又整車

話說架車踩起上嚟時有聲，困擾咗我好鬼耐。早前懷疑係因為 BB 啤鈴作怪，換咗一對全新(靚+貴)啤鈴，可惜只係減少咗啲怪聲，未完全解決。左諗右諗，有機會發聲嘅活動部件都 check 過了，忽然醒覺我一直都忽略咗腳踏大盤齒輪餅！大細齒餅係用螺絲組合同固定喺一齊，如果有螺絲鬆咗用力踩時虛位磨擦就有機會有聲。我真係蠢過隻豬，咁遲先至諗到。望下個腳踏，似乎 shimano 唔多想用家隨便去拆，用星頭螺絲之餘 menu 又冇講係乜野 size，好彩喺靠估嘅情況之下比我喺鴨記買到一粒啱 fit 嘅 T30 批咀(真好彩)。

腳踏上嘅螺絲唔容易扭，最簡單有效嘅方法係放佢喺地下，用條肶做支點頂住嚟擰。視乎情況(上緊或者鬆開)只要轉個方向放就得。家陣我係要 check 下螺絲有冇鬆，於是 set 咗 13Nm 逐粒試下擰。結果發現五粒螺絲入面真係有一粒鬆咗，收緊時仲聽到啲”熟悉”嘅聲音，今次有望將呢個怪聲問”醫斷尾”了

呢個網站有唔同廠商同各種部件需要嘅扭力要求，係唔錯嘅參考。扭力單位以 Nm 計算。