本來已經安裝好 BB 同腳踏，但係之前見人地教換 BB 時都會查啲膏狀物體落去螺絲牙，唔係好知作用係乜，估計總有原因。為免出現問題，於是走去單車鋪買咗一枝返來，拆個 BB 出嚟查完膏再安裝一次。初時以為查膏作用係好似螺絲膠咁防止鬆脫，後來見到包裝上面個英文寫住 anti-seize 就有少少抓頭。點解會係’防鎖緊’呢？乜唔係應該越緊越好咩？再上網搵下資料，原來查呢種物質上螺絲係有科學根據，應該唔係廠商巧立名目整出來屈錢嘅產品
當兩件金屬面受到壓力互相磨擦時，表面分子有可能會’轉移’到另一邊，形成類似焊接現像將兩個磨擦面連接。如果呢種現像出發生喺螺絲同絲母之間，螺絲就有可能被’焊死’冇辦法再鬆開。而唔同金屬因應本身嘅分子結構，對呢種焊接反應會有輕重之分。單車常用嘅材料鋁同鈦都屬於高危類別。如果安裝螺絲時唔查防護膏(又鬼咁大力擰)，就可能會有入冇出了。咁點解我架車個 BB 螺絲係鋁質我又用鈦防鎖膏呢？因為買唔到散裝囉，我估冇乜所謂掛?
如果有興趣了解多啲，可以參考下呢個 Wiki
發表迴響