延續 Part2 嘅行程，由灣仔峽上山頂再落摩星嶺。由於決定唔落荷蘭徑，時間由唔多夠變成有鬆動，可以 hea少少。
路線：小西灣>黑角徑>黑頭角>龍躍徑>砵甸乍山郊遊徑>砵甸乍山>馬塘坳>港8>大潭峽>柏架山雷逹站>大風坳>港島徑第5段(畢拿山>渣甸山>陽明山莊)>港島徑第4段(布力徑>聶高信山>中峽)>布力徑>灣仔峽>甘道>山頂道>白加道>山頂廣場>柯士甸山道>山頂公園>同樂徑>盧吉道>克頓道>松林廢堡>碧珊徑>薄扶林道>士美非路>堅尼地城配水庫遊樂場>摩星嶺>摩星嶺徑>芝加哥大學校園(炮台遺跡)>域多利道>堅尼地城電車總站
由布力徑出嚟灣仔峽，直望就會見到灣仔峽遊樂場。遊樂場入面有小食亭可以補給，喺佢右邊條馬路就係甘道。
甘道係冇行人路嘅，不過呢條路好少車，同入得嚟啲司機都應該習慣晒啲人喺路邊行，情況就好似白加道咁樣。可以放心由呢到行上去，跟番左上右落就得，安全嘅。
就快行完，出去就係山頂道。
出到嚟山頂道﹐轉左沿行人路行。
好快就會見到右邊嘅白加道入口。
過馬路之後沿路行就可以去到山頂廣場。
沿路有億萬豪宅 view﹐窮人只要行上嚟都有得睇。
正喎，行咗咁遠都仲可以望到柏架山上面個波波，天氣真係好好。差唔多係港島一頭一尾了。
繼續沿白加道行，會經過域多利醫院嘅奠基石，今日睇清楚原來係1897年嗰時整嘅，已經有百幾年歷史。除咗呢個石碑，附近亦係漆咸徑嘅出口，如果先前落荷蘭徑，最後就會由呢到上返嚟白加道。
嚟到白加道嘅盡頭就係山頂纜車嘅白加道站。之後轉個灣上芬梨徑就到山頂廣場。
一場嚟到影張相先啦。纜車站今日冇人排隊，拍烏蠅。
跟住就要上多個山，去山頂公園。呢個應該係全日入面最易上嘅一個山嚟?
經過守衛室又影一張。
好，嚟到山頂公園了，第一時間去小食亭先。
整番枝補吓奶力，枝裝嘅係特別好飲?。
山頂公園都有個類似瞭望臺嘅地方，可以望到對面嘅西高山。不過家陣咁嘅時勢仲迫上去就等於幫自己增加感染機會，加上時間同體力都唔係好夠，都係不了。
係時候繼續行程，由山頂公園後面嘅同樂徑落山。
轉頭又落到嚟盧吉道。
之後過返嚟夏力道，再行前少少。
跟住轉落去克頓道。
沿路落一陣，見到左邊呢條樓梯就行落去。
落完樓梯之後就係松林廢堡燒烤場。
跟住即行前多幾步由樓梯落去。
落到尾轉右。轉左係去薄扶林水塘嘅。未試過咁行，遲啲可能會試吓都唔定。
落嚟之後就再轉左落，繼續落樓梯。
之後會經過中草藥園。繼續沿樓梯落。
落到尾出嚟打個u-turn沿路再行。
行冇耐就會見到右邊呢條樓梯，跟住就轉落去。
落到尾就轉左，沿行人路直去。
行一陣就會出到嚟薄扶林道，之後又再嚟一個u-turn
跟住沿士美菲路嘅行人路落去。
望到跟住要過馬路嘅地方。
其實如果唔想行到落嚟先至過馬路，係可以喺薄扶林道上面過咗先嘅。不過我覺得呢邊啲路會好行啲。
繼續沿行人路落，留意路旁嘅呢個斜坡入口，由呢到行上去。
行到呢到就轉右上去。
登~櫈~行人天橋?。咁樣過馬路夠晒安全啦。不過唔好當佢真係整嚟比你過馬路，過完都仲要擒一擒欄杆先可以出去嘅。
出嚟之後轉右繼續行。
行多陣就會嚟到配水庫遊樂場。
上到嚟就已經見到山頂個天線塔，同時發現多咗條黃色嘢，係地盤圍板嚟喎???
唉?唔係下化，行咗成7粒半鐘嚟到山腰先至衰收尾⁉正當成個人頽晒諗住走嘅時候，見到有個山友由遠處嘅圍板盡頭行出嚟，即時又有番希望?
結果由遠處一個缺口入去，行返轉頭再上維修道，最終都上到嚟山徑入口。我呢個鐘數嚟啲工人收晒工，如果唔係夾硬入嚟實會比人調。再講個工程正正就係攪個斜坡，走入嚟行維修道可能真係會有危險都唔定(需然家陣冇) 。為安全計短期內都係唔好行呢段路住了。
再穿一段崎嶇林路就上到嚟摩星嶺徑。
之後繼續沿小徑上山，呢段路相對地會易行啲。
啲木條好似越嚟越少咁。
好，終於上到嚟摩星嶺，拿拿臨去埋枝標先。
影完就安落了。今日啲山行晒了，係時候落山去海邊睇日落。
西高山頂上面好似仲係企滿人。
一路走人一路影吓相。
呢個厠所有少少陰深嘅感覺。睇個設計似乎係左邊開細右邊開大，如果滿座嗰時應該會呼吸困難?。
其實話晒都係戰時遺跡，做乜要油到佢咁呢。攪到好似成個垃圾站咁。呢個係值得珍惜嘅屎坑嚟。
依？睇嚟捷徑己經重開喇喎。不過今日要沿摩星嶺道落山。
哎吔，遲咗了。睇唔到日落。
行完晒條摩星嶺徑落到嚟域多利道，見到靚靚嘅大學校園。差唔多完成行程目標，最後仲要落去海邊西一西佢。
芝加哥大學校園個平台係開放比公衆嘅，平台下面仲有二戰時期嘅炮台遺跡。行得嚟呢邊就順路可以睇埋佢。
呢個炮台同平時見慣嗰啲就咁一個㘣形地基嗰啲設計好唔同。
相比摩星嶺上面嗰啲炮台，呢個 size 係細好多。
炮台旁邊有祥細介紹，最好係自己嚟慢慢睇了解多啲。
炮台有小徑通去附近嘅遺跡，呢到乜都冇晒淨得個鐵閘。
呢個又幾奇喎，條樓梯又會冧得咁cute。到底係拆淨嘅遺跡定係冧淨嘅遺跡嚟
小徑盡頭有樓梯可以落去海邊涼亭，喺涼亭旁就可以再落海邊。好喇，最後一個目標都完成喇。落到嚟海邊，差唔多係港島最西嘅地方。
開始回程，由海邊行返上嚟大學炮台。炮台係開放到夜晚8點嘅，要影magic可以諗諗。
又返到上嚟域多利道，跟住就一路行返去堅尼地城。
西環泳棚本來係喺今日行程入面嘅，不過已經天黑就落去都無謂。
經過上魔星嶺捷徑入口，應該可以確認兩邊入口都重開了。第時如果要由堅尼地上摩星又可以慳啲時間。
繼續沿域多利道行出嚟，返到嚟市區了。
行過少少嚟到堅尼地城電車總站，今日縱走之旅完成。跟住座電車落去老銅搵嘢食先。
路線記錄
Total climbing: 2552 m
Total time: 09:04:06
發表迴響