肓公餅多啲
依．．．同類？！
一場嚟到，梗係要幫襯紹ｘ園買啲 nuts 吔下啦。重點係價錢平過喺商場鋪一大節
繼續沿鯉魚門海傍道行，會經過呢間賽馬會創意館
查實唔知點解會喺呢到開間咁野，入面亦都冇乜野睇
繼續沿路行，冇耐就會見到燈塔
燈塔前面呢個石灘景觀唔錯，可以望到港島東大部分地區。如果天氣好就連西九嘅 ICC 都可以見到，雖然呢到唔係最理想嘅影日落地點，不過勝在有大把前影，都可以影到日落紅霞靚相。最正係可以近距離接觸大海
鯉魚門燈塔
由燈塔望向海邊嘅三家村
沿石灘行，另一邊有路可以穿過球場入行人路，路邊仲有棵心願樹。如果覺得冇野睇亦可以沿海邊直行穿過前面屋底直去
今日揀左行海邊，當然係要予啱水退時先可以行
呢間屋應該已經冇人住，日久失修屋底甩皮甩骨
穿過屋底之後再行前少少就要由石灘轉上返來行人路先至可以繼續行
去到呢到要認住了，左邊個路口係上山嘅路，家陣先直行去前面天后廟，睇完野再返來由呢到上山
天后係保佑漁民，所以海邊總係會有天后廟。呢到仲有兩支大炮，可能又有故講
今日香火比較少，但過時過節掛到滿晒香嘅時候，係可以影到陽光由隙縫打斜射入嚟嗰啲”行貨”相
廟後面有相仕可以指點迷津
廟嘅另一邊有好多大石，有啲有題字，有啲就形狀特別
總係覺得呢舊石好似係想一拳打埋嚟咁
過左天后廟繼續行嚟到呢個位要轉左，如果直行入錯左人地屋企就自然會有狗走出來”招呼”你。而過左呢到就進入左第二條村，叫做媽山村(睇地圖先知)
行前少少轉左再轉右
即係呢到轉右，之後直行
行多一陣就可以出返來海邊，繼續沿路直行
海邊呢到有個小石灘，又係一個好好嘅影相位置
呢間屋好似係新起嘅
望完海又繼續，第一次嚟可能未必知原來係要由屋旁邊條窄巷穿過去，就咁睇真係唔知原來係有路行嘅
終於行到入到嚟呢個人像攝影勝地，已經見到有人影梗相
聽講話呢到以前係一個礦場， 照咁估計右邊個斜台應該係用嚟運礦石上船。家陣呢個台已經變成”釣魚台”了 XD
礦場另一邊可以望到東面海域
出一張 2006 年影嘅舊相，當年呢個位係有個鬼咁大嘅漏斗喺到，後來因為安全問題拆左。呢個用石屎鋼筋做嘅大漏斗以乎同四周圍建築都唔多夾，唔知會唔會係礦場荒廢之後轉型為其他工廠時起嘅呢？段估礦場唔會需要咁形裝嘅野掛
臨走前掃張礦場全景先
睇完礦場之後就原路行返轉頭喺呢個路口上山。如果唔想行山當然亦可以出三家村走人
註：如果從來都未嚟過，頭段鯉魚門三家村加埋礦場應該有大量攝影題材夠影半日。時間唔夠嘅話可考慮上魔鬼山影日落，然後沿馬路旁嘅行人路落高超道走人
續 part2
1 Pingback