去棚仔

今日去咗深水埗臨時布市場(棚仔)，如果唔係朋友話呢到好快要拆想去影相，我都唔知原來有個咁嘅地方。冇法啦，塊地咁靚冇乜可能唔用嚟起樓賣錢。希望唔係齋起豪宅就好了

一心諗住培朋友去冇諗住認真影，所以拎咗部乜都要靠估嘅packversal去玩。結果唔覺唔影咗好多張

除咗賣布之外，似乎呢到仲有裁縫幫人客做衫。聽一位好健談嘅檔主講話，有客人遠道由加拿大帶兩個figure公仔嚟比佢度身訂做一批公仔衫拎返去賣。呢個地方唔知仲隱藏咗幾多嘢呢?唔知仲會唔會有機會趁落閘之前跟個導賞團行一轉呢。。。

呢到似布倉多過市場，有唔少檔位一個人都冇(已經搬走?)。有部分用張紙皮寫住檔主電話，想買布就打。有個仲好笑叫人大叫，睇嚟佢地都好放心可以＂行開行埋＂

眼見呢到仲有好多人嚟買布，而檔主亦忙於工作。由舊年宣佈要拆以嚟可能已經有唔少我呢類攪攪陣冇幫襯嘅人嚟影相，佢地都已經習慣晒，好少理。