話說2015年嘅9月，有個傻仔用咗一大筆錢去眾籌一部劃時代設計，功能強勁嘅 3D laser printer。其實我好清楚知道佢係一部 laser cutter，就係算操作流程簡化極其量都只係一部可以當 printer 咁用嘅 laser cutter。因為如果用一部機器做出嚟嘅部件再組合就可以叫3D，咁銑床可以叫 3D milling machine, 帶鋸可叫 3D belt saw, 甚至連車床都可以叫 3D lathe了。 不過我都相信比得咁多錢買機嘅人應該會好清楚自己買梗啲乜，唔會單純因為呢啲宣傳技倆就落搭。事實上雷射切割(唔係雕刻) 一向都係工業用機器，係冇乜可能可以當家庭電器咁放喺屋企用嘅。佢能夠整到一部個樣企企理理又可以放到上”枱面”嘅機，呢個先至係大多數人願意比錢嘅原因(至少我係) 。唯一估唔到係 Dan 呢條戍李極度唔透明(兼唔老實)嘅行事手法，結果等吓一年，等吓又一年。足足等咗４年，終於都比我等到了。喺呢個時候都唔會再多計較功能上嘅落差，因為我知道仲有比我更不幸嘅外國買家仍然係收貨無期。

通常收到新玩具都會第一時間開出嚟玩，但今次等咗差唔多成個星期先至開箱。因為早前預留出嚟嘅空位已經放滿咗其他嘢(即係垃圾) ，清理需時?。

等咗你咁耐，終於都見到你了～等我即刻除咗你。。。個膠袋先～

部機好鬼重，又鬼咁大部。一條友要搬佢出嚟再放啱位實在唔容易，好彩最後都安置完成冇打爛到嘢。打開個機蓋睇睇，最搶眼當然就係枝雷射管。見枝管入面有啲水，初時我以為成係枝管入面都有，原來只係入面幼身嗰枝先有嘅。最中間嗰枝玻璃管紅紅哋色，有少少似啲霓虹光管咁。

隨箱附送有一包老菜抺鏡紙，仲有一個尊用拆鏡工具。

我頂你個肺~ 你應該跟多兩包抺鏡紙嚟啦。個 print head 設計入光位置係突咗出嚟，由啲發泡膠到拎出嚟時唔知道一定會領嘢囉?。攪到我都未開始用就已經要抺。

成個 print head 都係用金屬做，夠晒重手。鍍黑處理感覺上都幾高級，四個角位裝咗強力磁石，安裝就之後靠磁力固定喺上機身。由於唔需要食力，呢個設計已經足夠。用家唔需要任何工具就可以完成安裝，咁都算係一個好設計嚟嘅。一般雷射頭入面其實只係一塊鏡，將激光返射到工件上面，不過呢個加咗自動對焦功能，咁做光刻時精度會大大提高。初步試過，佢刻出嚟又真係幾鬼靚。換轉係傳統機，淨係對焦呢個步驟都應該要攪好耐。

好容易就裝咗個頭上去，完全唔需要做 alignment。呢部機最大賣點就係將所有 laser cut 要兼顧嘅麻煩嘢全部簡化，咁用家就可以尊注設計。換句話講，即係一部適合 dummy user (即係我) 用嘅機。

flat cable 個線架好有誠意喎，落重料。不過個路軌就。。。唉，之後再鬧。

呢個就係個水冷缸，粗略估容量喺500mL樓下。就咁一個爛膠箱完全冇散熱設計，如果開 full power 嚟 cut 嘢可能好快就會煲滾。好明顯呢部機設計上只係考慮咗美國嘅環境，冇諗過緯度低嘅熱帶環境。還好，回水喉位置有裝溫度感應，過熱應該會識得停。其實呢部機係美國本土買都已經有少少係做白老鼠，我哋呢啲外國買家，更加係危上加危。等４年唯一好處，應該係呢部機嘅完成度會比２年前頭一批本地用家嘅老鼠版高。

一開機就聽到有風扇同水泵聲，見管入面啲水即時起晒泡泡，再過咗一陣就行順咗就冇晒了。呢部機設計真係有啲奇L怪，X-Y路軌上面係冇任何sensor，每次開機歸零係靠機蓋上嘅相機影住個 print head 上面嘅 logo。起初聽到覺得有啲 fancy，到收到部機自己用嘅時候就覺得係既戇居又費時。明明有快捷可靠嘅機械 sensor唔用，係都要大費周章靠個鏡頭嚟影。

新機落地，自己又唔係畫開嘢嘅人，拎起手真係冇嘢可以攞嚟試。唯有用佢送嚟嘅 design嚟試機，印把尺出嚟睇吓。

跟住試吓印個鑰匙扣，出嚟較果唔錯喎??。

再用佢跟機送嚟嘅 proofgrade 亞加力試吓，發現最大分別原來係張底紙。除咗易搣啲之外，邊位仲好乾淨，唔需要點清理。相比喺新填地買嘅膠片，雖然 cut 起上嚟冇乜分別，但個底紙啲膠溶咗就好 L 煩，清理亦比較難。不過就算你肯比錢同運費買佢啲貴料，家陣佢都唔會賣比你。因為唔會寄嘅香港，真係Sor9ly?。

其實如果要數臭 glowforge 呢檔嘢真係可以有排講，不過抵死在佢到最後都送咗部機過嚟，而部機 cut 出嚟啲嘢又真係幾好。咁今日就鬧住咁多先，之後繼續一路用一路鬧。