今日行咗段本來打算要夾埋(昆) 朋友一齊行嘅路線，喺油塘出發行山去城門水塘。交替咁行衛徑同麥徑，全程大約有30公里，算得上係長途路線。加上中途要上埋飛鵝同獅子兩座山，係需要花費一定體力先至可以完成嘅。起初諗住只要避開咗頭段嘅衛徑唔上五桂山就應該可以輕鬆應付飛鵝獅子，結果未上獅山就已經攰到hihi。真係有啲失預算，除咗要認自己廢咗，梗係要再搵啲嘢嚟賴吓架啦。我諗到了～一定係因為戴咗個口罩攪到呼吸困難?。
路線：油塘(衛徑3段)>魔鬼山>藍田公園(地母元君廟)>馬油塘(衛徑3段)>井欄樹(衛徑4段)>百花林(孫中山母親墓地)>飛鵝山>象山>東山>飛鵝山路(衛徑4段)>沙田坳(麥徑5段) > 獅子山 > 獅子頭 > 筆架山 >九龍水塘>金山道(麥徑6段轉衛徑6段)>城門水塘
全長： 31.26km
時間：7小時55分
起步點係鯉魚門邨旁邊嘅高超道，旁邊就係油塘巴士總站，如果唔想座狗鐵係可以座巴士過嚟架喎。
跟住沿住去華人墳場嘅路上山，一直行到見到指住衛奕信徑嘅牌就過馬路。
由高超道入口上山頂由要都係斜路，沿路可以望到油塘同鯉魚門嘅風景。仲可以見到今日嘅短途同中途目標，雖然望埋去好似好鬼遠，其實行落又唔係好覺，行吓吓就到架喇。
今日山頂碉堡冇乜人喎，算係近年少見。影張相做記錄，等遲啲條橋起好就會變成歷史圖片架喇。
影完相就由碉堡嘅另一邊落去繼續行程。
落到嚟轉左再落一少段樓梯，之後就沿路直去。
跟住指示牌方向去。相比起以前，家陣衛徑啲指示好咗好多了。
之後繼續沿路行，旁邊見到有樓梯唔駛理佢，總之唔好上唔好落，一直行到見到前面呢個黃色指示就轉左落去。呢個位好易認，應該好難會出錯。
落到嚟澳景路，照指示轉右。
再沿路行多陣嚟到樓梯口就轉上去，雞乸咁大個牌一定會見到。上去之後會見到一個涼亭，可以當乜嘢都睇唔到，即時轉右落樓梯繼續行程。
涼亭落嚟之後係一個十字路口，直行係衛徑第3段，會上去五桂山同藍球板，路線以橫向距離計會短過行左邊嘅晨運徑。不過一個係上山一個係平路，我梗係㨂條平路嚟行咗先啦。
開始去藍田，呢段晨運徑其實係沿五桂山山腰過嘅繞道，大致上係平路冇乜上落，所以有好多住喺附近嘅街坊嚟行，外區嚟行山嘅就相對較少。
沿途有好多分枝路，有啲向山上面行，有啲就向下全部唔駛理佢。基本上只要沿住條主路一直行就得了。
繼續直去。
行到見到呢個告示板就轉右。
再行多嚟到呢個路口又再轉右。其實轉左落去都得嘅，不過落完轉個灣就會上返嚟，實在係有啲戇居。所以啲人喺旁邊開咗條捷徑，轉右行過去就得了。
之後就可以 cut 返落去主路。
嚟到藍田公園了。
呢到有間香火鼎盛嘅地母元君廟，好多人嚟上香。
繼續向前行少少見到厠所就轉右。
跟住沿路直行。
嚟到見到樓梯轉左。
繼續沿路行，中途會見到好多路邊神佛。當中呢 set 比較特別啲，佢哋通常都係三人行，今期唔知點解會多咗一個。可能係等錢駛都唔定。
再沿小徑行多一陣，又見到一個上山嘅樓梯口。今次呢個係衛徑出口嚟嘅，如果先前跟足衛徑路線就會由呢條樓梯行落嚟。
再行前多一少段就嚟到馬油塘村，跟住喺前面路口轉右。
沿住村路行，喺前面轉左。
然後就靠右直去，繼續沿馬路行出村口。
出到嚟村口見到寶琳路，跟住再過去對面馬路嘅翠琳路。
跟住又沿翠琳路行一陣。
嚟到轉灣位就過去對面。
之後繼續沿馬路一直行到尾，跟住轉左入村。入村之後會見到一排村屋，一直行到尾。
喺村屋後面會見到有一條鬼祟樓梯，行上去繼續。
跟住呢一少段路好鄉郊嘅感覺。
之後嚟到呢個路口，轉右可以落去小夏威夷徑，直出就係清水灣道。
嚟到清水灣道，跟住要過馬路去對面嘅井欄樹。只要轉左就會見到行人隧道入口。
落隧道過去對面馬路。
一出隧道就係今日第一個補給站，喺呢到買嘢價錢比起沙田坳合理得多。
原本諗住買枝 zero 補腳力，點知佢淨係得啲高濃糖水。咁唯有慳番，就咁買枝水算數。
家陣衛徑嘅指示真係好咗好多，記第一次嚟嘅時候由井欄樹村口直到農田後面嘅山徑入口全程係零指示牌。真係一邊搵路一邊小，家陣情況就好咗好多了。
經過九曲十三灣嘅村路終於都入到嚟山徑起點，有山行了。
進入山徑之後就唔再需要搵路，一直沿路行到前面呢個路口，見到百花林個牌就跟住轉左行上去。
一開波就係斜路。
好Ｌ辛苦咁上完一段斜嚟到馬路邊，跟住指示牌向住白花林繼續行。
喺正路口棵樹上面有人喺到爬樹，佢地有晒裝備好似係訓練梗咁樣。都係唔好八掛，繼續上路好啲。
一路沿斜路行上去，其實呢條路如果一直行到尾係可駁去飛䳘山道嘅，不過咁行會兜遠咗好多。所以最好都係經百花林上去飛䳘山道。
行到見到白花林個牌就轉入去。
唔係失物認領，係咁啱有位山友喺到打梗咭，放咗啲嘢喺地下。
上多幾級樓梯就嚟到南陔徑入口，唔知係咪多咗人行嘅關係，陽氣多咗。家陣感覺好似冇以前咁陰森。墓園入面主路徑好明顯，只要跟住行就可以。行到見孫大夫人墓嘅指示牌時再沿住條樓梯上到盡就係飛鵝山道。
離開百花林上到嚟飛鵝山道，人氣更加旺了。
影吓個入口，如果從來都未嚟過嘅人見到百花林個石碑，會唔會估到下面其實係一個墓園嚟呢？
沿飛鵝山道向上行多陣，嚟到見到左邊嘅山徑入口(電燈柱附近) 就轉上去。呢到有一個寫住 328 嘅石板。記得第一次行嘅時候 328 係一塊石碑，之後試過消失，後來又再出現。再後來又以唔同形狀出現(可能係被消失後再出現，無限 loop) 。可以肯定嘅係呢段已經變成熱門山徑，啲人唔再需要靠認住個 328 嚟行。
臨近山頂時遇到一班小朋友落山，原來呢段變咗熱門山徑不特止，可能係家樂徑都唔定?。其實只要係由 328 原路上落，去到發射站行個圈就走又真係冇乜危險性嘅。同一座山，同樣係行山，都要睇上去嘅人自已會做啲乜，唔一定上去個山到就危險嘅。
終於上到嚟發射站，呢到啲人分分鐘仲多過 sogo 門口。
諗住過去另一邊避吓，點知一樣係人山人海，都係費鬼事落去同人迫了。
四維都係人群，最好就係走人。仲有獅山要行，影埋枝標閃人。
由發射站出去飛鵝山道係大致上一條直路，頭段會經過草叢，之後係上上落落嘅山路，最尾落象山嘅一段仲好鬼斜。正一係上山就攰到hihi，落山又驚住褔街。
終於都嚟到涼亭，跟住沿飛鵝山道落山去沙田坳全程石屎路。有大把時間可以回氣。
我覺得呢位山友好形，所以忍唔住偷影咗佢。除咗呢位形仔之外，背景仲望到下一個目標獅子山。
今日撞到有人喺到放✈，行埋去八掛咗一陣，見到有位飛機友起飛冇耐就向下炒咗山Orz。呢啲情況做塘邊鶴嘅梗係拿臨閃人啦?
跟住呢段路咁易行，最好係趁機會開餐。今日試吓新嘢~~奶茶飽。鐘意飲奶茶嘅一定會覺得好食。
係咁落係咁落，落到嚟扎山道交界。跟住係直行繼落。
望返轉頭已經離開飛䳘山好遠了。
行餐飽終於都落到嚟沙田坳，上獅子山之前嘅補給站。可惜佢淨係得糖水保腳力，唯有慳番。
繼續沿沙田坳道行落少少就嚟到山徑入口，向獅子山進發～
行吓行吓嚟到一個人群聚集嘅地方，係上獅子山嘅樓梯口。一場嚟到點都要上去打個轉。
好L辛苦咁行咗上嚟獅尾，四維都勁多人。帶住個口罩行上嚟有少少缺氧嘅感覺?。
獅尾嘅風景都唔錯，除咗望到九龍半島之外，成個香港島都見到晒。
好耐冇行過呢段路，印像之中行行吓係可以見到畢架山個雷逹波波嘅。之前粒死人山竹牛肉吹爛晒啲嘢，估唔到隔咗咁耐都未整番好。
掘一張舊相嚟比對吓，係2014年嗰時影嘅波波。
行到嚟龍欣道，有地圖睇吓。
橫過龍欣道，喺前面條樓梯行上去畢架山雷逹站。
畢架山雷達波波，仲有一枝起喺高台上面嘅三角測量柱。
其實自己都唔係第一次行呢段麥徑，但係今日唔知發咗乜嘢癲完全唔認得路。喺龍欣道口行錯咗，嚟到雷逹站又再行錯多一次。見到條樓梯好似完全未行過咁。。。
落完條樓梯又再嚟到龍欣道。跟住都係繼續落樓梯。
望吓地圖，仲要再行多一段先至到九龍水塘。
再行多陣嚟到一個大涼亭。
過咗涼亭照麥徑指示轉右落去。睇地圖其實行左右兩邊都可以嘅，第時有機會會試吓行另一邊。
九龍水塘在望了，不過唔知點解好似行極都未到咁。
終於到了，行出去跟住轉右，沿路落斜出大埔道。
靠右邊條路行出去。
前面條馬路就係大埔道，可以考慮吓座巴士走人架喎。
過對面馬路就係九龍水塘入口。
佢好合作座咗喺到比我影埋佢，招牌再加個生招牌。
其實每次嚟九龍水塘都係因為中途經過，未試過停低睇嘢。第時考慮吓搵一次尊程嚟四維行吓睇吓有乜嘢睇都好。
過水壩之後一直沿金山道向上行，即係地圖上紅色波波嘅麥徑6，隔離星星線係衛徑6嚟嘅。留意呢到張地圖唔知點解個北面係向下嘅，即係成張圖掉轉咗嚟睇，唔好比佢陰到啊。影呢張地圖嘅時候其實已經係好Ｌ辛苦咁由九龍水塘下面行咗上嚟。跟住落嚟就開始落斜了。
沿金山道落斜，行一陣就會見到右邊有一個連接衛徑6嘅樓梯口，今日要試吓經佢去城門。其實好耐之前試過再行落啲沿麥徑去城門，不過嗰邊一定超多人(又辛苦啲)，都係不了。
行餐飽嚟到呢個路口，繼續上埋條樓梯就係城門水塘了。至於左邊嗰條完全冇指示嘅樓梯係可以落去下城門水塘嘅，可以落去影城門隧道孖橋橋底。不過家陣冇乜貨淨，都係唔行落去了。
終於都嚟到城門水塘了，影吓呢到嘅地標先。
喺主壩可以望到老遠嘅獅子山，行餐慒先至由嗰邊行到過嚟。本來有諗過應該夠時間行埋去大埔，不過今日都已經好攰想懶吓，都係出去小巴站座車走人算了。希望等疫情過咗之後唔需要帶住個口罩先至再試吓挑戰。
沿城門道行出去菠蘿壩，途經過燒烤場入面有汽水機。可惜冇我想飲嘅嘢，距離小巴站唔係好遠，都係出到市區再買嘢飲化算。
終於出到嚟小巴站，今日就行住咁多先。下次要試吓早啲出發睇吓可唔可以行埋去大埔先得，家陣不如先關心下條龍咁長到底要排幾耐至上到車呢?？
雖然係排隊排到上晒樓梯，不過啲小巴密密咁嚟，唔駛好耐就上到車了?。
路線記錄
Total climbing: 2352 m
Total time: 07:54:57
發表迴響