經過對上一次敗走之後，了解咗終點陣馬山嘅實際情況同落山方法。今次由高尾山出發再試一次縱走陣馬更有把握。其實呢條路線係冇乜大山大水嘅靚風景，加上路程有一定距離，如果只係一心為咗影相睇風景就無謂試了，因為唔多化算。如果係紅葉季節，建議留喺高尾山睇紅葉，影完相趁早落山座車去昭和公園睇銀杏，再唔係去吉祥寺食吓嘢行井の頭公園都得。好好運用寶貴嘅旅行時間。如果只係想體驗一吓喺日本行山，亦可以試行高尾山3號或者4號線，會比較安全。如果有鋪行山癮硬係想試吓，就不妨繼續睇落去。
路線：山上(高尾)>高尾山山頂>紅葉台>一丁平>小仏城山>景信山 >陣馬山>一ノ尾尾根コース>落合>陣馬街道(沢井川)>沢井隧道>藤野駅
全長：20.25km
時間：5小時24分
日期：2018-03-27
路線概覽
今日都算係走長途，梗係要有咁早得咁早。9點鬆啲就嚟到高尾山口站，一般遊客仲未出動，四維都冇乜人。
望吓地圖先，只係望吓。呢個係高尾山地圖，同今日行嘅路線無乜關係。
跟住係清潔時間。都未開始行山，做乜要走嚟洗鞋呢？今日的確係未開始行山，鞋上面啲泥係琴日喺鎌倉行山時黐到嘅。?
嚟到車站又影一張先。
諗住行去山陣馬山，當然係買單程飛啦。其實係可以行上去嘅，可能下次會試吓。
吊椅站一個人都冇。
唔係紅葉季節加上時間早，真係鬼形都冇一隻。
離開車站沿路上山，經過嘅鋪頭全部都冇開，包括呢檔平時勁好生意嘅燒三福丸子。
又再經過呢棵八爪魚杉，好似話N年前啲人開山整路嘅時候，杉樹嘅樹根阻住起梗嘅參道。正當啲人話要鋸嘅時候，棵衫樹就好似聽到啲人講嘢咁，喺一夜之間將自己啲根縮埋一邊，讓咗條路出嚟。捲起咗嘅樹根睇起嚟就好似八爪魚觸鬚咁。?
棵杉樹識得縮埋啲根等人可以繼續開路，咁神奇嘅事好快就傳開，之後開道又再被理解成開運。越嚟越多人嚟祭祀摸同摸佢希望帶嚟好運，終於樹根受感染蛀咗個大窿。為免棵樹再受傷害，啲人就喺隔離用石整咗隻八爪魚比人摸到夠。
唔理係咪會行運，見到佢圓碌碌咁得意都會摸吓佢啦。
查實我今日目的係嚟行山嘅，講完故都係拿拿聲繼續上山頂。轉個頭就行到嚟淨心門。
繼續行嚟到呢個分岔路口，有男坂同女坂兩條路。其實兩條路嘅分別在於一邊要上樓梯，另一邊就行斜路。男左女右，冇女罷就～
既然女坂唔會有女，咁就一於行男坂啦。要行樓梯都唔需要苦瓜乾咁嘅口面嘅?，望吓呢個苦抜け門應一應景先啦。見穿過呢個門口後面仲有一條長樓梯唔知行去邊，如果下次有機會再嚟會行上去睇吓，今日都係先繼續行程。
繼續沿參道上山。
時間太早加上係閒日，沿路啲鋪頭全部都未開。
上到嚟到藥王院了。
難得冇人頭湧湧，要影吓相。
上完又再上。
話晒都叫做高尾山山頂，梗係要係咁上架啦。有咁好行嘅樓梯仲想點～
呢個唔見咗個轉輪嘅？係咪轉得太大力轆走咗？(好似設計上係冇嘅)?
鏡頭一轉上到嚟山頂了。
上到嚟山頂第一件事係要影吓呢碌柱，之後可以四維行吓。呢到地方闊落不特止，連熱辣辣嘅烏東??都有得食架喎。
今日天氣好，見到富士山喎?。
喺山頂廣場嘅另一邊就係今日行山嘅起點，正式出發去陣馬山。
入口有成條路線嘅簡圖同每一段預計時間。呢到嘅預計係5粒鐘，以橫向距離11公理計平均步速係2.2km/h，用呢個均速就算慢慢行影相再加休息都應該夠。之不過唔好唔記得仲要預時間落山喎~ 至於啲紅色字呢，係提醒啲人行呢條路係返唔到去高尾山口嘅。
官方預計去每個中途站需要嘅時間。
起行，一開始係落一段長樓梯。
嚟到分岔路口，有好清?嘅指示牌。就算唔識日文都應該唔會有太大問題，跟住落嚟係繼直去向小仏城山方面進發。
到小仏城山之前係會先經過一丁平呢個地方。
呢條算係易行大眾化路線，沿路有好多休息站同茶屋。不過今日閒日人流就少好多，有啲茶屋直頭就唔開。
人哋啲山路真係整得好靚，跑落去超正。
唔覺唔覺，應該已經過左第一站紅葉台。向一丁平行梗了。
好正，感覺好正。
好，前面有個牌，望吓先。
呢到就係一丁平了。留意呢到啲地圖就知啲日本人好鐘意篤住張地圖嚟睇?。地圖上見到有?標記，可惜沿路行都見唔到有。山上面氣溫比較低，應該係未開了。。。
個牌指住話去展望台喎。
一丁平呢個展望台可以望到富士山，四維仲有啲大草地咁。對我呢外國遊客嚟講可以話係冇乜特別。可能本地人會一家大細喺到舒舒服服咁hea一日都唔定。另外呢。。。個牌寫住有?並木?，可惜時間唔啱睇唔到了。睇?呢樣嘢其實都講運嘅，預到就當好彩。
繼續上路。。。
前地面又有圖睇。
再行多陣就到小仏城山。
每個路口都有地圖指示，非常好。
依～就快到喇喎。
再行多一陣就嚟到小仏城山。
仍然係冇乜人，
呢到可以連接去東海自然步道喎，等我研究吓第時有冇機會試吓行先。
哦，成條路線喺晒到，正喎。
吖，到底呢到應該叫做城山，定係小仏城山呢吓❓
可能因為呢到有另一條小學雞山徑連接上嚟，所以人流比較旺。連間茶屋嘅規模都大好多，好多嘢賣。
喺香港啲人行山好興要kill標，嚟到日本一樣都有得kill標。不過記住唔好做埋啲低能嘢攪到香港人柒出國際呀。
其實嚟到小仏城山，佢?先至係主角。
影飽相，繼續行程向景信山方向行。
又有啲特別嘢睇喎。
原來已經行到嚟呢個叫小仏峠嘅地方。
寫乜Ｑ嘢呢你話佢，X高尾山呀?。。。
唔。。。
呢個特別啲喎，佢哋夜晚嗰時會唔會通山走架呢？
又睇吓地圖先，行去景信山都仲有啲距離喎。
起行，個牌話要行1.2公里。
望番轉頭好似已經離開小仏城山好遠咁。
嚟到景信山，大約完成咗去陣馬一半路程了。
茶屋多的是，只怕你冇錢。
噢～Sor99ly，原來有錢都冇用，冇開。請喺假期再嚟過啦～
日本仔大大枝嗰啲柱唔係用嚟測量嘅，認真地要嚟做三角測量嘅係呢枝細細嘅石柱。
由高尾去陣馬，嚟到景信山大約走咗一半路了。
又再起行，下站係2.7公野外嘅堂所山。
路邊有啲繩，唔係要嚟比你拉住上嘅。係欄住等你唔好亂行遍離官方設定嘅山徑，日本人行山唔好講話爆林開路，就連山徑都要跟足嚟行。去到人家地方就要守人哋規矩，唔係就會變蝗架喇。
之後一連有兩個類似嘅分岔路，同樣係右邊向上行咗邊直去。行完第一個落嚟之後發現冇特別，跟住第二個再行上去，確定又係冇特別。所以嚟到呢到可以慳啲力，行平路算了。
呢到係第二個分岔路，昆你上去但係其實係得個行字冇嘢睇嘅。
跟住再上第三個小山，同之前嗰兩個一樣，都係冇嘢睇嘅。不過見呢個係堂所山，咁就行上去望吓。
先轉右去堂所山，之後先至返轉頭去陣馬。
到了，原來頽到爆炸，除咗條柱之外就乜都冇?。
吖，仲有有一個三角測量柱。
離開堂所山，下站係底沢峠，好近。700米話咁快就到。
沿主路（橙色）行，要去埋堂所山就轉右上斜（啡色），之後可以沿路落番嘅主路，即係家陣企梗嘅位置。
經過一片樹林，有一大排樹比人斬晒。
唔係好知為乜要咁樣斬晒啲樹???。
繼續行又再見到可以落去相模湖駅嘅路口，不過梗係繼續直去陣馬山啦。
仲有2.5公里
到咗底沢峠，距離陣馬仲有2.4公里。
跟住嚟到呢個叫明王峠，有一間好細嘅茶屋喺到。呢個中途站又係一個人都冇。
路口有一間好細嘅荼屋，當然係冇開架啦。附近亦冇乜特別嘢睇，繼續直去。
沿途一直都有路可以行到落去相模湖站，下次真係要考慮搵一條嚟試吓。今次都係照原定計劃繼續直去陣馬山先。
終於都到了。
地標景點，陣馬山隻馬～今次高尾陣馬縦完成✌?
次次嚟都話下次要幫襯佢，但次次都係話下次，今次都唔例外。
舒舒服服咁座喺到食個晏先，今日好有好多family mart飽食。
山頂有個地圖介紹晒陣馬山週邊食同玩嘅地方，不過似乎係啱本地人多啲。正常嘅，呢到都唔算係外國遊客區。
其實我係好想試吓個陣馬soba嘅，等下次啦。
落山路口就喺清水茶屋隔離。
開始落山。
行咗一陣見前面有位女仕吊住個膠袋。將啲垃圾自己帶走，喺日本係正常不過嘅事。就係唔知點解喺香港行山嘅人硬係咁簡單嘅事都做唔到。
落山嘅路好闊好易行，冇耐就會見到第一個分岔路口。和田同落合其實係由同一條陣馬街道連接，唔想行咁遠嘅可以轉去落合座巴士。之後架車一樣會經過落合返去藤野。不過到底架巴士要等幾耐我唔知，亦冇打算去試。每次都係靠左行去落合。
今次沿路落山見到有好多樹都比人鋸咗。
勇往直前～
跟住經過一個避雨亭。
繼續直去～
唔好理佢，繼續直去落合方向就啱喇。
最後一個分岔路口，我每次都係行右邊落去，不過我估應該行左邊都係一樣嘅。如果下次再有機會行呢段路會轉左試吓。
又紅又黃幾特別，不過我都係想睇櫻花多啲。
繼續沿山路出去，開始見到啲民居。
行完了，見到出口。
山徑出口有一棵好大嘅櫻花樹，可惜仲未開花。
之後沿路落山。
行番落去前面嘅民居。
行到出路口就轉右。
跟住再喺前面呢個路口轉左。
路口有指示牌，去藤野站要行2公里，好近唧。
原來登山口有個大石碑架喎。
之後沿行人路行出去。
行咗成日終於都睇到櫻花了～好鬼靚啊～呢到其實係人家嘅後花園，喺街邊行過就望到。
再行多一段行人路就冇咗，要沿馬路邊行。呢到好少車，沿路邊行就得。
之後會幾過呢個澤井川嘅地方，好鬼靚喎。
繼續行嚟到呢個路口，要靠右行。行入去一條似係公路嘅地方。
正當有少少猶豫係咪真係可以行嘅時候，見到呢個牌就知道可以放心繼續行了。
沿住馬路邊行上去，唔洗驚比車車死架喎。
條馬路一來冇乜車，二來以日本人嘅駕駛態度，係絕對可以放心喺路邊行嘅。
行到路嘅盡頭係一條隊道嘅入口。
呢個路牌係話隧道入面係有行人路嘅，可以放心咁行入去。同時都代表咗沿馬路行上嚟係冇問題嘅，因為佢預咗啲市民會咁行。
穿隧道出去。
出嚟之後繼續沿路邊向前行多一陣。
過咗路軌之後轉右。
再行前少少就係車站。
對面個山好得意喎，有封情信喺到。又記錄在案先，睇吓第時有冇機會行近啲睇吓。
嚟到終點藤野駅，可以座車返出去市區濕平了。
行程準備
今日行嘅路線難度唔高但有一定長度，要肯定自己體力行到先至好去，千祈唔好麻煩到其他人。如果有行開山嘅，參考完 gpx 記錄理應可以輕易評估到自己有冇能力行呢20公里，同以自己腳程所需要嘅時間。如果唔知，其實就唔應該去喇，香港值得去行嘅山多的是，無乜必要去到咁遠。地圖方面可以參考藤野觀光協會嘅路線圖，行嘅時候留意住每一個大地標嘅出現次序就可以。主路好清晰，每個路口都有指示，就算唔識日文，認漢字都夠照。唔好偏離主路同改路線應該會十分安全。注意喺秋冬季節日本日照時間短，盡量計劃以16:00為完成時間，確保自己喺日落前有足夠時間落山。
藤野<>陣馬山登山路線 (藤野観光協会官方網站)
http://info-fujino.com/hiking/224.html#more-224
如果覺得呢張地圖太流想要一張好少少嘅實體地圖，去可去書局到買。昭文社呢款好多日本書店都有得賣，可能連SOGO都有。
路線記錄
Total climbing: 1080 m
Total time: 05:23:46
發表迴響