行個短山去海灘 part-1

路線：鰂魚涌>柏架山道>大風坳>柏架山>大風坳>大潭上水塘>大潭西引水道>淺水灣坳>南灣道>淺水灣道>淺水灣海灘(天后花園)>麗海堤岸路>深水灣>苗鍾徑>香島道>黃竹坑道>海洋公園
全長：19 km
時間：4小時23分

今日行呢條路線算係好易行，如果只為輕輕鬆鬆試下行山去海灘，可以 skip 咗上柏架山雷逹站嘅一段路，同時縮短終點為淺水灣。咁樣路程會縮短到大約10公里(估計)，全程亦只有頭段上大風坳要上斜，之後全程唔係落斜就係平路。較啱時間出發可以睇下黃昏金光照海灘兼影下相，喺餐廳吔完野再行下海灘散步。行山影相食野兼散步，真係仲勁過出奇蛋。如果係跑步L，由柏架山山頂落到水塘可以一直跑步，再接去大潭西引水道繼續跑，然後落去淺水灣坳接孖崗山引水道繼續跑去赤柱峽，應該都可以幾滿足。

路線概覽(按圖放大)

Total distance: 19238 m
Total climbing: 1072 m
Total time: 04:22:35

Download file: qbay_gpx _2015-10-24_1357.gpx

由鰂魚涌地鐵站A出口開始，沿英皇道向大古方向行

去到鰂魚涌街對開個街口會見到呢個指示牌，轉右沿路行

街市旁邊條斜路就係柏架山道，行多陣就到起點。出發～

沿柏架山道上山，會途經好幾條唔同山徑入口，只要keep住唔離開車路繼續向上行就會去到大風坳。呢到係個交滙處，可以連接港島徑去陽明山莊，又可以上山頂雷逹站或者係落去大潭水塘。如果想慳力唔上波波可以直接沿柏加山路落去水塘。而我就梗係會轉左繼續上山啦

又再出發～

鏡頭一轉已經上到山頂，呢個岔路係分別係去大雷逹波同細雷逹波嘅

N年冇沖涼嘅大雷逹波

旁邊有路可以繞波一週，雜草係多啲啲，其實條路好安全可以放心行入去

順光影個波波靚得多了

行完大波向細波進發

上細波嘅路旁邊有樓梯口，轉上去又可以繞場一週。不過呢邊打圏冇乜野睇嘅

遇啱天氣好，細波波呢到風景一流

影完相由原路落山

話咁快又返到落嚟大風坳

由呢到落去

經過一段又長又斜又冇嘢睇嘅路之後就到咗大潭上水塘，行前少少橫過水霸

水霸另一邊對住一座小山，喺到到轉左同轉右都一樣，因為條路係會圍住呢座小山轉一圏

如果諗住去大潭篤水塘，轉左條路會短一啲。我今日雖然唔係去大潭篤，但係一樣轉左

行多兩步就見到另一條水霸，正確嘅路線係應該繼續直行，唔好過水霸。不過我起初睇地圖以為有兩條路可以揀，於是就轉右過水霸(後來發現衰咗要返來呢到先至可以繼續行)

唔知幾時開始水塘多咗好多錦鯉，睇落去好靚，仲有人尊心帶埋麵包嚟餵魚。不過本來水塘養啲魚係為咗維持水質(平衡生態)，魚嘅品種係經過考慮先放落去。呢啲唔知邊到爆出嚟嘅錦鯉(放生?)可能會影響原來嘅生態平衡，最怕係可能有遊客為咗餵魚睇錦鯉唔知會帶啲乜野嚟掉落去。不過諗深一層，講污染呢到啲水應該遠遠唔及東江水啦，應該要對水務處過濾系統有信心，一定冇問題。