繼舊年元旦敗走之後，諗住今年元旦可以再試下挑戰自己完成呢個目標。不過自己少鍛鍊又晏起身(次次都衰呢樣)﹐結果今年仲失敗過舊年。變成超級敗走?。諗清楚其實自己係有啲不切實際嘅，諗住一日可以由東涌出發行完梅窩，大澳再返東涌，超過40km嘅路就算 keep 住均速 4km/h 都要行十粒鐘以上。以元旦嘅日照時間實在冇乜可能完成。下次唯有試下改改路線再挑戰啦。
路線方面今次紀錄咗一少段自己第一次行嘅東梅古道，呢段由東涌市中心行去白芒嘅路唔好行得嚟又冇乜嘢睇，如果唔係有特別目標(例如係全程行山徑)就唔太值得去試。
路線：東涌市中心>東梅古道>奧運徑>梅窩>鳳凰徑第1段>南山>鳳凰徑第2段>双東坳>爛頭營>大東山>鳯凰徑第2段>伯公坳>鳳凰徑第3段(鳳凰山山頂)>昂坪奇趣徑>昂坪廣場>昂坪360救援徑(昂坪棧道)>逸東>東涌市中心
全長：31.93 km
時間：9小時25分
路線概覽
GPX紀錄可以隨便 download
Total climbing: 2649 m
Total time: 09:25:18
座到東涌站由D出口出去。其實出發時已經係九點半，肯定今日完成唔到目標了。
出站之後就過去對面馬路，再沿住富東街行。
轉個灣之後會見到奧運徑個指示牌
之後就沿左邊嘅單車徑繼續向前行。
一直行到嚟呢個橋底，繼續行前少少就會見到入口。
喺前面右邊條樓梯行上去。
樓梯上面遇到一班唔識路嘅山友，問我呢條路係咪奧運徑，可以行去白芒。我答佢話係，又同佢講話我都一樣諗住沿奧運徑行去白芒，仲好老實咁講埋我都係第一次咁樣行，唔識路嘅。。。
由於掛住同班問路嘅山友講嘢唔記得咗影相，用番啲舊相嚟講。上完第一段樓梯之後轉左。
之後再行前少少見到右邊條樓梯就轉上去行。
跟住再沿路行就得。
行到嚟呢樹就過對面繼續。
行過對面條樓梯。
之後又再沿路行。
一直行到見到呢條樓梯，繼續直去。左邊條樓梯上去係可去行到去蓮花山同爛頭營嘅，去白芒都得，不過冇乜理由會咁行法囉。
留意欄杆上面有山友留低嘅指示。
跟住又再沿路行，上下落下咁。
一直行到尾又見到有個閘口。
行出閘口之後係一個渠務處嘅地方，行多兩步發現有啲唔對路。中伏了～
死死地氣行返轉頭，再對下地圖，發現啱啱冇留意先前個閘口對面有另一條唔多起眼嘅路。似係呢條路了。
加埋有冧樹，更加冇人會行入去。
所以話呢條奧運徑管理不善係冇錯嘅，指示又冇，路又唔清楚。淨係喺市中心整啲死人牌喺到，去到入口就乜都冇。估計先前班山友行到嚟到呢到未必會繼續去試行了，佢地冇地圖又冇準備諗住好易行，比市中心奧運徑個牌昆咗去入口就企晒喺到。家陣諗番應該一早提議佢哋返轉頭沿海邊行去白芒仲好。
開以有啲似行山了。
行下行下，前面好似怪怪哋喎。
嘩～我頂你個肺。乜嘢事先？行行下冇咗條路。
其實見到咁我估好多人都會走頭算數，就咁睇好似真係前無去路。不過望下望下見到對面保個護網有啲泥漬，好似係有人行過，一於過去睇下搏一搏。
果然有得繼續行，又過咗一關。
之後落嚟啲路有少少爛，但大至上只得一條路，跟住行就得。
有個位望到飛機起飛喎。
似乎呢條東梅古道已經斷斷續續咁比啲工程打斷晒，冇嘢睇得嚟又唔係咁好行。難怪個個都揀行海邊去白芒。
依，又見返啲石屎路，可能接近行完了。
有個爛鬼牌喺到喎。
見左邊草叢好似有路，不過梗係唔會試啦～ 一於繼續沿樓梯上去
頂，咁鬼長。
依，見到白芒條行人隧道了。
繼續落～
終於都成功到咗白芒。
向白芒村進發。查實呢段路除咗叫奧運徑之外，仲有個朵叫做離島自然歷史徑。
靠右直去。
呢個燒垃圾嘅爐係自然徑入面其中一個景點。
繼續沿路行，雖然有分岔路，但一望就會知邊條路＂似啲＂，好易揀。
嚟到白芒村了。
村口有個第二個古蹟，係一座更樓。介紹牌上話二戰時啲人用過嚟打日本仔架喎。
繼續去梅窩嘅行程，沿條車路行。
前面靠右。
鬼咁大個牌指住去梅窩，實唔會行錯啦～
跟住長長嘅入村車路。
過埋前面個廁所就轉灣。
經過牛牯塱村村口，繼續沿路向前行。
前面望埋去好似係兩條路咁，其實左同右係冇分別嘅。
左邊嘅路係方便比車出入，人行用右邊得喇。
同先前一樣，行左同行右都得。
沿路都有指示牌。
呢到繼續照指示牌方向靠左行。
開始上山了。
沿路上山都冇分岔路，行到見到呢個十字路口就繼續向前行。路邊有指向梅窩嘅指示牌，識字嘅就一定唔會行錯。
有地圖參考，不過係介紹老虎頭郊遊徑嘅。
正當我諗今日冇見到山車友嘅時候，一位車友就喺我後面經過。
好消息，行到見到呢個涼亭即係代表上斜嘅路已經行晒，之後一直去到梅窩都好易行。(壞消息係仲有一座大東同鳯凰等梗你?)
呢到有碌測量柱。
行去測量柱嗰邊可以望到遠處嘅梅窩碼頭。
落山去梅窩嘅路係樓梯嚟嘅，由東涌踩單車嚟嘅車友要推車落去了(山車友例外)。
繼續跟住大路嚟行就得。
呢個路口繼續直去。
沿路轉灣落去，行多幾步就會經過鉛礦洞。
之前經過幾次都係過門不入，今次一於行入去睇下呢個鉛礦洞。
其實咪又係山窿一個，冇乜特別。
離開礦洞，出嚟繼續沿路落。之後大至上只係一條路，跟住行就得。
嚟到見到奧運徑個牌就一個 U-turn 轉落去繼續行。
跟住一直沿住條村路行就得，再唔係開個 google map 出嚟，應該冇乜難度。
沿路會經過呢個古蹟。
呢到繼續直去，留意旁邊其實係有指示牌嘅。
出到嚟呢個路口就轉左。
行前少少轉右就會見到有一條巷仔。
再行出少少就係銀鑛灣海灘。
舊年嚟嘅時候呢條海濱長廊都未整好，今年再嚟有得行了。喺到行感覺唔錯喎。
睇嚟似係整梗單車徑喎，正吖~
繼續沿海邊行，去到熟食市場對面有一間秋記士多，係一個好就腳嘅補給站。
補完水就再出發了。依？事頭婆，做乜你賣比我枝水縮頭嘅？ ?
跟住 part-2 嘅路係行鳯凰徑同棧道嘅相，只作個人紀錄。同埋呢啲咁熱門嘅路線都唔需要多介紹啦。
發表迴響