經常上山頂都會望到喺山下面嘅薄扶林水塘，一直想搵個機會去行吓。衰在水塘嘅位置唔係咁容易可以順道經過，今日要尊程行過去睇吓。結果發現伏到爆炸，衰L到連條水壩都睇唔到。結果頽吓頽吓咁行返去灣仔走人。
路線：薄扶林道＞碧珊徑>龍虎山瀑布>龍虎山中草藥園>港島徑第1段>薄扶林水塘>薄扶林水塘道>山頂廣場>山頂公園(來回)>芬梨徑>白加道>山頂道>甘道>灣仔峽道>堅尼地道>石水渠街>藍屋
全長：16 km
時間：3小時40分
由於唔知道港大校園有冇重新開放比校外嘅人入，今日起步點揀喺薄扶林道油站旁邊嘅樓梯。可以搭狗鐵去香港大學站再座電梯上薄扶林道行上去，或者座巴士去到油站旁邊嘅總站直接起步。
如果好似我咁搭鐵，嚟到大學站就要上去薄扶林道C1出口。
座電梯上去。
上到嚟嚟個U-turn，沿住薄扶林道行上去。
再行前少少見到紅綠燈就過對面行人路。
一直行到油站，由左邊呢條樓梯行上去。留意旁邊就係巴士總站，可以座巴士嚟到油站起步嘅。
呢段樓梯都有啲長，不過行上去又唔算好辛苦。
上完段長樓梯跟住轉右，繼續上。
上多一少段之後嚟到路口，平時會接住左邊嘅樓梯上松林廢堡，今日想試吓繼續直去睇睇。
呢段路冇乜人行，可能因為大部份人都已經喺之前個樓梯口上咗去松林廢堡。
喺路邊呢舊大石又幾特別喎。
繼續行多陣又見到一個樓梯口，呢條一樣可以上到去松林廢堡嘅。家陣都係繼續直去先。
呢個十字路口之前嚟過好幾次，唔係由山頂落去摩星就係由摩星嶺行上山頂。一次都未試過直去或者係轉左，今日一於試埋另外兩邊。先試吓直行有乜嘢睇先。
原來行一大段之後嚟到盡頭係個地盤，旁邊有樓梯落去薄扶林道。前少少嗰座就係馬麗醫院，冇得再行了，要原路行返轉頭。
鏡頭一轉已經由馬麗醫院原路行返轉頭，再沿石澗邊行咗上嚟澗頂，嚟到一個好似係叫做龍虎山瀑布嘅地方。呢到風涼水冷空氣又好，難怪會有咁多人嚟呢到打躉。
睇完石澗行返轉頭，中途有一個指示上山頂嘅箭嘴。一於試吓跟住行先。
條路鋪得靚到好似正式郊遊徑咁。
原來小徑好快就連接返去中草藥園，又係熟悉嘅路段。跟住條樓梯上就係了。
轉個頭就上到嚟克頓道，跟住右轉。
又開始試一段之前未行過嘅路，去薄扶林水塘。
個指示牌話去水塘要行2公里多啲。
山徑慢慢向上，越行就越高。先前喺馬麗醫院樓下，家陣高過佢了。
繼續行多幾分鐘見到前面有一個路口。哦，原來前面就係港島徑。
個牌話行上頂要3公里多啲，睇吓遲啲有冇機會試吓行呢段先。
依？係乜嚟嘅呢？會唔會係水塘週邊啲設施嚟呢？
有指示牌喎，望吓先。
哦~去水塘係要轉落去嘅。繼續直行就係港島徑第1段嚟嘅(兩條戍李公仔)，咁我梗係會揀轉落去啦。
應該係到水塘了。
嘩~~勁喎。原來家陣啲郊遊徑咁先進有電子告示板。有埋即時天氣資料架喎⛅☀️???。
之前諗住嚟水塘會有啲嘢睇吓，可以四維行吓影吓相。點知唯一可以影到嘅就係呢間管理員房舍，如常地除咗喺外面影一張相之外就乜都冇得睇了。如果夾硬要從好嗰方面諗，其實佢冇用鐵絲網圍到實已經算係好好了。
又係鎖住，如果我知道只係可以睇塊爛鬼牌我上網睇仲好啦，根本就唔會浪費時間行過嚟。水務處啲嘢就係興影晒啲相出嚟再畫L埋地圖講到好似好精彩咁，但又封住晒唔比人入。就連想行近啲望吓都望唔到。明白可能有啲地方係怕比人污染所以封住，但感覺上似係典形公務員做事方式多啲(少做少錯，唔做冇錯)。
喺水塘停留時間最耐嘅就係呢個地圖板(因為要等人行開咗先影到相)，張地圖應該係呢到唯一一樣值得睇吓嘅嘢嚟。鬧夠了，跟住要行上山頂。
指示牌話行上山頂要2公里多啲。
暫時諗唔到以後有乜嘢理由要再嚟呢到。
又要上了。
行咗一陣嚟到一個分岔路口，轉左繼續上山頂。
之後係一段都幾長嘅斜路，係咁行係咁行。。。一直行到見到棵石墻樹就代表到逹山頂。
見到地標又影一影佢。
跟住就上去山頂公園。
又上到嚟了，影吓枝咪錶先。
今日有午飯時間，除咗有奶飲仲有飽食。
上得山頂公園就一定要行出嚟觀景台睇吓嘢，今日都仲係好好天可以望到晒成個南ｙ島。睇埋呢就可以落山了。
轉個頭又返到落嚟山頂廣場，跟住再經芬梨徑落白加道。
跟住就沿白加道行出去。
今次諗住經甘道落灣仔峽，所以繼續直行。
行完晒成條白加道出到嚟見到山頂道，跟住過對面馬路再轉左。
沿山頂道再向前行多一少段。
嚟到甘道口就轉落去。
出到嚟路口，左邊就係灣仔峽道口。呢個轉灣位比較多車要小心啲過馬路。
好喇，由呢到開始一直落到堅尼地道都係斜路，有部份仲係急斜。如果唔習慣落大斜路嘅可能會幾辛苦，可以考慮吓座巴士走人。
落到嚟寶雲道交界，繼續直去沿灣仔峽道落山。
跑完晒條灣仔峽道，落到嚟堅尼地道了。之後過馬路落去北帝廟同藍屋。
例牌菜，藍屋當係終點站。行完山去睇玩具?。
路線記錄
Total climbing: 1182 m
Total time: 03:39:36
發表迴響