行山最好就係可以交通方便時又多嘢睇，所以今次搵咗條一出地鐵站就已經係起點嘅路線。一條龍咁行晒京都東面幾個熱門賞櫻地點同寺廟，重點當然係可以行上山睇風景啦。目標係五山送火入面其中一座大文字山，即係啲日本仔每年唔知為乜事火燒山嘅地方。唔知乜春嘢係大文字？可以先了解下京都五山送り火再考慮去唔去行
路線：蹴上>南禪寺>永觀堂>若王子神社>八重墓所(回頭返若王子神社)>哲學之道>銀閣寺(前)>八神社>千人塚>大文字火床>大文字山>京都一周徑>七福思案處>南禪寺奧之院>南禪寺風呂山町>南禪寺水路閣>疏水分線>蹴上
全長：12.68 km
時間：7小時13分
其實今次行程同自己預計有啲出入，本來冇諗住去平安神宮，見啲櫻花靚就行咗過去。原先諗住以反時針方向由哲學之道上大文字山再落銀閣寺，結果又因為搵唔到路變成由銀閣上山順時針方向咁行返蹴上。雖然總共行咗七粒鐘，但實際喺山上走動嘅時間唔超過三粒鐘。如果只係諗住由銀閣來回火床，應該粒半鐘就夠。仲可以算係行個短山嘅
GPS 路線紀錄(已經刪剪行平安神宮部分)
Total climbing: 704 m
Total time: 07:13:04
由京都站落地鐵烏丸線，座三個站去到烏丸御池，轉東西線再座多四個站就到蹴上，全程唔洗20分鐘。出閘後喺 1 號出口出嚟跟住轉右沿路行就得。櫻花季節嚟一定有大把遊客，唔洗用腦跟住行就得
交通方便加上風景靚，蹴上嘅傾斜路軌係賞櫻熱點。一早就已經有好多人
沿行人路行一陣就會見到呢個隧道口，上面就係傾斜路軌。喺呢到會見到京都一周徑嘅標距柱 30-2
穿過呢條咁特別嘅紅磚隧道就會去到路軌旁嘅公園仔，有樓梯上去傾斜路軌。
呢條傾斜路軌係以前水路運輸系統嘅一部分，話說以前啲人經水路由滋賀運嘢嚟京都，嚟到蹴上因為地勢高低問題船行唔到。於是啲日本仔就整咗條傾斜路軌出嚟抬隻船上拖車行完斜路再落水。
好多遊客去到蹴上行完路軌都會順路行埋南襌寺，永觀堂，哲學之道再去尾站銀閣寺。轉來轉去大約有 3km 嘅路，只要有個 google map 就一定識得行。如果諗住要入埋寺睇嘢就至少要預多兩粒鐘時間囉。沿蹴上路軌行到尾去到呢個路口(認住條石柱)，轉左入去再行一段大直路就到南禪寺。
南禪寺門口左邊有條車路，只要沿住條車路旁邊一直行(唔會比?車死嘅)就會去到永觀堂正門，繼續直行去到呢個路口見到哲學之道指示牌就轉右，照指示方向繼續直行就會去行哲學之道。跟住喺路口會見到去若王子神社嘅指示牌。繼續行係領嘢路線，除非有特別興趣想睇墓園，否則可以慳番唔行直接入哲學之道
鏡頭一轉嚟到山邊。呢到係若王子神社後山嘅墓園，話說我除咗參考京都一周徑嘅路線之外仲參考咗另外兩本行山書。其中一本書介紹由哲學之道起點旁嘅若王子神社開始上山，再經新島襄八重墓所上大文字山頂落銀閣寺。可惜我行過咗八重墓之後搵來搵去都見唔到繼續上山嘅路，沿山徑繼續行方向又唔啱，再加上條路似乎唔多人行(日光日白都有蜘蛛絲)。決定放棄由原路落山返哲學之道。順帶一提，八重墓安葬咗一位對日本歷史有重要影響嘅人。見有好多日本人都尊登行上山去呢個墓園，不過我冇乜興趣去深究日本人嘅歷史，當係去咗個另類旅遊景點算了
返到嚟勁多人嘅?哲學之道?，沿路行去銀閣寺。呢段路開滿櫻花時好鬼靚，係京都賞櫻必到嘅景點?。
行完長長嘅哲學之道就嚟到銀閣寺前，食番杯雪榚先
食完雪榚，由銀閣寺前沿路行去銀閣寺正門，然後再轉左沿路直行就會見到八神社。留意右邊有個路口，轉右行上去。行多一陣就會見到好似係學校嘅閘口，轉右(唔入閘)再行多一陣就會嚟到上山嘅入口。聽起來好似好複雜，當你身處其中再望住個 google map 就會發現其實係好容易搵到
(update @ 20180325 補上入口路段指示)
喺銀閣寺入口前轉左
再沿路行前少少
跟住再轉右
然後繼續靠左行
跟住又再轉番右
之後一條路跟住行就上到山
估唔到呢邊上山條路好靚好易行，好似行梗家樂徑咁
行前少少見到有個牌寫住大文字山，今次實冇衰了，可以放心跟住行
似乎呢到成個山頭都係保護區嚟
啲路好易行又冇分岔，就咁跟住條路行就得
行多一陣見到第二個牌，我估大致上係話管理局為咗令山上樹木種類平衡，會喺呢個山林區到做啲人為干預，斬走部份常綠樹去制做一個對其他樹種有利嘅生長環境。銀閣寺作為世界遺產，唔只係簡簡單單保育一間寺廟，連佢周邊嘅環境包括寺後面呢個林區都會細心照顧到
過咗個牌再行前少少就會經過呢個叫千人塚嘅地方，查一下資料發現好似係埋葬二戰時喺戰壕搵到嘅’死難者’。即時冇乜興趣再考究落去
另一個介紹大文字山嘅牌
今次呢個牌有英文喎，終於唔洗靠估了
日本同香港一樣，有告示叫人將自己嘅圾垃自己帶走。同香港唔同嘅係日本人真係做到，行完全程都冇見到有垃圾
大文字山大約高450M，淨係上去火床都有300M。所以要有合理預期有一定嘅上山路段。不過如果平日有行山習慣，應該好容易應付到(平時都唔行山嘅應該唔會等旅行先至嚟行山掛？)
靚靚長樓梯，好易行。上完呢段就差唔多到火床了
長樓梯旁邊刻住昭和四年，即係西曆嘅1929年
繼續上，就快到了
到咗大文字光床了。呢到係個＂大＂字打橫嗰一畫，淨係呢一畫就已經有 80 米濶。唔同山上面火床嘅設計都有唔同，官方網站有圖文並茂嘅詳細介紹，仲會教埋你邊到係睇火燒山嘅靚位。
呢個十字形嘅火床係呢到地標，亦係五山送火入面唯一一個特別叫做金尾嘅點火位置，點火時會放特別多嘅木落去燒。
呢個’大’字實在太大，想話影佢都唔容易。用部 theta 舉到高一高嚟影又古古怪怪，色水又係奇奇怪怪(應該係人嘅問題)
呢個唔知係乜嚟呢？我估唔會係墳墓掛
除咗睇火床，原來呢到仲係一個可以睇晒成個京都全景嘅好地方。當時我只係覺得呢到個 view 好靚，直到返屋企放大張相時先至發現可以對住張地圖慢慢搵下自己去過嘅地方(十分過癮)，可以話係意外收穫。如果有興趣上山不妨帶一個輕便望遠鏡，上嚟座低慢慢睇。由右邊開始可以見到法同妙兩個山，過少少就係船形山。再過啲就係左大文字山，即係去金閣寺時望上山見到嗰個大字山坡。至於最後一個鳥居形山，唔知係太遠定係方向問題，搵唔到了。相嘅最左邊就係京都塔(按圖放大)
以前一直都諗唔通，明明地圖上有六座山畫咗字同圖案，點解會話係五山送火呢？今次返嚟認真搵下資料，原來妙同埋法係加埋當一座計嘅，咁就啱數囉。最近嘅呢座法字山好容易就認到
參照地圖同座向我肯定呢個就係妙山，不過點睇我都睇唔到個妙字出嚟
呢個就係船形山
老遠呢個就係左大文字山，由於方向問題只係見到半個大字。
京都塔雖然離開好遠，但呢個外形好容易就認得到。
如果只係為咗睇風景，實在冇必要繼續由火床上山頂。建議原路落山返銀閣，因為山頂嘅景觀唔會比火床好，途中亦冇乜特別嘢睇。如果諗住登頂或者係行另一邊落山，可以沿住火床邊嘅樓梯繼續上。注意之後嘅路就唔會好似上火床時鋪得咁靚
繼續上，冇分岔路
唔洗行好耐就會上到去大文字山山頂，呢到真係冇乜嘢睇。
四維行下，發現地下有類似香港嗰啲測量點
山頂另一邊有一大片樹林，啲樹好高。對於我呢啲見識少嘅大鄉里嚟講實在係好震撼
另外一碌測量柱，對照行山地圖準確標高係 465.4M
早前上山時搵唔到路衰咗，本來打算落山時穩穩陣陣原路走人，但係上到嚟山頂見到落山嘅山徑好明顯，又轉軚決定照原定計劃(但反方向)行。落山路段會連接到’京都一周徑’，再經向日大神宮去蹴上。
沿一周徑落山途中會經過好多分岔路口，全部都會有標柱指示。柱上面有簡圖方向指示，標柱號碼好容易就可以對應一周徑地圖上嘅位置。只要有地圖喺手沿徑行就好安全唔怕會蕩失。相比香港啲膠遊徑只係硬性以橫向距離做標點，呢到嘅做法對行山人仕就有用(友善)得多了。
雖然山徑指示做得好好(亦應該冇乜危險)，不過為安全計一定要買咗地圖先至好嚟行。如果準備不足，最好都係原路落山返銀閣寺。長氣啲講，始終係人生路不熟，語言又唔通。旅行求開心，無必要為自己同其他人制做麻煩
行行下到咗一個比較大嘅分岔路口，有個指住去南禪寺，不過佢甩頭甩骨唔知指咗去邊L到。可以肯定山科唔係我要去嘅地方，即係反方向就冇衰
對住呢個路口真係呆咗一呆，唔知應該行邊條路好。好彩見到枝39號標距柱，確定呢到就係七福思案處就鬆一口氣(唔明點解一個冇乜特別嘅分岔路口要叫個咁嘅名)。本來諗住去日向大神宮，但又唔知自己當時黐乜嘢線揀咗去南禪寺嘅路(有少少後悔)。建議揀’日‘字路口前進，嗰到係一周徑沿路會有38 > 33-3 > 33-2 > 33-1 > 32 > 31 標距柱，應該可以喺冇乜驚嚇嘅情況之下返到蹴上。如果好似我咁揀行南禪寺條路，要準備冇標距柱可以參考。
再經過一段比輕崎嶇嘅落山路段，最後嚟到呢個叫南禪寺奧之院嘅地方。附近好靜，一個人都冇。
咁鬼長嘅石級，梗係少人會行上嚟啦。不過我向落行就冇乜所謂
好嘢～安全到步。終於回到繁華嘅地方，前面直行轉左。
沿路行出去，旁邊呢條咁有特色類似橋嘅物體其實係一條水道嚟嘅，叫做水路閣。
有個牌介紹呢條長93.17米嘅水路建築歷史，同傾斜路軌一樣係琵琶湖疏水建築群一部分，已經成為咗古跡
水道閣旁邊有條樓梯上去，之後沿水道一直行到最尾(幾長嘅)就可以返到去蹴上路軌
再一次返到嚟蹴上路軌，天氣比今朝好咗好多。太陽光照射之下啲櫻花靚到硨硨聲，可以狂影相了
今日打圈之旅完成，不過行程未完。下一站係行過去知恩院?
行程準備
今次行程有啲蝦碌，但其實早喺舊年我就已經買咗地圖同行山書嚟研究(當時仲未知可以行大文字山)。預定好路線之後就等到今次再嚟京都去試行，並唔係冇做功課就肓中中去行嘅。喺一個人生路不熟嘅地方行山，加上言語不通，就算係簡單嘅路線亦不宜掉以輕心。做足準備好啲。行山時如果冇尊門嘅 GPS 地圖裝備(garmin之類)，都要搵一部可靠嘅電話開個 runkeeper 嚟紀錄路線。喺最壞情況之下可以睇住自己啱啱行過嘅路線紀錄原路返回起點。
如果有興趣去京都行山或者係了想解一下山上面有啲乜嘢睇，只要去京都火車站入面嘅觀光案內所就可以買到京都一周徑(京都一周トレイル)嘅地圖。如果嫌京都站唔就腳，其他地方(包括東京)都有得賣嘅。
一周嘅意思係圍住京都行一個大圈嘅路線，行山地圖按地域分成五張，有東山，北山(東)，北山(西)，西山同埋京北。大文字山屬於東山部分，而西山包括嵐山一帶地區，所以東山同西山呢兩張可以話係必買嘅。北山冇乜特別吸引，可買可唔買。至於京北係冇雷公咁遠嘅地方，可以慳番。
最後想講，我提供參考嘅link好多都係日文版。我唔係要扮勁識睇日文，查實我都唔識嘅。不過我地識中文可以靠睇漢字估估下，見到啲日文字又可以住形狀嚟認字，睇地圖或者指示時會方便過睇英文版好多。再講，好多資料只有日文版本先有。估下估下都好過連資料都冇吖嘛
發表迴響