今日諗唔到有乜嘢地方想去，就短短哋喺港島行山順便逛吓玩具鋪。由灣仔出發行上山頂，之後落山去中環行吓間新開嘅?。行程理應好正，可惜衰在自己冇先做功課，成日意為間donki已經開咗，計埋今次係已經係第二次摸門釘，真係7到冇朋友?。
路線：灣仔>太原街>灣仔峽徑>荷蘭徑>馬己仙峽配水庫>馬己仙峽道>梅道>漆咸徑>白加道>山頂廣場>夏力道>西高山>夏力道>同樂徑>山頂公園>舊山頂道>香雪道>干德道>中環至半山登山電梯(旁邊落)>中環
全長：16km
時間：4小時11分
起點係灣仔狗鐵站A3出口，一出嚟行過對面馬路(斜對面)就係太原街街口。如果唔想座狗鐵都仲有大把其他交通工具可以過嚟灣仔，唔需要多作介紹。
以前會叫太原街做玩具街，其實呢度除咗玩具都仲有好多其他嘢嘅。
睇吓睇吓結果破財，買咗一套叮噹扭蛋?。
繼續沿太原街行到尾出去皇后大道東，順便睇吓其他特色街邊檔。
最後出到嚟大道東嘅舊灣仔郵局。嚟到景點梗係要同佢影張相先啦，係法定古蹟嚟㗎。
之後就沿郵局旁邊嘅窄巷行上去，睇吓個路牌發現原來自己已經進入咗灣仔峽道。
繼續沿斜路行上去。
行到盡頭上到嚟堅道。
上到嚟就見到對面馬路嘅灣仔峽道樓梯口，不過呢到封晒欄冇得過馬路，所以下次再行都係由石水渠街嗰邊上嚟會好啲。
正式開始上山了。
上山途中喺路邊見到一條超大(同超肥) 嘅藍尾石龍子?，之前每次見呢個品種都係好細條，咁大條都係第一次見到。
再上一段斜路之後就見到放梗水嘅寶雲道。
寶雲道如常地係好多人，回一回氣跟住就繼續沿斜路上去。
望吓喺路口嘅地圖指示牌，跟住落嚟要沿灣仔峽道上，行多一段就轉入去荷蘭徑去馬己仙峽道。
上呀～上～
沿路上冇任何分岔路，一直行到見到右手邊個路口，轉入去就係荷蘭徑了。
成條荷蘭徑最特別嘅地方就係入口呢個風車模型，行咗入去之後基本上係冇乜嘢睇嘅。
其實上山頂唔需要兜遠路過馬己仙峽，加上冇嘢睇同尾段嘅小徑唔係石屎靚路。所以相對少人會行入嚟(好少會遇到人) ，行呢段嘅唯一好處係可以除口罩呼吸一吓新鮮空氣。
中後段開始係泥路，路況同正常行山見嘅小徑路差唔多。
尾段有個分岔口，繼續直行就得。
好快就嚟到配水庫遊樂場。
呢到係馬己仙峽配水庫遊樂場，經過咁多次未試過遇見人。唔知係因為地點太吊腳，定係咁啱我行嘅時間冇人。
香港好多水務設施一望埋去就知好有歷史(價值)﹐以前啲舊建築感覺上總係靚啲嘅。
睇完嘢就沿住車路離開配水庫，只係得一條路實唔會行錯。
呢個睇嚟似係後期加建嘅配水庫，有個無敵靚景架喎。
配水庫出口就係馬己仙峽道。
跟住就沿馬己仙峽道旁邊嘅行人路落斜。
行到見路口就轉右落去，行前多幾步就會見到有樓梯。
落樓梯之後就過對面馬路，之後轉右行。留意呢到兩邊都多車，要小心過馬路。
過馬路之後沿樓梯再落去。
落嚟之後就沿行人路繼續落。
行多陣就嚟到熟口熟面嘅路口。
咁啱有纜車經過，影張相先?。
繼續沿馬己仙峽道行人路行，去到蒲魯賢徑嘅路口就轉上去。
再行多陣就再轉上去高化利徑。
上完條斜路就嚟到梅道。
梅道纜車站 – 影相之餘喺到座吓hea吓都唔錯嘅。座完就行過隔離繼續行程。
車站旁邊就係繼續上山頂嘅漆咸徑入口。
沿斜路上去，大致上係每逢見到灣位都轉灣上去就冇錯。
呢段路大部分時間都有樹蔭，行上行落都唔會太辛苦。
因為有臨時斜坡工程陣封晒圍版，等遲啲拆咗板再嚟應該有啲風景睇吓。
行完了，上到嚟白加道。
之後一直沿路邊行就可以去到白加道站。
白加道嘅億萬豪宅 view。
叮噹話上到嚟山頂見到維港一定要影張相打咭喎?。
繼續沿白加道行多一陣就嚟到白加道纜車站，轉個灣行上去就係山頂廣場。
影張相到此一遊。
下一站係西高山，由山頂廣場出發經夏力道過去會比較順路。
行餐飽嚟到公園仔，山徑入口喺公園嘅另一邊。
以前入口呢到冇指示牌，啲人行到嚟都唔知條路行去邊就會掉頭走。家陣整咗指示牌西高山就熱鬧咗好多。
落幾級樓梯之後再穿過一段小徑。
好快就會嚟到上山頂嘅樓梯口，起動上山囉～??♂️??♂️??♂️
鏡頭一轉就上到嚟西高山山頂，多人過旺角。
吖～行你又冇分行，但你就又要抖又要食?。
hea完就返原路落返嚟夏力道公園仔，跟住就要上另一邊嘅山頂公園。
先行過去對面嘅盧吉道。
之後沿路旁嘅呢條樓梯行上去。
跟住呢一段樓梯唔算太長，同西高山嗰段相比呢條易行好多。
行到嚟後段接住同樂徑，靠左上斜再行多陣就係山頂公園了。
上到嚟第一時間行出去觀景台望吓。
望過去啱啱行完嘅西高山，好似好高好遠咁。其實行過嚟又唔覺得係好遠，行吓行吓又到了。
睇少佢一陣都唔得，四維攪攪震攪到比獅子擔咗去。
由於怕咗隻石獅，叮噹話要盡快落山?。
轉個頭又返到落嚟山頂廣場。
商場裝修完咁耐都未試過上嚟行吓，原來家陣可以行上嚟平台睇嘢，真係大鄉里。
原來呢到開咗個大富翁夢想世界，啲人排隊排到打晒蛇餅之餘仲要比錢入場，我呢個cheap精見到仲唔即時掉頭走咩?。
又返落嚟芬梨徑，由呢到落去白加道就可以再接去舊山頂道。
穿橋底過去。
前面就係舊山頂道，跟住直落就得。
經過啲豪宅繼續沿行人路落去。
一直落到呢個路靠左轉過去。
之後就會見到落去嘅樓梯口。
跟住轉左沿香雪道行。
之前都冇留意原來有個登山電梯嘅指示牌，但啱啱喺路口個牌又唔係指入嚟架喎(靠你死得啦)。咁到底係路口個牌老L點，定還是係兩班人喺唔同時間整咗兩組唔夾嘅指示牌呢？以政虎典形嘅做事作風，似係兩單唔同時間批出嚟嘅工程，而當中又無任何協調嘅結果。應該係。。。除非唔係?
一直行到尾去街口過斑馬線，再沿干德道行。
見到李園即係差唔多到扶手電梯了。
好～到咗扶電梯，之後就沿住旁邊嘅樓梯落山去中環。
噢，之前封咗呢段電梯開番了，原來加咗啲燈喺兩邊。新嘅時候係幾靚嘅，唔知舊咗會點呢？?
行完扶手電梯段，落去就係中環。
吖頂～做乜裝修咗咁耐都仲未開㗎，今次又7咗了。算啦，下次又有理由行多一轉山過嚟?
行程記錄
Total climbing: 1588 m
Total time: 04:11:55
發表迴響