延續 part1 行程，由大風坳經港島徑行去喺黃泥涌峽。之後就可以經布力徑去灣仔。
路線：小西灣>黑角徑>黑頭角>龍躍徑>砵甸乍山郊遊徑>砵甸乍山>馬塘坳>港8>大潭峽>柏架山雷逹站>大風坳>港島徑第5段(畢拿山>渣甸山>陽明山莊)>港島徑第4段(布力徑>聶高信山>中峽)>布力徑>灣仔峽>甘道>山頂道>白加道>山頂廣場>柯士甸山道>山頂公園>同樂徑>盧吉道>克頓道>松林廢堡>碧珊徑>薄扶林道>士美非路>堅尼地城配水庫遊樂場>摩星嶺>摩星嶺徑>芝加哥大學校園(炮台遺跡)>域多利道>堅尼地城電車總站
港島徑入口就喺涼亭後面。
跟住又有一段長樓梯要上。今日行程入面畢拿山係冇得 skip 嘅，好彩呢段又唔算係好長。
終於上到嚟到畢拿山，見有人喺到打梗咭。
我當然唔會阻人影相，影吓個牌就走人。
由畢拿山向西望會見到今日另一個目標，太平山。好似好遠咁，其實行吓行吓就到架喇。之後啲路相對地易行好多。
嚟到前面呢個路口，打撗插埋嚟嗰條係衛徑嚟嘅。去黃泥涌繼續直行就得喇，如果忽然想放棄敗走，可考慮轉入衛徑，同自己講話忽然想去紅香爐峰睇風景都得?。
沿港島徑繼續行，之後就要上渣甸山。行上嚟都幾L攰嘅，所以要借影相成機回一回氣。望返轉頭已經離開柏架山個波波好遠了。如果唔想辛苦上山，又或者想避一避人流，係可以經山腰嘅懸空棧道接小徑出渣甸南引水道，一樣可以出到去陽明山莊嘅，橫向距離係會遠咗，不過平路可以行番快啲同冇咁辛苦，加埋時間會差唔多。
終於都上到嚟渣甸山。
呢到個 view 同先前喺畢拿山望到嘅差唔多，分別係距離太平山近咗少少咁。
繼續行沿路都冇乜嘢特別，臨近尾段有一個紀念碑值得停一停睇睇。呢個係為咗記念喺香港保衛戰入面犠牲嘅守軍嘅，為保護同僚瞓身檔手榴彈唔係電影情節，係喺香港發生過嘅真人直事。需然自己冇親身經歷過，但喺篡改歷史仲未流行嘅年代，流傳落嚟嘅都係史實，值得香港人去記住。
落埋條樓梯就行完港島徑第 5 段了，出去就係大潭水塘道。
跟住唔需要過馬路，繼續沿行人路落去。
冇耐就望到下一個目標，聶高信山。當你由小西灣開始翻咗 4 個山嚟到一條向下行嘅大斜路，再望埋去遠處見到一座咁L樣形狀嘅山話要行上去。。。實在有啲嚇人嘅。不過信我，查實行落又冇乜嘢嘅。但如果同朋友一齊行聽到話要上去，佢可能會第一時間?死你都唔定。所以有時一個人去行山係有必要嘅?
繼續行程之前要先補給，係黃泥涌峽道油站有便利店，同埋巴士站。要投降走人又得，打完水繼續行程亦得。
查實係有唔少人座巴士嚟呢到開始行山嘅。
起步到依家飲咗1.5L水，下一個補給站係山頂公園，買枝1.5L實夠飲了。
行返過嚟淺水灣道，又聽到另一個巴士站嘅呼喚。不過我係唔會咁快走人嘅，點都行到灣仔峽先講啦。
轉入去布力徑繼續港島徑第4段行程。
呢啲咁舒服易行嘅路段，最適合就係開餐了。今日有好嘢食，係菠蘿忌廉飽???
早前望埋去十分凶狠其實係另一邊山脊嚟嘅，由後面嘅布力徑沿路過嚟其實已經上咗一節，淨落嚟要再上大約只係百幾米。大部分人都會揀由呢個渠位上山，因為沿路會有好多石頭可以影相，落山時又唔需要走回頭路。不過我今日唔多想咁辛苦由呢到爬上去(查實係冇貨) ，加上見到已經有好多人上梗去，咁就更加唔會由呢邊上。一於安全啲由樓梯上去。
繼續沿布力徑行，中段會有一個樓梯口，由呢到行上去係一般郊遊徑級數嘅樓梯，仲有樹陰唔洗曬，如果目標只為上頂實在冇理由唔行呢邊。
其實好多山上面嘅發射站都一定會有山徑連接，因為要比工作人員上去做嘢。佢地有時要抬住啲器材上去，所以啲路一定唔會太過黐線，亦唔會有乜嘢危險。
又有啲平衡木樓梯。
終於上到嚟了，見到先前由渠位上去嗰班山友。
上到嚟就梗係四維影吓相。
啲山友影完大合照就走晒，到我又影張打咭相先。咁好天實在係難得。
影完相就落山了，其實由樓梯上又唔洗一定要原路落去嘅。喺一個轉灣位係有小徑可以落山，不過唔知係咪少人行入口冇乜記認，只要有心留意就會搵到入口。如果唔肯定就原路落啦。
山徑唔難行，沿路行到呢舊方形石就轉過去。
再行多陣就到出口。
出口呢個地方係布力徑配水庫。
之後落去就可以返到布力徑。
一落嚟就係港島徑轉灣位個涼亭，仲有個金馬倫山可以上。不過如果上埋就一定唔可以去到摩星嶺，因為時間同體力都唔夠。所以都係繼續沿布力徑直出灣仔峽好啲。
又望返轉頭，原來話咁快就離開聶高信山咁遠。至於前面呢個維修道閘口係可以行落去中峽配水庫嘅，之後可以再沿小徑行返去黃泥涌峽道。不過應該冇乜人會咁行，亦同今日行程完全無關，只係嗡吓。
有個靚位影吓相。
好，行完條布力徑嚟到灣仔峽。今日本來打算由灣仔峽道落荷蘭徑再上山，不過家陣淨落嚟嘅時間其實已經冇晒選項，要用最短時間去山頂。想走佬嘅可以沿灣仔峽道落灣仔，留意落去條斜路唔係人人都接受到，唔慣跑落斜嘅可能會辛苦過行去山頂?。
繼續去 part3 行竹桯。》》》