今日又嚟港島行山做吓運動，由鰂魚涌出發經山頂行落中環。中間夾雜嘅路段大部分之前都已經行過好多次，今次試吓配搭埋一段自己比較少行嘅小馬山，咁就唔駛好似個個星期都重複咁行同一條路喇。
路線：鰂魚涌>柏架山道>送子觀音>衛奕信徑2段(小馬山)>懸空棧道>黃泥涌峽>港島徑4段(大潭水塘道>布力徑)>灣仔峽>甘道>山頂道>白加道>山頂廣場>山頂公園(來回)>白加道>舊山頂道>香雪道>干德道>中環至半山扶梯>中環
全長：21.24 km
時間：5小時03分
起點係鰂魚涌站 A 出口，出嚟之後轉右沿英皇道一直行。
行到街口會見到柏架山道自然徑嘅指示牌，跟住就轉右。跟住喺鰂魚涌街市旁邊嘅柏架山道開始上山。如果時間多又未參觀過怪獸大廈，都可以去八掛一下。
嚟到入口，今日唔知點解好似冇乜人。
沿柏架山道行上去，行到見到第一個樓梯口就轉上去。由呢邊上去馳馬徑沿路會比較少人，又可以慳咗唔駛行畢拿山。
指示牌寫金督馳馬徑，其實去到馳馬徑之後係可以連接衛奕信徑，跟住就可以經小馬山接返去港島徑再去陽明山莊。
武肺爆發之後多咗好多人行山，有時為咗避開人群會揀啲相對少人嘅路嚟行。冇人嘅時候可以除一陣口罩吸吓啲新鮮空氣?。
沿小徑一路上，行到見到第一個分岔路就轉右上去。
再行多一段就上到嚟送子觀音。
之前經常行柏架山道，到近幾次行先至知道原來呢到有個地標叫做送子觀音。四維都打理得乾乾淨淨，行山經過參觀吓實在係唔錯。
跟住由觀音旁邊嘅樓梯繼續上山，留意呢到個牌多咗衛奕信徑嘅指示。
經過一段樓梯後上到嚟另一個分岔路口，到咗金督馳馬徑，跟住就轉左沿路行。
路邊有衛奕信徑嘅標距柱，包唔會有錯了。呢到嘅位置係Ｗ016。
喺前面路口轉左，路口都有指示牌睇嘅。
行前啲嚟到指示牌嘅正面，照指示牌向大風坳嘅方向行。
跟住係一段好易行嘅平路。
一直行到見到右邊個樓梯口就轉上去，即係指示牌寫住去小馬山嘅方向。
嘩，又熱又曬，條樓梯仲好似好長咁。
行餐飽上到嚟，跟住轉左落去小馬山橋。如果繼續直去係可以行去紅香爐峰嘅。
今日諗住去中環，繼續沿衛徑上小馬山。
近來行山差不多所有地方都見到呢啲咁靚嘅花，上網搵資料摷到最近似叫嘅品種叫做野牡丹，係香港原生品種嚟喎。咁我就當住呢啲花叫野牡丹先啦。
由衛徑上嚟可以避開唔上畢拿山，但如果諗住咁行可以上少啲山其實係冇乜著數，因為呢邊都有一個小馬山要上。行起嚟好似仲攰過由大風坳過嚟。
草叢入面見到枝好短嘅測量柱。
見到遠處嘅大潭水塘，呢個位置通常都好好風，所以會企多一陣涼吓先。
行到出嚟路口，衛徑同港島徑合體。跟住就向黃泥涌峽方向行。
繼續行到嚟呢個樓梯口就轉右沿引水道行，避一避人潮。
轉個頭又嚟到懸空棧道，其實呢段都算係熱門路線。要過埋條引水道之後嘅小徑就會靜好多。
鏡頭一轉已經行完棧道之後嘅崎嶇小徑，出返嚟引水道。
嚟到黃泥涌了，行出去就係大潭水塘道。之後轉右沿行人路落去就可以去到黃泥涌水塘。
到黃泥涌水塘，過對面馬路繼續落去。
落到嚟巴士站再轉左行到尾，跟住轉右就會見到布力徑嘅入口。
跟住要行晒成條布力徑，去到最尾。之後啲路全部都好易行。
中段有個涼亭，如果跟足港島徑路線轉左，兜到傻之後係一樣可以上到去山頂嘅。不過一般情況之下都諗唔到有乜嘢理由要咁行，所以繼續直去就啱喇。
行晒成條布力徑嚟到灣仔峽道，跟住過馬路去正前方嘅甘道。
跟住係要行晒成條甘道。
上到嚟山頂道跟住轉左，再行前少少去到白加道個街口就過馬路。
過完馬路嚟到白加道，跟住就一直沿路行到尾。
好靚啊～
影一影個山頂牌打吓咭先。
跟住就照舊行上去山頂公園打個轉。
嘩～喺臨近山頂公園嘅山坡上面見到好大隻野豬，估唔到連山頂都有。
真係有少少想鋸L咗碌咪錶柱佢。
行出去觀景台望吓，成個南ｙ島都睇到晒。
至放西高山呢，都係望吓就算。免得過都唔好過去同人迫。
行路上山頂就係為咗飲佢?，呢排飲上癮。。。飲完就可以落山。
轉個頭落到嚟芬梨徑。
今日行山其實係仲有另一個目的嘅，今次要由舊山頂道呢邊落去中環。
由舊山頂道落山同喺灣仔峽道落山情況差唔多，都係要行一大段又長又斜嘅路，不過舊山頂道呢冇灣仔峽嗰邊咁斜。
繼續沿住舊山頂道落斜，嚟到香雪道路口就轉入去。
跟住一路沿香雪道行，留意左邊有個小徑入口係可以行上去干德道配水庫遊樂場嘅。不過落山沿行人路一直去會方便啲。
經過轉灣位有棵好大嘅石墻樹。
行出去街口就係干德道，過斑馬線之後再行前少少就會去到扶手電梯。
到了。可以行樓梯落返去中環。
到咗今日嘅目標終點，可惜嚟到先知原來係未開。出發之前淨諗住行完山就行 DONKI，完全冇 check 過佢開咗未，真係７到冇朋友?。唯有下次再嚟過。
路線記錄
尾段由干德道落中環路線因為要喺高樓大廈同橋底中間穿插，個GPS基本上係死晒亂跳到9彩，完全冇參考價值。但係有埋望落去好似會完整啲，所以冇cut走。
Total climbing: 1707 m
Total time: 05:02:54
發表迴響