上星期行個頽到爆炸嘅薄扶林水塘行到一肚氣，今個星期要去一個有嘢睇嘅睇水塘平衡一吓心埋。見近來成日落雨估計好大機會可以睇到水塘放水，今日一於去睇水勝地大潭篤水塘。為咗唔好太過短癮，慣常地搵咗啲路嚟兜。其中只有一少段嘅港島徑係之前未行過，當係做運動之餘又試吓新嘢。
路線：鰂魚涌>柏架山道>大風坳>柏架山雷達站>大風坳>港島徑第6段(大潭上水塘>大潭篤水塘>大潭道)>大潭篤水壩>大潭水塘道>大潭道>赤柱東引水道>赤柱峽道>赤柱村道>赤柱灘道>赤柱正灘>赤柱新街>赤柱大街>美利樓>馬坑公園>環角道>赤柱峽道>南灣道>淺水灣天后公園>海灘道(淺水灣)>麗海堤岸路>香島道(深水灣)>苗鍾徑>海洋公園站
全長：26.76km
時間：5小時38分
座狗鐵去到鰂魚涌站A出口，轉右沿英皇道一直行。
行到嚟街口見到柏架山自然徑個牌就轉右。
轉灣之後行多陣就嚟到柏架山道口。冇錯，呢條係”道”嚟嘅。行行吓仲可以見到路牌添。由入口一直上到山頂波波一級樓梯都唔駛上，算係高得嚟又易行嘅山。
轉個頭就上到嚟大風坳，呢到係山徑交滙處，右邊可以接港島徑上畢拿山或者係落大潭水塘。左邊就可以上柏架山頂雷達站睇波波，或者係落山去大潭峽。今日行程係先上山頂，再落嚟去水塘。
行咗差唔多成粒鐘，終於都上到嚟可以回一回氣了。分岔路嘅右邊通去大波波，冇乜風景睇但係可以比較近距離影到個波。而左邊就係民航處嘅細波波，風景一流。上得嚟一定會兜晒兩邊，去完大波去細波會好啲。
大波波。
大波望細波。
以影相嚟計，波細真係冇乜睇頭。(唔好諗咗去第二度?)
其實我對靚風景要求唔高，只要夠高夠開陽，加埋個藍天白雲就己經係靚景。
影完相休息完就繼續行程，又係慢跑嘅時候。
轉個頭又返到嚟大風坳，跟住就沿港島徑第6段行落去大潭水塘。
認住右手邊個涼亭，喺佢後面上畢拿山，喺佢旁邊就落水塘。其實除非係唔識字，唔係應該都好難會行錯或者係唔識路。
行餐飽又落到嚟大潭水塘嘅主壩，好少見到咁高嘅水位。應該係高無可高了(因為另一邊放梗水)
沿主壩行到尾跟住轉左。
再行多一陣好快就嚟到副水塘，跟住沿副壩行埋過去。
副水塘之前有好多錦鯉，今日唔知佢哋游晒去邊。換咗一大群似係水塘原居民，如果有密集恐懼症嘅見到會唔會即時有反應呢？
大潭水塘嘅設計係冇放水窿，放水係靠前面呢個婑身水壩。啲水浸到壩頂就會自然滿瀉流出去，但係唔好諗住喺呢到流咗出去啲水就會嘥咗，其實瀉咗出嚟啲水係會引咗去下面嘅大潭篤水塘嘅。所以千祈唔好喺到污水源啊。
啲水好似瀑布咁望埋去都幾靚架，可惜部爛電話冇得開慢快門。第時行山可能要帶埋ND先掂?。
繼續沿斜路行落山，嚟到呢個位就要轉上去。
有個牌寫住去大潭道嘅，係港島徑路線嚟。
呢段港島徑本來應該係易行到爆，不過落咗幾日雨成條變咗濕泥路，跣到PK。有啲路段直頭好似溪咁有水流過，認真難攪。Btw，其實今日係我第一次行呢一小段港島徑?。
終於都行到嚟出口，聽到車聲了。行上去就係大潭道。
一上到大潭道見對面有路就9衝咗落去。落去之後就開始認得路，係認得自己行錯咗路?。呢到係港島徑嚟嘅，去睇水壩一定唔係呢條路。
拿拿臨行返上嚟大潭道，好鬼危險咁同啲車一齊行去水壩。其實趁佢轉燈塞車嗰時過嚟路邊行，啲車都唔會呠你嘅。似乎好多人都係咁行過去。
嚟到水壩旁邊就會見到有路可以落去。
嘩～好靚。到咗今日嘅目標景點，係時候狂影相???。
人多到爆，個個企喺到打咭。咁我唯有都打埋一分啦，整張37面先??♂️。
影飽相就沿村路走人，行返去上水壩另一邊嘅大潭道。
其實我好少行呢段路，對上一次嚟嗰時呢到係間甩皮甩骨嘅爛屋，家陣變咗做天文觀測站。
遠處見到個水務古蹟，順路行埋佢。
呢個係抽水站嚟喎，之不過呢啲水務古蹟十居其九都係封住晒唔會有乜嘢可以睇到嘅。
離遠影一張相之後就可以走了。
比較特別嘅係呢個水龍頭，寫住1923應該係年分嚟。就嚟有百年歷吏了。
運完吉就沿馬路行上去大潭道。
上到嚟了，過對面馬路有厠所同氣水機。仲有巴士站可以走佬添。
每次嚟到都係得個睇字，除非真係乾到一滴都冇，如果唔係我呢個cheap精係一定唔會幫襯佢買。價錢實在係太屈水了。
嘩～唔知邊個咁唔小心跌咗張八達窿。有山友好好幫佢掛喺當眼地方，不過隔離就係汽水機，咁掛喺到實在係有啲危險。雖然話冇咗’遊客’，但呢到唔係日本，張咭可能己經比人嘟光咗了。
好喇，睇完放水都冇理由咁快散水嘅。點都行埋去赤柱先講啦，閘後面條樓梯就係行去赤柱嘅入口。
呢條赤柱東引水道係由大潭一直伸延到赤柱嘅，全段引水道基本上係平路，上去之後沿路行到尾再樓條樓梯就係赤柱峽道。路程比較長但唔會難行。
一開波要上一小段樓梯，之後就係平路。
每次經過都一定會影張相，冇錢住豪宅影吓都好吖嘛。
當行到見到前面呢條樓梯即係代表就嚟到出口了。
跟住喺前面轉左落去赤柱峽道。如果直行去到引水道尾係可以連接去衛徑嘅，不過呢段嘅路絕對唔係一般嘅行山。要攀爬同穿林嘅，特別係呢啲多水嘅日子更加唔好去試。
落埋呢一少段樓梯，下面就係赤柱峽道。
過對面馬路再沿行人路直去。
嚟到巴士站旁邊就轉右落去，嚟個U-turn。
行前少少又過馬路，入去赤柱村道。
再沿路行落去就係赤柱正灘了。
真係低鬼能，仲意為海灘已經重開，嚟到先知原來仲係封梗?。
正灘呢邊真係幾靚，水清沙幼嗰隻。
轉個頭行到嚟市集。
嚟到赤柱影吓個牌先，後面仲有卜公碼頭做背景?
嚟到美利樓習慣上一定會影一影佢做個記錄，不過今佢唔係行程嘅終點。
下一站係淺水灣，行去要由市集行上去赤柱峽道。
入到馬坑公園見到第一條樓梯就轉右上去。
之後見到所有分岔路都係繼續上樓梯。
上到山頂就沿厠所旁邊條路向健身園行。
行到尾就會見到落去環角道嘅出口。
落完樓梯就直接過對面馬路，之後就轉右沿行人路去。如果想去觀音寺參觀，可以唔過馬路就咁轉右由寺嘅後門入去。
過馬路之後一直行，嚟到大迴旋處都係繼續向前行。
沿環角道一直行到見到左邊呢個小徑入口就轉上去。
小徑入口。
呢段小徑係由環角道接駁上去赤柱峽道，所以大致上成段都係要上斜嘅。
上到嚟就過馬路，跟住沿淺水灣道行。
行前一個街口之後就過馬路，喺巴士站後面會見到小徑入口。
跟住沿小徑一路行就可以去到南灣道。
呢條小徑係暗斜路段，由赤柱行去淺水灣係斜落，所以會行得好舒服嘅。
行到尾落埋條樓梯就係南灣路。
由呢到落去一定要小心，因為一落去就係馬路邊，啲車係會睇唔到你嘅。所以千祈唔好9衝啊。
落到南灣道沿行人路一直行，行到見到拯溺總會個牌就轉左行落去。
呢到落去就係天后公園。
嚟到就梗係要四維影吓相。
雖然個名叫天后公園，查實呢到滿天神佛乜都有嘅。
每次都一定會影吓嘅觀音像。
哎呀～海灘封咗冇得行添。
嚟到淺水灣，影吓個牌先講。
行到淺沙灘尾接入嚟麗海提岸路，
淺水灣泳灘封咗，啲人就過晒嚟前少少嘅熨波洲游水。
行完條堤岸路就嚟到深水灣。
有少少日落金黃色影落嚟嘅深水灣好靚，仲要係冇人，冇垃圾。
跟住就係轉落去苗鍾徑，沿住海邊行出去海洋公園。
苗鍾徑嘅盡頭係一條長樓梯，通常嚟到嚟嘅時候都已經行咗一大段路，所以上去會覺得好L辛苦。
又上返嚟香島道，跟住可以沿行人路一直行出去座車。
再行多陣嚟到海洋公園酒店。
天黑之前行到嚟海洋公園站，結束今日睇水之旅。
路線記錄
Total climbing: 1372 m
Total time: 05:38:30
發表迴響