如果話大東山已經變成了 MK 山，咁良景後面菠蘿山一帶嘅香港版大峽谷可能係旺角入面嘅銀行中心了。由於條路已經好旺，咁我淨係紀錄由良景站行去入口嘅路，方便一下區外唔熟路嘅朋友。其他啲路只要去到入口就咁跟住人群行就得了，睇完大峽谷可以原路走人返去良景，又或者行埋去白泥睇日落。唔係一定要行去青山嘅。
路線：良景站>菠蘿山>青山>屯門站
全長：11.1 km
時間：5小時21分(包括影相同放飛機時間)
(update @ 2017-05-02 – 補上航拍片段)
GPX 路線紀錄可以隨便 download
Total climbing: 985 m
Total time: 05:21:38
今次直接座車去兆康站再轉輕鐵，喺 B1 出去再轉 615 去良景。
轉個頭就到咗良景了。
出站之後就橫過路軌，跟住直行。
繼續直去。
再繼續穿過去。
行到呢樹靠右繼續直去。
之後前面又轉番左。
再直行穿過去。
見到前面公園仔。
跟住繞過條滑梯。
行出馬路再轉右沿馬路行。
行多一陣就會見到左邊嘅山路入口。
沿住斜路一直行上山，基本上嚟到呢到跟住人行就得了。
涼亭旁邊有個牌寫住＂菠蘿山涼亭＂。記得早前有網友十分在意要糾正一般人對菠蘿山正確位置嘅理解，奈何今時今日好多人尋找真相嘅方式係靠 google(雖然結果未必係正確)，而 google map上又標示＂大峽谷＂附近為＂菠蘿山＂。再加上漁護署嘅郊遊地圖除咗真正菠蘿山之外冇標示附近一帶地名，咁唯有貪方便叫埋做菠蘿山。其實地方名都係由前人口耳相傳得出嚟，難保有朝一日積非成是呢到變成＂真＂菠蘿山呢？小山上都冇菠蘿，反而操炮區入面有?，叫做菠蘿山都好合理吖?。
之前行一直都冇留意呢個牌，今日睇清楚上面寫住話前面係軍事禁區禁止非法進入。但點解要用透明膠版嚟做呢？如果想警告叫人唔好入去理應係有咁清楚得咁清楚等人容易睇到先係。
通常為咗避開人潮我會揀由另一邊山路行，但唔知幾時開始連呢邊都開始塞人了。
轉個頭就到咗第一個目的地，港版大峽谷。由於太多人，唔想為其他山友帶嚟心理壓力同潛在危險，喺外圍附近放咗一陣飛機就走人了。
又難怪呢到出名之後咁多人嚟睇，喺香港真係好似冇類似嘅地方。
呢段片其實係分咗兩次拍嘅，因為技術太差去兩次加埋都剪唔到一條似樣嘅片。無辦法了，有機會再去嘅話會試下拍多啲嘢。
行番轉頭起程出發去青山。
離開大峽谷到青山嘅路段有好多位置都適合飛機升降，可以飛出去青山腹地拍下嘢，又唔洗太擔心有乜事跌落嚟會整到人。不過喺青山一帶玩航拍都係要小心，如果唔覺意飛得太遠去咗軍營就大鑊了。
放完飛機繼續行程向青山進發。
發射站上面嘅測量柱好多人，行遠少少去另一枝一個人都冇嘅 hea 下。
始終都仲係對喺發射站附近放航拍機有一定戒心，怕會有訊號干擾失控。今次同之前一樣係拎佢上山齋拍，而唔係航拍。
正當我諗住落山走人時，聽到遠處傳嚟航拍機嘅聲。即時行快兩步上返去發射站睇睇，原來有一位拍友抬咗隻 inspire1 上嚟，真係佩服。八八掛掛咁請教下佢喺發射站玩怕唔怕有干擾，佢話乜問題都冇。之不過我隻玩具機又點可以同佢隻 inspire 比，就算唔計佢多咗個 5.4GHz 頻道，條天線都長好多啦。最後就識咗位新朋友，仲話遲啲約埋一齊出嚟放飛機(雖然唔知會唔會成事)。
一邊八掛睇住人放飛機，一邊就睇下今日個日落靚景。
睇完日落趁仲有光爭取時間落山。
轉個頭又落到嚟青山寺。
返到屯門站，今日放飛機之旅完成～
發表迴響