再戰燕岩上大帽

上星期落雨濕濕跟人行咗一次燕岩，由於跟住一隊人行山影相自由度低，再加上天氣唔好(技術又冇)影相唔靚。所以今個星期見好天就決定要自己再行多一次，順便行遠少少上埋大帽山當做運動

如果只係為咗去竹林隧道影相，可以參考前段路線，到竹林之後就掉頭原路落山走人。

路線：碗窰路(衛徑8段)>元墩下>燕岩(竹林隧道)>麥理浩徑第8段>大帽山道>大帽山雷逹站>麥理浩徑第8段>鉛礦坳>衛奕信徑第7段>菠蘿壩自然教育徑>城門道
全長：17.32 km
時間：5小時14分

路線概覽

由大埔火車站出嚟行去小巴站，座23K去新屋家嘅小巴

新屋家總站離開火車站唔係好遠，座一陣就到。

落車之後就沿住碗窰路向上行

靠右沿路行

繼續行多陣嚟到呢個路口，轉左係衛徑7段，可以行去鉛鑛坳再上大帽山。今日去燕岩就要繼續靠右向元墩下方向行

查實行前少少望下個牌就知點行

呢個路口位置係 W88

行多一陣又有個路口，都係靠右

之後冇分岔路了，繼續沿路行

呢個似乎係元墩下村口

以前啲人修穚整路都興做個番個石碑，元墩下呢到都唔例外。行埋去望下見石碑上面寫住1964年夏天，用嚟修路嘅材料由當時政府送嘅，再加埋其他人捐錢就起咗一條入村嘅路。

繼續沿村路行

路嘅左邊係燕岩溪，望落都幾靚

繼續靠右直行

由呢間生滿草嘅廢屋旁邊繼續去

一直沿村路行都見有街燈，唔通仲有人住喺到？

繼續行多一陣見呢到有幾間屋，有個牌寫住私家重地。睇嚟元墩下村未荒廢晒喎

喺屋旁邊繼續沿路行

繼續沿村路行

行行下見到一間屋

間屋係祠堂嚟嘅，叫做黃氏家祠

祠堂前面係一大塊空地，而繼續上山嘅入口就喺面向祠堂右邊嘅草叢。唔算太隱蔽，就算冇人帶路只要搵一陣就一定搵到。

喺呢到行入去

行入草叢之後行幾步就有分岔路，第一次嚟好容易領嘢揀咗右邊條路。查實呢到要靠左行嘅，右邊行出去會見到啲爛屋同燕岩溪，仲有啲引水道。睇嚟呢到以前係村屋範圍

認住呢個位唔好行錯

過咗第一個分岔路之後嘅路就變得好明顯，只要跟住行就得。

唔好抱住行郊遊徑嘅心態嚟行燕岩，呢到有部分路比較崎嶇，如果潮濕天氣嚟啲生晒青苔嘅石仲會好跣。不過如果平時有行山習慣應該好容易應付到嘅

燕岩呢段路間中會有分岔路，主路係幾明顯，只要望下環境應該唔難分辦到。行錯最多咪返轉頭囉，如果都仲係冇信心就搵人帶路，唔好自己一個嚟行喇

沿路見到呢條黃絲帶就即係話冇行錯路

做乜呢條嘢咁多毛呢下。。。

由祠堂起步大約行半粒鐘就會到竹林。竹林係分開咗兩段嘅，第一段好短行一陣就完。如果只為到此一遊影張相，嚟到呢到都呃到下人。跟住就可以掉頭原路落山走人

離開第一段竹林，要再行一段山路先會到第二段

第二段竹林路長好多，有直路，灣路，上斜都有。影相L嚟到一定會好開心

身處其中感覺真係唔錯

如果攝影技術好啲應該會影得靚好多

行完竹林，喺尾位大舊石上面開飯食午餐。今日輕裝上陣，連麵包都只係得一個

吔完嘢繼續第二段行程上大帽山。由呢到開始上去一直到麥徑大約有250M垂直距離，上到大帽山就有500M垂直距離。上到麥徑唔等於行完可以有車走人，所以最好先衡量一下自己體力同物資(例如水)先決定向上還是掉頭原路落山走人。

上大帽嘅呢段路除咗頭段有一兩個分岔路之外，主路都好明顯易認。靠認絲帶行一陣再對下地圖應該唔會行錯，離開樹林之後就唔洗再搵路。要注意係呢段路有好多欄路蜘蛛，有啲仲幾大隻。如果肓中中行就會撞到成身蜘蛛網(加送蜘蛛)，最好準備一枝棍拎住放喺自已前面行，以防睇漏眼撞網。萬一見到大大個網檔路，可以試下用棍拍網邊樹葉嚟嚇走隻蜘蛛再拆網。如果佢係都唔走就唯有執樹枝輕輕拋埋去中心位(即係隻蜘蛛)到，佢落地之後一定會以極速走佬，唔會再阻住你。如冇必要就唔好趕盡殺絕

離開樹林有開陽景觀，可以望到成個大埔

又行咗半粒鐘，終於行完小徑出到嚟見到麥徑了，行右邊繼續上大帽

忽然發現一隻幾特別嘅小昆蟲急急腳喺我面前走過，梗係影下佢啦

嘩，望下遠處嘅山頂乜鬼都睇唔到。不過一場嚟到，點都要上去打下霧水嘅

啲山友好鐘意同啲石頭作名，唔知呢個有冇名堂呢？比我就會叫佢做”低頭族”喇?

最後一段，就快到山頂了

今日經過以前英軍嘅哨站，行咗入去八掛一下

除咗呢個滅火筒，哨站入面乜都冇

哨站嘅風景唔錯

搏完大霧可以走人了，原路經麥徑落山

轉左繼續落鉛鑛坳

呢段行完了

下面就係鉛礦坳涼亭，係麥徑同衛徑交滙點。有個靚廁可以洗個面，休息一下再決定下站去邊

喺鉛礦坳諗咗一陣，返大埔定落城門好呢？似乎返落碗窰太短癮，不如加段跑水塘啦～結果當然係衰收尾啦，只係跑咗 2km 多啲就開始行了?

嚟到呢個分岔路口靠右直去

行近少少就會見到呢個指示，查實無論行左邊定右邊都可以去到出口小巴站。分別係左邊會行遠好(L)多

行城門水塘梗係要影下呢個地標，查實香港都可以諗下作番個有形啲嘅名呃遊客，叫呢到做白千層並木?

沿車路行，去到見到呢個樓梯口就轉落去。繼續沿車路行都得，不過就會行遠好多(又冇乜嘢睇)

再沿小山徑行多一陣就到出口

行完了，做乜咁多人喺到等小巴。。。。