行山怕長途怕又辛苦仲怕中途冇得走?咁不如去行街囉。今日諗住輕輕鬆鬆去行街，試吓南區海濱長廊。由堅尼地城出發行去海洋公園。呢個海濱長廊並唔係乜嘢新基建項目，其實只係將現有嘅行人路同小徑以加指示牌嘅方法串連起嚟。路線實際上亦唔係咁”海濱”嘅，當中有啲路段仲係幾鬼戇居添。所以唔好期望過高，如果因為未試過要為行而行，完成呢段都有啲滿足感嘅。如果行完呢段發現個身體好咗個膽又大咗，仲可以試吓行埋下半段去赤柱添。
路線：堅尼地城>東華痘局紀念碑>西環泳棚>芝加哥大學校園>大口環食水抽水站>沙灣徑>數碼港海濱公園>瀑布灣公園>華富邨>華貴邨>田灣水海傍路>香港仔避風塘>黃竹坑站>海洋公園站
全長：16.7 km
時間：3小時50分
座狗鐵去到堅尼地城站由C出口上地面，跟住轉左沿行人路直去。
好快就到第一個景點石墻樹，其實香港好多地方都有石墻樹，不過呢幅有狗鐵做宣傳所以特別多人嚟睇。
繼續沿行人路去，最後轉個灣出到嚟域多利道。跟住可以轉左沿行人路一直行，或者過斑馬線去對面行人路嘅堅尼地城巴士總站。如果想座巴士係可以嚟到總站落車起步，只係會略過咗石墻樹一少段。冇乜損失嘅。
座巴士嚟有另一個好處，就係一落車就可以睇埋呢個喺站後面嘅東華痘局紀念碑。
睇完嘢就由巴士站行返上嚟域多利道，跟住就沿行人路上去，開始今日又長又悶嘅行街之旅。
行咗一陣嚟到上摩星嶺小徑嘅入口，今日冇打算要上去。只係經過見到個入口影一影。
再行多一段嚟到西環泳棚嘅入口，呢個咁出名嘅景點經過就梗係要落去影張相啦。
如常地大排長龍等影相，其實唔係好明行出去影有乜嘢咁特別，好可能係我自己唔識欣賞?。
沿樓梯行返上去域多利道，中途見到有一條打撗嘅小徑。一於行吓睇有乜嘢睇先。
原來呢條小徑係通去啲已經拆晒嘅木屋區，完全冇嘢睇。可以走人返上去繼續行程了。
繼續行多一段就嚟到芝加哥大學校園。
入去行個圈，影吓個炮台遺蹟。
跟住由大學正門離開，出嚟就會見到摩星嶺徑嘅入口。
跟住繼續沿行人路直去。
依，又見到個牌。
嘩～要行去赤柱仲要行多18公里。。。行死人咩。。。好彩我冇諗住去赤柱?
跟住行前少少，喺右邊呢條樓梯落去大口環道。
落完段樓梯之後嚟到海邊。
噢。。。原來呢到係員工宿舍嚟，喺正海邊環境都唔錯喎。
行到出嚟路口又見到有個牌，遠處見到馬麗醫院同佢後面嘅西高山。
好，跟住轉右。
哦，原來大口環英文叫sandy bay。會唔會改名叫大口仔，英文轉做 sanrio bay？???
跟住行到尾再轉左。
行多陣就嚟到大口道，有少少迷失。。。行出去街口再睇睇。
唔。。。出嚟之後轉右，似係要轉右。
喺地吓見到呢個，段估都應該係沿呢條叫沙灣徑嘅路再去。
繼續行前少少，見到左手邊有一條路行出海旁，段估都應該係行出去啦(可惜今次估錯了)。
嘩，呢路都幾鬼長架喎。
小喇叭。。。行到尾先至發現原來係唔可以繼續去。唯一可以通上橋面嘅樓梯係鎖住嘅?。
一場嚟到，擒埋出去睇睇先。
跟住好L無癮咁原路行返轉頭，再轉右繼續沿沙灣徑行。
冇耐就經過麥理浩復康院。
大無聊，見到乜都影吓。
行到田徑場邊開始要上斜。
前面落斜條路係數碼港道，就快到數碼港了。旁邊仲有一條樓梯?。
政虎做啲嘢真係好低能，又唔係有乜嘢設施唔比得人入。就咁一條樓梯硬係要鎖住唔比人行。海濱長廊唔可以沿海邊行，成件事錯L晒。不過海濱長廊講到尾可能只係一個cap水項目，都唔好太過認真。
沿數碼港道嘅行人路落去，呢到風景都唔錯架喎。
終於嚟到數碼港了，梗係要轉出去海濱公園行啦。
喺海邊行都幾舒服。
繼續行海濱公園行到尾，離開數碼港向瀑布灣進發。
離開公園出嚟到數碼港路，又見到個長廊牌。
跟住落嚟條路有啲戇居，要兜個大S先至可以去到瀑布灣。仲要喺條勁多車同死氣嘅馬路邊行，真係冇晒癮。
沿路行咗一陣，喺路邊發現疑似係街坊搭建嘅小徑入口。再睇吓附近位置，好有可能呢條路係通去瀑布灣嘅，一於擒落去睇吓。如果想正正常常行街嘅可以當見唔到，跟官方路線繼續沿行人路上去，一樣可以去到。
入口位置，有興趣試吓嘅可以認住佢。
一開始幾正路。
落多少少見到有啲鐵梯，似係啲水務設施。有兩條樓梯，一邊向上另一邊向落。
向上行條路似乎比較企理，不過方向錯晒，一定唔會行呢邊。
向落呢邊。。。唔多似係多人行嘅路。今日冇諗過會行呢啲路冇搽蚊膏，行呢啲路死梗。。。
結果都係行咗落去，見到一條溪，沿溪邊有路可以行。附近有大量垃圾，環境麻麻。同一時間，對腳已經餵飽咗唔知幾多隻蚊了?。
噢，原來呢到就係瀑布灣條瀑布嘅上游。喺呢到右邊就可以行入去公園。
正啊～行咗條捷徑話咁快就落到嚟。
跟住沿公園樓梯落去。
又真係幾靚喎，難怪會咁多人嚟呢到影相。
如果cut走背後啲樓，話呢到係市區真係好難會有人信。
除咗瀑布，其實呢到仲有一個機槍堡係值得參觀嘅。
睇完瀑布又繼續上路，又見到個長廊牌。佢話距離堅尼地城有6.5公里，原來只係行咗咁短路程，點解好似行咗咁耐咁嘅呢？?
跟住沿公園啲小徑行，其實都唔知有冇行錯。
依，又見到個長廊牌，即係應該冇行錯路。
唔知點解呢到會整個閘，個黃色牌寫住叫人唔好喺呢到游水，但海濱長廊個牌又介紹呢到係華富邨海旁游泳點。好典型嘅政虎做事作風。
嘩，呢到好多神像喎。放到滿晒。
估唔到連招財?都有?。
吖，呢個唔知係乜嚟嘅呢？
呢個向住海嘅一定係天后娘娘喇。可惜我戇居居唔醒起附近有個雞蛋仔，冇去搵埋嚟睇。
跟住似乎要轉入內街，又似乎擒上去石?行會近啲。
望落好似好正路，一於試吓。
正，咁先至叫海濱長廊吖嘛。不過好似冇乜人咁行?，都係趁有個軟地跳返落去地面先。
沿公園行到尾出返嚟馬路邊。
原來嚟到華貴邨巴士總站。
繼續沿田灣海傍道行，又係時候吸吓啲死氣了。
終於行到嚟香港仔避風塘，好似冇乜特別嘢睇。
又見到有個長廊牌。
之後經過魚類統營處，應該唔會好似築地咁可以入去參觀?。
行吓行吓嚟到香港仔市中心，越嚟越冇嘢睇。
正，終於可以轉返出去海邊行了。
又有個長廊牌，即係冇行錯路啦。
自己好少嚟香港仔呢邊，好似都未見過香港仔隻海鮮坊。之前成日以為隻船係喺避風塘入面，今日終於知道唔係了?。
忽然之間好想睇吓隻船，會唔會過去深灣嗰邊就可以見到呢。。。
太白係咪珍寶啲 friend?。
行行吓又有嘢睇，見到兩個漁民喎。
呢位啊叔咁疏肝喺到嘆孖蒸?。
真係大鄉里，原來香港仔係有觀光舢舨座，搵吓資料發現都唔算係好貴。有機會嘅話要約埋朋友一齊試吓。btw，上船地點喺鴨利洲，應該唔會係我見到呢個碼頭。
又有個牌喎，照佢所畫條路線，跟住應該冇得再喺海邊行。
跟住嬸嬸轉左。
之後沿呢條叫香葉徑嘅路行。
又有個長廊牌，今次地圖話沿住條路軌行去海洋公園。
呢間大王爺廟應該係呢段路嘅最後一個景點。
嚟到黃竹坑站，原本應該繼續行埋去海公園收工嘅，不過見到海鮮坊個指示牌又想去睇吓。
結果行咗鬼咁遠終於嚟到碼頭。
見到隻船了，目標達成。可以行返轉頭完成埋最後海濱長廊。
又返到嚟黃竹坑站，都唔係好知跟住要點行。過咗馬路再算。
墻邊啲壁畫又幾特別喎。
堅勁，全部係噴上去嘅，好鬼靚。呢班細路開梗戰喎。
依？見到隻忽忽即時諗起一位大劣師議員。
就到了。
行咗咁鬼耐終於嚟到海洋公園，試咗呢段海濱長廊了。雖然未至於完全冇嘢睇，但吸引力係差咗啲，以後都未必會再咁樣行。
路線記錄
Total climbing: 715 m
Total time: 03:50:16
發表迴響