今日想去行吓元荃古道但又想走嘅時候方便自己座車，打算沿古道行到去田夫仔就接入麥徑，跟住逆走返上去大帽山再落大埔。一次過重溫呢段好耐冇行過嘅古道同試行一段未去過嘅麥9。結果因為多人同懶(再加埋太悶冇嘢睇)，未去到田夫仔就提早掉頭入麥徑上大帽。今次再行古道雖然感覺好似完全未嚟過一樣，可惜仍然係覺得冇乜吸引力，今次之後應該有排都唔會再考慮行呢段路了。
路線：荃灣港安醫院>元荃古道>大欖林道>荃錦公路>大帽山路>大帽山雷達站>鉛鑛坳>新屋家>運頭塘邨>大埔墟站
全長：24.34km
時間：5小時35分鐘
印象之中自己行過兩次元荃古道，兩次都係N年前跟埋大班朋友一齊行，今日到自己嚟行就連座車去起點個巴士站都搵唔到，行嚟行去兜咗好耐先至搵到呢個39M站。真係仲大鑊過啲行山初哥，希望上到個山上面情況會好少少。
其實去起步點嘅車程唔算太遠，要留意住喺荃灣港安醫院站落車。
落車之後行前少少就會見到入口。
雞乸咁大隻字都冇乜可能會唔識路。
嘩，呢棵樹好勁喎，又係嗰啲獨木成林嘅感覺。
上咗一段樓梯之後見到有條車路(大欖引水道) ，雖然話之前行過兩次，但真係一啲印像都冇。完全唔記得。
好在呢啲熱門山徑指示夠晒充足，就連我呢啲搵個巴士站都搵唔到嘅低b仔都識行。🤣🤣🤣🤣
繼續係咁上。
路口有個指示牌話轉右上山，咁就地圖都懶得睇照跟。
係咁上上咗好耐，越行越高。四維風景都變得開揚了。
行餐懵嚟到石龍拱見到條青馬橋，都算做叫有啲風景睇吓。停一停吹吓風休息一陣先。
小休之後就繼續行程去田夫仔。
行吓行吓見到一個指示牌，指示一個叫做上塘嘅地方。拎張地圖出嚟對下C6105，原來條路去上塘之後可以接去蓮花山再上大帽，計落都算啱路。不過似乎跟主徑行會輕鬆啲，都係繼續直去啦。
嘩～做乜咁多人。拿臨繼續行程先~
再行大約１公里又嚟到另一個路口，指示牌話去田夫仔仲要再行１公里多啲。
望吓個地圖板，反正去到田夫仔都會兜返轉頭上大帽。又好似未行呢段路，一於試吓喺呢度轉灣。偷吓懶唔去田夫仔了。
荃錦公路，即係大帽山方向。啱晒~ 仲好似冇乜人行咁，可以除吓罩吸啲新鮮空氣。
行咗一段大斜路之後上到嚟麥徑了。
仲有段大斜路要上。
行到嚟呢個路口靠右直去。
路邊有指示牌，繼續向荃錦公路方向行就啱。
又有個路口喎，轉左定轉右好？
跟住係要行左邊條路嘅。
行麥徑最好就係可指示充足，見到碌柱就唔驚得錯路。
行行吓見到有個小徑路口寫住仙霞洞，雖然個名好似吸引，但見個牌話要行一粒鐘咁就即時冇晒興趣。繼續行程好啲。
離遠望到下一個目標大帽山，襯埋個藍天白雲超正啊~ 好似仲有好遠嘅路要行咁喎😅。
依？應該係嚟到呢段嘅終點喇喎。
出到嚟到荃錦公路，見到呢個算唔算係地標呢吓？
跟住過對面巴士站。。。繼續上山。
開始行麥徑第8段。
行咗一陣就嚟到大帽山遊客中心，見到超級多人，拿拿臨走人。
行咗出嚟路口就發現好似唔多對路，記得好似係有山徑行，但出嚟見唔到個入口。諗吓諗吓醒起個入口好似鬼鬼祟祟喺小食亭旁邊，頭先見到多人雞咁腳走就錯過咗個入口了。都怪自己少行呢段唔記得啲路，既然行咗出嚟馬路就唯有繼續沿馬路行上去波波啦。
好L辛苦咁行咗一段斜路上到嚟閂口，仲有大段路要上啊。
行吓行吓開始大霧，溫度都明顯低咗。
啲草好靚喎，影影影~
本來一直都打梗霧水，好難得等到佢有一陣啲霧散開咗，仲有藍天白雲比我影相。前後都唔夠一分鐘又變返鬼咁大霧。好喇，影埋個波波就可以落山了。
鏡頭一轉就由波波行到落嚟，之後都仲要行到去鉛鑛坳大段路先至可以落大埔。
麥徑第七段唔算難行，但都有啲長度。行咗差唔多成粒鐘終於行到落嚟鉛鑛坳。
涼亭冇乜人喎，落去洗個手涼吓先。
跟住就行衛徑落碗窰，呢段路如果冇人跑吓都以爽嘅。
轉個頭又落到嚟，行完晒今日啲山路了。跟住就沿馬路慢慢行返出去大埔。
一直沿馬路行返出嚟碗窰路。
前面橋底轉左，之後直行就到運頭塘。
之後會經過運頭塘新城，如果天時熱會入去涼吓冷氣。今日冇乜需要了，喺外圍兜過去落行人隧道。
返到嚟大埔墟站，今日行程結束~
路線記錄
Total climbing: 1609 m
Total time: 05:34:49
發表迴響