鎌倉係繼京都之後我最鐘意嘅地方，離開東京市區大約一個鐘頭車程，唔算好遠。唔想山長水遠落京都行寺廟，去鎌倉都係一個好選擇。

今次行呢條算係熱門嘅小學雞路線，短程得嚟又多嘢睇。由北鎌倉站出發途經寺廟，公園同神社(仲有墳墓)直到終點長谷寺睇日本國寶鎌倉大彿，算係行程豐富。沿途唔會遇到大大聲講嘢嘅遊客，可以舒舒服服享受行山?。

路線：北鎌倉>円覚寺>浄智寺>天柱峰>葛原岡神社>銭洗弁財天>鎌倉大仏殿高徳院
時間：2小時24分
全長：5.41km

路線概覧(按圖放大)
image

Total distance: 5521 m
Total climbing: 221 m
Total time: 02:23:35
Download file: kamakura_gpx _2016-12-04_0121.gpx

起點係 JR 北鎌倉站，一落車就已經人頭湧湧要排隊出閘。眼見當中有唔少人都係一身行山裝束，呢到似乎係一個幾受當地人喜歡嘅行山熱點。留意頭頂個指示牌，如果只係嚟行山其實係可以直接橫過路軌由右邊嘅西口出去嘅(觀察所得，全部行山嘅都係由西口出)。
image

之不過我之前計劃咗要先去円覚寺，就照原定路線由東口出向第一個目標進發。
image

沿住火車路軌旁邊一直向前行
image

唔知呢啲係咪叫做鼠尾草呢？路軌，草再加埋啲屋感覺好正(只係我技術唔好影唔到出嚟)。
image

行多兩步就嚟到円覚寺。淨係睇個門口都知呢到啲紅葉唔嘢少，靚到砰砰聲
image

見到咁多人排隊就知入面實有靚景。但係咁鬼多人，加上我今日一心諗住行山，擔心自己入咗去會掛住影相用晒啲時間。最後決定都係要預留多啲時間(係超級足夠)嚟慢慢行下山好啲。等下次有機會再嚟先至入去影到夠
image

離開円覚繼續沿住火車軌旁邊向前行
image

行行下遇到一隊人，見部分人拎住行山杖，估計係本地行山團了(休閒嗰隻)。唔知佢地會行去邊呢？
image

再沿路行多一陣就會見到火車軌過路閘口，呢個時候要轉右横過路軌，之後再沿路軌向另一邊返方向行(即係返北鎌倉)。
image

路口有地圖指示，目標係要去浄智寺旁邊嘅小徑。其實如果唔去円覚寺係可以一早喺北鎌倉入面横過路軌由西口出嘅。不過兩條路實際上唔差好遠，西口出唔會快得好多。
image

沿住路軌旁邊行。
image

入口係對面馬路一條巷仔，只要留意住左手邊就好易見到。
image

過馬路之後就見到指示牌，跟住要去嘅葛原岡神社，源氏山公園同高德院都係同一個方向。
image

嚟到浄智寺入口石橋，見到有人喺到寫生。
image

呢個位又確係幾靚嘅。
image

入口旁邊有個牌介紹浄智寺，話係鎌倉五山入面排第四。咁其實鎌倉五山係乜嚟架呢？原來係以前幕府參照中國彿教制度去管理寺院嘅安排，寺院主持由幕府委派(咁咪好似教庭委任主教咁囉？) 。又原來中國彿教制度除咗五山，仲有十剎。彿教嘅嘢我真係完全唔識，日本人嘅古史更加係識條鐵。如果有有興趣深度遊日本同研究，不妨自己上網搵下資料。如果發現我有乜講錯請多多提點。
image

浄智寺入口附近風景都唔錯，有機會嘅話下次會入去行下。
image

喺寺嘅旁邊有條車路，沿住行多一陣就會到山徑入口
image

image

起步
image

image

image

image

行咗一陣就嚟到一個叫天柱峰嘅山頭
image

有個石塔上面放咗好多銀仔，我估都係啲人用嚟求好運之類啦。
image

頭段大致上只係得一條路，沿路亦有路牌指示，只要睇住自己下一個目標葛原岡神社的嚟行就得。
image

image

image

image

呢樹落完樓梯就轉左繼續沿路行
image

image

image

行下行下見到前面有好靚嘅銀杏樹，原來已經到咗葛原岡神社。又嚟下見學時間先，有傳呢個地方喺鎌倉時代係一個刑場，日野俊基就係喺呢到被處決嘅。話說佢係效忠當時天皇嘅忠臣，為推翻鎌倉幕府做事。後來策動倒幕計劃敗露比人捉咗囚禁喺呢到，佢最終都唔可以親眼睇到幕府倒台。而幕府政權就係喺佢死後大約一年被推翻，後來啲人為咗紀念佢就起咗呢個神社。
image

呢到有個公園仔，可以座喺銀杏樹下休息，感覺好舒服～
image

真係好靚囉～
image

呢到係葛原岡神社入口嘅石鳥居，襯埋後面幾棵銀杏樹一齊都幾鬼架靚喎。
image

神社入口旁邊有個壇，中間有舊大石頭。初時以為係地藏之類嘅嘢，睇清楚原來係新嘢嚟。照佢英文介紹所講只要係瓦碟上面寫咗你想去除嘅衰嘢，再一野飛埋去舊石到，咁就可以同問題講 bye bye?。吖，掉一塊一百円，咁我冇一千幾百都落唔到樓喎。。。。
image

見呢位人兄搏晒老命咁掉隻碟埋去，會唔會係祈求以後都唔再踩?呢？
image

睇完人掟野行去另一邊，今次呢個比較常見。唔知點解去親啲神社都會有呢類結緣壇，我估可能係要迎合市場需要啦。咁男石上面啲紅線多過女石咁多又代表咗乜嘢呢？原來有個網站話呢個結緣石好受當地啲女仔歡迎，唉～伸笨了?。早知係咁就企喺到等運到啦～
image

有神社，公園加埋嘢食就啱晒。不過唔好諗住會好似高尾咁多選擇，呢到只係得一檔燒丸子?。仲排晒長龍添
image

忽然聽到附近傳嚟笛聲，我咁八掛梗係即時走埋去睇下發生乜事。見到有一班人齊齊整整跟住和尚祭司行，仲有人係旁邊負責影相同拍片，唔知係咪乜嘢祭祀活動呢？見到特別嘢梗係慌死蝕扺影埋一分啦。。。
image

見班人越行越近，開始發現唔對路了。其中有一個目無表情嘅人拎住個＂神主牌＂，段估都唔會係喜事或者係一般祭神活動，即時放低手機尷尬地走人。後來見佢地成班人行咗去日野俊基墓嗰邊做儀式，唔知呢位＂主角＂係咪同日野有啲關係嘅呢？無謂深究，當係見識過一次比較另類嘅日本文化活動算了。
image

繼續喺神社附近四維行下，都唔難發現靚紅葉。
image

依？行行下有個位話可以見到富士山喎，但係我望嚟望去都唔多覺。一定係我啲雞肓又發作了?。。。
image

我估一般人嚟到葛原岡神社都會去埋附近嘅源氏山公園，不過我實在對日本啲歷史人物冇太大興趣，如果之後再嚟日本睇櫻花或者會去行下都唔定。今次一於 skip 咗佢。
image

好喇，轉右向大彿進發
image

話咁快就行到嚟呢個路口。去大彿係要轉右，但係我想先去洗一洗錢，所以轉左。
image

個牌寫得好清楚
image

一轉完個灣又有影相位，如果唔趕時間座喺啲樹下面睇下紅葉 hea 下都唔錯。
image

image

鬼咁大個牌指你落去
image

落完一段大斜路，見到入口了。
image

入口係個大山洞，幾特別架～
image

穿過山洞第一樣見到嘅嘢係一排商店。
image

另一邊山洞就係洗錢嘅地方
image

聽講話用呢到啲水洗過嘅錢用咗之後會以倍數咁返到自己手?，咁著數難怪個個都喺到狂洗。
image

見有唔少人都將自己銀包入面所有錢都拎晒出嚟洗，忽然之間(好低能地)諗，唔知會唔會有人拎啲水返屋企洗頭嘅呢？?
image

洗完錢就原路行番上山。
image

上完樓梯，照指示轉左。
image

跟住呢一段路都係石屎車路嚟，會幾過啲民居。感覺有少少似行衛徑行行下山徑入咗馬油塘村咁。
image

image

呢到可能係全程唯一一個有機會行錯嘅路口，其實行前多兩步就會留意到有指示牌。除非係發雞肓，如果唔係應該都好難會唔識路。
image

轉咗個灣就繼續沿路行
image

呢到幾靚喎，可惜部爛鬼電話大逆光 fog 晒鏡。
image

終於又有番啲山路行下了
image

呢到靠右上樓梯，路中心有指示牌。今次跟指示係向大仏方向行。
image

又有指示牌，距離目的地仲有 1 公里路程。
image

image

image

基本上今日全程啲路都好易行，唯獨喺嚟到最尾比較崎嶇。平時有行山習慣嘅呢啲路算係普通不過，但如果喺香港都唔會行山嚟到又想試行，就要自己衡量一下風險。同時要認真諗下為乜要等去到一個陌生環境先至嚟親近大自然了。
image

image

行到前面條樓梯就轉右落去。如果諗住逆走今日呢條路線，就要留意唔好錯過咗呢個入口。
image

image

所有山路都行完了，路程接近完成。落完樓梯跟住沿行人路繼續向前行。
image

再行大約行多5分鐘就到。
image

行到嚟呢個咁多人嘅街口就即係已經到逹目的地高德院了。認住呢個路口，陣間行完出番嚟沿住馬路直行就可以去到江電長谷站。
image

吖，以前去啲寺院見得最多係話唔比用三腳架同自拍神棍。家陣多咗一樣新嘢就係唔比玩 pokemon ?
image

高德院呢樹啲紅葉大部分都已經落晒，唯獨係一入嚟門口呢個位仲係幾靚。呃得下人喎～
image

鎌倉大彿

一場嚟到，行貨都要影番一張大彿相嘅。影完就可以走人再搵下有乜地方好去了。

今日行山之旅完成～～

朋友同事成日都話我淨係識去東京悶唔悶，其實淨係東京我都有數唔出咁多地方未去過。嘥錢？可能對好多人嚟講，用寶貴嘅旅行時間嚟行山，又唔係為咗乜嘢大山大景係既戇居又浪費。只係大家對去旅行嘅價值觀唔同，就包容一下我啦～ 何況日本都唔係淨係得一個富士山嘅，我能力唔夠(又怕凍)未搵啲小學雞路線嚟行下囉。我又唔係要証明啲乜嘢，唔駛挑戰難度喎。返到嚟香港搵下資料寫下 blog 又可以延續旅行時嘅樂趣，幾好吖。(發癲完畢)