新玩具 — 叮噹手指頭公仔

跌完錢又再跌錢，終於都比我買齊兩套叮噹公仔。啲日本仔每次有啲乜嘢借口就總係會趁機狂出產品，今次50週年又點會例外(叮噹係招貓嗰fd嚟吖嘛😂) 。呢兩盒係手指頭公仔，隻隻做形都好可愛，中間係空心可以篤隻手指入去。不過成年人又仲會買公仔嚟玩嘅就只可以用手指尾喇🤣。

彩色呢盒係未來百貨公司限定版嚟(又好似話叫做🌈版) ，雖然係每一隻都唔同顏色，但我覺得應該叫做單色版啱啲。

講真我鐘意正常版本嘅叮噹多啲。

咁多包淨係要開晒佢都有排攪😅

為咗唔比啲人肓抽嗰時估到邊隻打邊隻，每隻叮噹都包咗張咭紙。咁包裝有個好處係入面隻叮噹一定好安全。

全套10隻入面我最鐘意就係呢隻，一來係做形比較特別，二來係手工好靚。

叮A: 你企到咁高做乜？
叮B: 等我比啲好嘢你睇啦(攞梗枝空氣炮😈)
叮A: 😃?

食豆沙飽飲綠茶呢個係常見嘅叮噹款式，心心眼嗰款就唔係成日有。一個字 – Q~

佢每次見到老鼠就係呢個😱樣。

都唔知點解每次全套買嘅叮噹總會有一隻有瑕疵，到底係我特別好彩，定還是係普遍現像嚟呢？

最後全部一齊影張大合照😄。