重陽節登高 — 欣澳行山去梅窩

延續 part1 行程，穿過咗高速公路橋底，兜嚟兜去攪咗咁耐終於正式開始行山。由小徑上去大山，跟住行餐懞去老虎頭郊遊徑，之後上埋蓮花山最後經鳯徑落梅窩走人。

路線：欣澳站>翔東路>竹篙灣村文娛康樂室>大山>犁壁山>大輋峒>榴花峒>老虎頭郊遊徑>亞婆塱>鴨腳瀝>蓮花山>雙東坳(鳯2)>南山>梅窩(鳯1)

行入電訊機站鐵絲網旁邊嘅入口就會見到小徑入口，只要跟住向上行就可以上到去大山。

行一小段之後就會離開密林區，望到大山就喺前面。

見到第一枝測量柱。

好L辛苦咁行到上嚟大山，好似行咗好高但其實300米都冇。

今日好好天，由大山望過對面可以睇到無阻擋嘅大陰頂同迪欣湖全景。影飽相就繼續行程了。

行咗一陣喺路邊見到花好野牡丹，唔知有冇認錯，因為過好少見會矮到貼住地下。

一路行一路見到有唔同種類嘅花，包括呢啲細細粒好密集嘅菊花?。

行到嚟犁壁山(263M)，如果有 kill 標癮嘅行呢段路一定會好滿足，因為由開始上山到呢度２公里多啲嘅路程就已經見到第３枝測量柱。

再行多大約２公里嚟到大輋峒，呢到有個發射站。不過由於有太多人喺呢度休息同吹水，所以冇停低影相急急腳行過走人。

行多一陣開始見到愉景灣。

可惜前面仲有一個又一個嘅山頭等梗我。。。仲有排都未到。

其實由欣澳開始行到去蓮花山都差唔多有半個大嶼山嘅，路程唔算短。沿途仲要上上落落幾個山谷，計埋上蓮花山嘅一段，真係唔容易應付。

沿路見到好多呢啲小白菊，雖然唔算係乜嘢靚花不過行山見到花都總好過淨係見到雜草。

第一次見到呢種稙物，啲花一層一層咁開好特別喎?。

一個又一個山頭，好似行極都仲有咁。

見到老虎頭了。

終於都嚟到老虎頭郊遊徑。

跟住落嚟係沿地圖上嘅紅色波波行去搵啊婆，路程大約係4公里。去到之後就再接小徑上去搵鴨腳。

繼續行程，離遠望到下一個目標。除咗係好遠之外，仲好似好L高咁?。

由郊遊徑可以望到愉景灣水塘，遠睇都幾靚嘅。

行吓行吓嚟到呢個有好多大石頭嘅地方，呢到有啲石形狀特別，所以好多人喺到擒石影相。

依？今日又比我見到冇人打梗咭嘅試劍石喎，唔知係咪已經 out 咗唔興呢??

冇人仲好，我可以慢慢影。

回頭影多一次隻?就走人了。

離開試劍石行多陣又見到另一舊大石，今次呢舊叫做仙桃石。如果就啱角度睇真係幾似一個桃㗎。留意如果由老虎頭向啊婆塱方向行係會見到佢嘅背面，如果冇留心未必會認得出嘅。

距離目標又近咗，可以好清楚咁望到晒同蓮花山相連嘅幾個山峰，其實離遠睇吓咪算囉，做乜要行上去呢?

行完老虎頭郊遊徑嚟到出口涼亭，如果要敗走呢到可以接主路(奥運徑) 落梅窩或者白芒。

又睇吓張地圖，啱啱行晒啲紅色波波。因為呢係老虎頭郊遊徑嘅地圖，所以跟住落嚟啲路呢張圖睇唔到(冇得畫嘢添?) 。

小徑入口就喺正涼亭前面，由於越嚟越多人行，以前隱敝嘅小徑入口已經變得好明顯。

跟住係一般嘅穿林路，大致上路徑係清楚嘅，但沿途亦有分岔枝路，唔好諗住靠絲帶零準備就嚟(都唔好靠睇我啲相)。未行過最好係搵熟路嘅人帶一次先好自己行(如果可以嘅話)。

望住個山就好容易分到方向，知道要向邊度行。不過之後嘅穿林路段就冇咁容易。

行到呢個分岔口轉右。

其實睇相同現場環境有一定差距，啲唔太明顯嘅路睇相係分辯唔到出嚟。嚟到呢個小樹轉左。

斷斷續續咁穿過啲電線架。

又出到嚟開揚位置，環望四周最高座山就係蓮花，好易認到唔會錯。跟住條路大致上都係向住佢嚟行。

再落一少段斜路，路邊見到啲外露咗嘅石屎板，係用嚟蓋住啲高壓電線嘅。

每次都係行到見到呢個電線架就由旁邊落去，小徑入口多咗好多雜草有啲難搵，行咗入去之後就會清楚一啲。不過今日想試吓繼續行前多少少睇吓，如果搵到條好行啲嘅路就唔駛由呢到落去了。

過咗電線架繼續沿住主路向前行多陣，睇吓有冇機會係另一條比較易行得嚟又上去山嘅路。

行多陣發現原先濶落嘅大路收窄成向下行嘅小徑，聽到下面傳嚟嘅水聲，估計都係落去同一條澗。咁似乎冇乜著數，都係返轉頭行條比較熟啲嘅路算了。

其實已經行到好Ｌ攰，都係休息一陣食個飽先至繼續行程啦。行成日山帶得３個迷你腸仔飽其實係咪少咗啲呢？冇法啦，減肥係要食少啲。。。

起行，跟住係要行一段路落去下面嘅小澗，呢段路都有啲崎嶇嘅。

轉個頭落到嚟小澗了。

澗邊有一個唔多起眼嘅小徑入口，唔好心急慢慢睇清楚確定咗先行。過埋呢到之後最容易行錯嘅路都過晒，之後大致上係一條路上山。

又有電線杆。

呢種花之前行山都見過一兩次，個樣有少少似蘭花(不過應該唔係)，幾靚嘅。試過上網搵資料但唔成功，始終都唔知道呢啲叫做乜嘢花。

之後啲路咗係斜到褔街同好Ｌ辛苦之外，可以話係冇乜特別嘢。每當行到攰嘅時候可以擰轉頭望吓下面嘅梅窩。遠啲仲可以望到喜靈洲同再遠啲嘅南Ｙ島。

山頂在望了。

終於都上到嚟?。

今日想試下上晒呢度幾個相連嘅山峰，上落唔大行埋佢應該冇太大問題。

又見到花，個樣同之前見大朵嘅一模一樣，不過 size 就細咗好多。之前睇相以為係野牡丹，花同樹葉形狀都似。但係 size 相差實在太遠，唔識得分?。

好多芒草，幾靚。

嘩～呢個位超靚，唔肯定係因為小人會行過嚟，定因為就嚟日落所以冇人。

離遠望到鳯凰山，同山谷下面嘅大佛。

另一邊望到跟住要上嘅蓮花山，至於二東同大東就一定唔夠時間上，去到雙東坳就落要落山走人。

蓮花山在望，都好似好高咁喎?。其實蓮花係大嶼山第3高嘅山嚟，不過上到嚟呢度要再登頂又唔會太難。

轉個頭又行到上嚟。

正常呢個時間啲人應該都已經走晒落山，所以山頂一個人都冇。

蓮花山山頂三角測量柱(766M)，影埋佢就可以開始落山。

由蓮花山落嚟仲要再行多一段路就會嚟到雙東坳，剩低大約仲有半粒鐘日照(餘光)時間，以路程計經黃龍坑郊遊徑落山會近啲。但考慮埋入黑之後仲要行嘅路段，跟鳯徑落南山會好啲。當然每個人嘅腳程唔同會有唔同考量，不過可以嘅話時間都係唔好預得太緊啦(如果同我一樣習慣入黑前要離開山區)。

有決定之後就要拿拿臨落山。相比黃龍坑郊遊徑呢段啲路易行好多，勉強都仲(夠力)可以跑吓樓梯落去。

天色越嚟越暗了。

大約半粒鐘之後落到嚟南山了，都仲有啲啲光喎，咁一於行多少少先至轉出馬路啦。

差唔多黑齊了，都係 cut 出去馬路行好啲。

今次係第一次冇跟鳯徑路線提早轉出馬路行，估唔到即時出事。出到嚟路口對住嶼南路見到右邊係向下，下意識諗落梅窩梗係向下，所以第一時間就轉右。行咗一陣覺得唔對路，印像之中每次經嶼南路落梅窩都係喺馬路左邊嘅行人路，點解會變咗行右邊嘅呢？再開個 google map 睇吓，確定係行錯咗方向了，唯有返轉頭。下次要記住轉左?。