去鎌倉行個短山－天園行山徑

今次日本之旅一落機就去咗行山，但喺唔夠瞓嘅情況之下體力消耗唔可以太大。去鎌倉就啱晒喇，因為有一粒鐘車程可以急叉體力(瞓) 吖嘛~

其實鎌倉一共有三條簡單嘅行山徑，除咗舊年去過嘅大佛行山徑，仲有一條叫天園嘅行山徑。天園徑風景位唔多，路程又比大佛徑長。諗住影靚相可能會有啲失望 。不過如果係為咗感受一吓喺日本行山，呢條路線就絕對值得考慮喇。因為環境清靜又舒服，難度亦唔高。山友夠晒禮讓，冇人大聲講嘢，冇人開大個啦叭聽歌，冇垃圾，連遊客都唔多覺有。。。

路線：北鎌倉>建長寺>半僧坊>十王岩>薬師如来像>今泉台六丁目公園>大平山>天園>瑞泉寺(入口)>鶴岡八幡宮>鎌倉

全長：9.21 km
時間：3小時20分
日期: 2017-11-24

作為遊客去行天園，最方便嘅方法係由建長寺入面嘅半僧坊上山。不過建長寺本身都唔近車站，離開最近嘅北鎌倉站(JR)有大約1公里距離。話遠唔遠，相信一般遊客都會選擇由車站行過去嘅。喺北鎌倉站東口出站之後一直沿路軌旁邊向前行就得了。

好快就經過円覚寺，見到門口啲紅葉好靚。記得舊年同自己講過話如果下次再嚟要入去睇下，今年行完之後可以再同自己講以後都唔需要會再嚟了，因為最靚靚嘅紅葉唔係喺寺入面，喺門口已經睇晒。如果一心諗住嚟行山，可以慳番啲錢同時間，出站之後直接行去建長寺

離開円覚寺，繼續沿火車軌旁邊嘅馬路行(留意呢條其實係人車共用嘅路嚟)

路邊有地圖指示北鎌倉站附近嘅寺廟，好容易就搵可以到建長寺嘅位置。

地圖上有標示天園行山徑，仲有日英對照。

嚟到呢個路口，馬路同火車軌分道揚鑣。人跟車行，繼續沿馬路直去

跟住一直沿路邊行人路直去就得，有唔少人都係咁樣行去建長寺嘅，唔識就照跟啦～

大約行15分鐘就嚟到入口

跟住就係指定動作，比錢入場。500円 ?

比咗錢入場四維遊盪下，建長寺面積唔細，好在指示都算充足。路邊有去唔同地方嘅指示，其中一個就係天園行山徑。

其實半僧坊，勝上嶽展望台，天園山徑都係同一個地方，跟指示牌方向行到尾

跟住呢到要轉右，路邊都有指示牌

跟住就繼續沿路行

吖，呢位乜水呢？

行多陣就嚟到呢個叫半僧坊嘅地方

跟住係長長嘅樓梯。

如果啱”時間”，呢到啲紅葉係幾靚嘅。

呢到個石屎欄杆刻滿納奉人啲名。

起初矇查查以為呢個係附近山徑地圖，再睇清楚啲查實佢個比例大到無鄰。。。錯誤地當梗自己行梗香港啲郊遊徑，會有個地圖指住你的位置?

呢個大石刻住啲乜呢

繼續再上，感覺有少少似行梗高尾藥王咁。

小山坡上面企咗好多唔同做形嘅天狗，幾特別架喎。

上到嚟有一個叫富士見台，嚟過幾次，冇一次係可以見到座富士山。見好多人都係行出去望兩望，跟住就掉頭走人。

可能係太遠好細粒，或者係太多雲，定係我望錯咗方向呢。。。總之係睇唔到。

到底佢係咪用咗枝超級長炮，加上極好嘅天氣先至影到一張咁嘅相呢？

查實天狗是咪天使啲fd❓?

繼續行程，留意路旁有個指示牌。目的地係瑞泉寺，預計時間係兩粒鐘

離開遊客區，啲路開始有少少似番行山了。呢到上去就係勝上嶽展望台，而另一邊就係山徑入口。

照住瑞泉寺方向行

冇枝路亦冇爛路，清清靜靜好鬼relax咁行山

行下行下，路邊有塊寫住十皇岩嘅石碑。當時附近見唔到有乜嘢特別，9衝就行過咗。返嚟再搵下資料，原來先前喺路邊見到嗰幾個分唔到係乜嘅石刻，每個都有自己名堂(等我仲連相都冇影?)。當中有閻魔大王，地獄谷，仲有詭異嘅怨靈叫聲。。。如果下次可以喺出發之前做埋沿途景點嘅資料搜集就唔會錯過了，不過都係講住先啦～

行多陣又見到另一個寫住覺園寺嘅石碑。

依，前面好似又有嘢睇咁喎。。。

有幾個人仔好開心咁喺到爬上爬落，佢哋後面就有個石像。為咗唔打擾佢哋興致，離遠影張相就算。返嚟上網搵料先至知原來呢個叫做薬師如来像，不過背後又有乜嘢故事就唔知道了。

喺如來像嘅小山坡下面有個山窿，入面有幾個唔知係墳墓定係佛像嘅物體。之後沿路都見到唔少類似嘅嘢(五輪塔咁嘅樣) ，估計佢係山墳所以冇再影。其實喺香港行山不時都會見到山墳，見怪不怪。但喺日本行山見到呢啲都唔係好識分，難免會八八掛掛，有時都唔知會唔會影咗啲唔應該影嘅嘢?。

繼續行程，嚟到前面呢個十字路口。

有指示牌，行前少少睇下先

呢到應該就係地圖上寫住百八やぐら嘅地方。轉右可以去到覺園寺，頭先見到嗰個石碑可能係提示繼續行就會進入寺院範圍都唔定。至於今泉台就係住宅區嚟嘅。咁方向好清晰喇，繼續直行去天園

都有啲斜要上下喎

喺日本行呢類小學雞路線嘅好處係指示充足，每個路口都會有指示。只要清楚知道自己目的地就可以跟住嚟行。當然，準備地圖仍然係有必要嘅。

又行多咗200米了，仲有800

終於嚟到天園，見到好多小朋友喺大草地玩。

望下另一邊見到停車場就估到，咁大班細路都唔會係行山過嚟。唔知會唔會係學校旅行團呢？

見佢哋玩得高興，應該唔擔心會好似香港咁比啲有棘嘅草整親。就算會，啲家長應該都唔會咁黐線走去投訴。就算啲家長真係咁黐線，當地相關部門都唔會咁低能因為咁而剷起晒啲草。

離開天園，繼續向下一個目標瑞泉寺進發

2km，好快就到

一望埋去就知冇乜理由會行去車路嗰邊

下面有分岔路喎。。。

落到嚟望下個牌，兩邊都話係去鎌倉宮嘅。咁即係唔理揀邊條路都會去到同一個地方，亦即係點揀都唔驚錯啦。問題就係獅子舞到底係乜嘢地方嚟呢？就喺呢個時候有個日本人走埋嚟問路(可惜不是架妹)，我當然係聽唔明佢問乜，估計佢似係想問行邊條路會短啲呱。於是我同佢講 “sorry, sorry” 再拎個地圖指下指下，佢知問錯人笑咗吓跟住急急腳向獅子舞方向行咗去。唔知會唔會係怕比我問番佢轉頭嘅時候唔知點答呢??

最後我喺唔知獅子舞有紅葉睇嘅情況之下照原定計劃行去瑞泉寺，返嚟香港之後再搵資料先至知呢一段路喺落葉時山路會變成黃色，錯過咗一個睇靚景嘅機會了。咁冇辦法喇，唯有下一次再嚟睇(借口)

跟住落嚟除咗樹之外，都冇乜嘢好睇。連人都唔多個。似乎大部分人都係揀由獅子舞落山 。

見到呢啲鐵欄估計應該快行完了

嚟到山徑出口，竟然見到一班外國遊客。唔知佢哋係嚟行山，定係參觀附近嘅瑞泉寺呢？

入口有成條天園行山徑嘅地圖介紹

呢個就係天園徑瑞泉入口

行完山了，跟住係行出去鶴八幡宮。大約要行2公里。

啲路邊草幾靚喎。

經過鎌倉宮，為咗唔想再比入場費，過門而不入。

行餐懵終於行到嚟八幡宮門口

頽頽哋都有少少紅葉影下

相比其他寺廟，八幡宮呢到啲排檔同款式都好少

望下張觀光地圖，諗吓下一次去邊先

最後行番去鎌倉站座火車走人

路線記錄

行程準備

由於呢段行山徑係鎌倉市推介嘅旅遊景點之一，設施同指示都好充足。事前只需了解一下起點同中間經過嘅地標，再加官方網站嘅簡化地圖已經足夠(當然可以download埋GPX記錄嚟參考)。唔需要太擔心蕩失路或者有危險。有行山習慣嘅朋友理應可以輕易完成，但如果平時係香港好日都唔去行下山，就無乜謂山長水遠走去試喇。

來源：鎌倉市役所市民生活部観光課(按圖連接)

另類走線

如果想慳番500円參拜料用嚟食雪榚，喺建長寺以外係有路可以入去天園徑嘅。起點仍然係北鎌倉站，過咗円覚寺之後繼續行到見到地圖板，然後轉左向明月院方向行。去到地圖上標示”明月院方面入口”就有小徑可以上去勝上嶽。當然，我自己係未試過咁行嘅，只係研究路線時知道可以咁行。有興趣就試下啦。