近來發現好似多咗網友嚟睇我寫啲行山路線，我覺得都應該出一個 post 嚟做少少提醒。我相信行山經驗多，體力比我好嘅人多的是。佢地亦冇乜需要參考我啲路線資料，出呢個 post 只為以防萬一，免得有朋友睇完我啲分享之後因為失預算而咀咒我。

入正題，今次主要想提醒一下預計時間嘅重要性。每個人嘅體力同行山經驗都唔同，我要用三粒鐘行嘅路可能其他朋友用兩粒鐘就得，自己亦試過因為身體狀態同其他原因喺行同一條路線時出現好大嘅時間相差。所以我記錄嘅時間只能夠作為一個粗略嘅參考，未必個個啱用。請參考路線嘅朋友根據GPS記錄估算一個適合自己嘅時間，我放上blog嘅 GPS 記錄係用 smartphone 加上 runkeeper 做出來嘅。 準確度難免會有多少偏差，但用嚟估算行程距離同上落高度應該足夠。路線高度横切面可以大致上睇到地形，比起用地圖數等高線方便好多。留意左下方有一個唔多起眼嘅 download link，可以將整條路線拎走慢慢研究。坊間有大量 GPX 工具鐘意點玩都得

image

咁到底要點去預計時間先至啱？之前聽過一位朋友講佢做同軍時學到嘅方法，就係用橫向距離乘某個基數，再加上另一組以垂直升降距離計算出嚟嘅數字就可以估算全程所要時間。我聽完左耳入右耳出已經乜都唔記得，咁到底係點計？用幾個 key word 搵 google 神即時就有答案，下面係一份英國童軍恊會關於行山路線計劃嘅教學

Scout Skills… Route Planning for Hikes

呢份嘢好詳盡，原來做童軍真係可以學到好多嘢喎。簡單講，佢以一個人行平路時可以有5公里時速，之後高度每上或者落300米就加30分鐘。例子假設由Ａ點到Ｂ點距離係19公里，中間要爬升760米；

19公里要用4粒鐘 + 750米爬升要用1個鐘頭15分鐘 = 5個鐘頭零15分鐘

之不過呢個係老外定出嚟嘅標準，人地行一步可能等於我行兩步，又係未必啱自己用。咁點呀大佬～ 呢樣唔得嗰樣又話唔好，其實仲有一個生活化啲嘅測試，而且保証安全，零行山經驗都得；

其實市區好多地鐵站嘅距離都係大約 7 百幾到 8 百米，以旺角為例，如果用 10 分鐘可以由油麻地站沿彌敦道快步行去旺角站(以唔塞人計)，咁即係行平路時速大約有 4.5 公里。繼續行多 10 分鐘就可以到太子站。對我自己嚟講呢個量度方法都幾準確，由太子行到落去尖咀就大約要用 40 分鐘。甚少去行山嘅朋友不妨試下當作一個基本參考。如果 keep 住用 4.5km/h 速度行 3 公里彌敦道有困難，咁行山路時可能就需要更多時間囉。行山總會有上落呢。