今日打算完成縱走港島計劃，由最東行去最西。出發前已經好有信心可以完成，因為每段都斷斷續續咁行過，今次其實只係加埋一次過行。當中走線安排可長可短，可難可易。其實好鬼有彈性﹐前設係要知道每個交接點嘅路線選項同所需要嘅時間，再因應自己當時情況變化調整。簡單啲講，有力咪沿路每個山都上一上，冇力就繞山腰過囉。就算真係中途有乜突發事，沿路走佬位多的是，算係有挑戰得嚟又相對安全嘅玩法。覺得港島徑全走太長，又或者太嫌悶嘅不妨諗諗。
路線：小西灣>黑角徑>黑頭角>龍躍徑>砵甸乍山郊遊徑>砵甸乍山>馬塘坳>港8>大潭峽>柏架山雷逹站>大風坳>港5(畢拿山>渣甸山>陽明山莊)>港4(布力徑>聶高信山>中峽)>布力徑>灣仔峽>甘道>山頂道>白加道>山頂廣場>柯士甸山道>山頂公園>同樂徑>盧吉道>克頓道>松林廢堡>碧珊徑>薄扶林道>士美非路>堅尼地城配水庫遊樂場>摩星嶺>摩星嶺徑>芝加哥大學校園(炮台遺跡)>域多利道>堅尼地城電車總站
全長：32.93km
時間：9小時4分
路線概覽
起點係小西灣運動場，喺柴灣站轉47M小巴去運動場落車就係起步點。如果唔想座狗鐵，都有唔少巴士去小西灣巴士總站嘅。落車之後行過去運動場都好快。
嚟到起點小西灣運動場隔離嘅公園，呢到就係今日嘅起步點。
起步～
沿龍躍徑上山，冇耐會嚟到呢個分岔路就轉左行出去。
其實一轉就已經係轉咗入嚟黑角徑，呢段路好靚好易行，重點係冇乜人會行入嚟。因為行出嚟除咗路程遠咗之外，仲要上一個小山先至可以返落龍躍徑嘅(所以咪少人囉?) 。
黑角徑盡頭就係黑頭角燈塔，係一個完全冇特別嘅地方。今日行入嚟當然唔係為咗佢啦，係要落一落去海邊，叫做係有咁東得咁東啦。
今次嚟發現多咗個牌，原來呢到有個古石刻啱啱喺 2019 年納入咗為法定古跡。之前唔知道有睇唔到，家陣知道有一樣係睇唔到，因為搵唔到?
呢到行落去海邊嘅路絕對係難行同有啲危險，之不過對啲街坊魚友嚟講就可能係濕濕碎。
前面左同右兩條路都係一樣嘅，不過感覺上由右邊落好似會易少少。
吖，棵樹生出嚟啲葉又幾得意喎。
終於爬到落嚟海邊。
呢到差唔多係港島最東，望過對面係東龍島(洲)同埋田下山。
由海邊上返嚟，喺燈塔旁邊嘅小徑上山。
小徑入口好明顯，沿路行都好容易。
上到嚟一個小山頂。
PWC cable即係乜嘢線嚟呢?會唔會係有磁能嘅呢???
繼續沿小徑落山。
樹上面掛住咗個神運客留低嘅收音機。
跟住有一段樓梯。
之後又返到嚟龍躍徑。
沿龍躍徑繼續上山，見到遠處柏架山山頂上嘅波波。
上到嚟哥連臣角道，跟住轉右入砵甸乍山郊遊徑。
然後係要上一段長樓梯，平時行唔覺辛苦，今日帶住個口罩行即時想死。原來自己咁鬼弱，吸少啲氣就即時爆偈。
頂唔住，出汗出到成個口罩都濕晒，唔可以再帶了。
好彩再行多一陣就行完段樓梯，可以轉上去砵甸乍山，會少人好多。如果唔想行上山，可以繼續直去沿郊遊徑落引水道去馬塘坳。
見到砵甸乍山了。
沿路上山，中途有一個戰時遺蹟。應該係一個瞭望台。
不過家陣喺入面己經唔可以瞭望到啲乜嘢，因為比全部比啲草摭住晒。
行上瞭望台屋頂就即時唔同晒，風景都唔錯架喎。
砵甸乍山上面嘅測量柱，形狀夠晒特別。
跟住沿小徑落山，個警告牌有啲流，條路其實好正常，不過如果天氣潮濕或者落完雨行啲泥路會比較跣。
對我嚟講呢啲肯定唔係艱險難行囉，不過呢啲嘢好主觀嘅。行唔行自己諗。
落到嚟馬塘坳了。跟住又接番港島徑行一小段。
奇~平時迫爆嘅路口今日竟然冇乜人，不過今日點都唔會行上去架喇。續直行去大潭峽。
同港島徑講拜拜，之後再見就係第5段了。
距離柏架山又近咗，見到山上兩個波波。
照指示牌落去石澳道。
落到石澳道就沿行人路繼續向前行。
跟住要行一小尸段冇行人路嘅馬路，好彩呢段唔係太長，一頭一尾望吓冇車嚟就可以急急腳跑過去。記住要靠左邊行。
跑完一小段馬路上到行人路，回一回氣再望過對面。留意左手邊有一個斜坡維修道入口，可以由呢到行上去。之後就可以好安全咁過到去另一邊嘅巴士站。如果想繼續沿行人路都可以，不過出到去迴旋處過馬路會難一啲，同埋要跑多一小馬路。
認住呢維修道個入口，過馬路時要小心睇車。
沿樓梯行上去。
跟住就可以行到嚟大潭峽迴旋處，唔需要喺下面過馬路。
行上嚟另外一個好處係可以參觀埋呢個二戰時期嘅機槍堡，由於上星期己經影睇過，今日唔再影了，繼續沿維修道行。
最後沿維修道落到嚟另一個戰時遺跡，可能係彈葯庫之類。直望對面馬路條維修道就係上柏架山嘅入口。由呢到過馬路相對會安全好多。
其實啱啱行過嘅機槍堡同呢到啲廢屋之前都係比大量雜草摭蓋住嘅，但近呢幾次行發現有人清晒啲雜䓍，咁我就可以影吓相了。
掛住影廢屋唔記得喺維修道嘅山徑入口影相，用住一張舊相先。繼續沿維修道行去到呢個轉灣位就會見到有一個好明顯嘅山徑入口。
跟住離開維修道上山，呢段山徑都算係易跟易行嘅，近來仲好似多咗人行。
最後會見到一條打橫好闊嘅路, 跟住轉右行落去。呢條路好似叫做港島林路。
沿林路再行前少少，喺前面呢個路口行入去。入去之後就係野豬徑，如果唔想咁辛苦上柏架山係可以沿野豬徑一路行到去大風坳嘅，全程只係微斜上，好容易就可以去到大風坳。
沿野豬徑行冇幾遠，留意右邊會有一個小徑入口，行入去之後就係電塔底，上柏架山嘅入口就係喺電塔後面。
由電塔上柏架山頂大約要爬升250米，要有合理預期係有一定嘅上坡路段。有啲好易行，有啲會比較崎嶇。臨近山頂有枝路有機會行錯嘅。而全段比較特別嘅有呢條高過頭嘅草通道。
其實喺香行山都好多時會見到紅葉，不過通常一講紅葉就只會諗起楓葉，呢啲感覺上係差咗啲。
終於嚟到山頂，見到枝標了。
呢個可以話係柏架山招牌位，上到嚟一定會咁影番一張。
呢到竹風景一流，仲要加埋藍天白雲。呢啲咁嘅景通常係夏天先至會出現，今日都算好彩囉。
轉個頭就行到嚟大波波。
跟住行埋過去細波波。
上嚟柏架山波波好多次，但一次都未試過行落去。今日一於落去睇睇先。
吖，原來行出嚟有另一枝標，風景仲唔錯喎。
影飽相就返上嚟，影多一張波波就落山。今日啲雲真係不得了。
開始落山，由山頂落去大風坳都大約有2公里路，最好就係慢跑落去。
轉個頭又落到嚟大風坳，跟住就要接港島徑第5段上畢拿山。如果咁快就要敗走，都可以沿斜路落山去鰂魚涌嘅。
》》》繼續 part2 行程。