單車遊京都 – day1

日期: 2014-03-31
全程: 27Km

聽講話日本京都係全世界其中一個最適合踩單車嘅地方，我今次去日本其中一個目的就係要嚟呢到踩單車感受一下．租單車店離開JR京都火車站唔遠，由車站出嚟轉左直行到尾就搵到．單車鋪有 website 可以予約單車，就咁walk in去租又得．

一早嚟到已經有幾個老外係到填梗form租車，店員識講英文所以基本上溝通冇問題．比錢攞車後仲會同你簡略咁講下規矩同要注意事項。佢地有唔同車可以租，唔係嚟搏命最正路就梗係揀conform bike啦．值得一提嘅就係可以加100yen同佢買張單車地圖，當留念之餘亦有一定參考價值．

由於只係plan左嚟京都踩車但冇定行程，所以第一站就去左一個唔洗睇地圖都識去嘅地方 － 東本願寺．同上次紅葉之旅一樣，東寺都係只得一個’頽’字．好彩今次門外嘅櫻花樹已經開得好靚．總算目標逹到

離開東寺就向二条城進發，怕搵唔到地方泊車，於是就搵左條橫街放車再行過去．城入面有梅林同櫻花園，可惜入面櫻花品種比較遲開，一心賞櫻嘅我就有d失望．Anyway，二条城都係值得一去．

係橫街拎番部車之後就向金閣寺進發．踩左幾公里，一心諗住睇花嘅我又再一次領野。金閣除左人多之外想搵粒櫻花睇下都冇．入場費事少，浪費時間事大．．．忽然發現連個runkeeper 都死埋，要開過另一條 track．係呢個 moment，真係要爆(粗)了　:-(

從新出發諗住去哲學之道，於是向東面行．去到一條河邊就發現意外收獲．原來呢條叫賀茂川嘅地方超靚，人亦唔多．沿河邊踩車經過長長嘅櫻花走廊真係就咁睇都開心死．

沿賀茂川向南行到一個交會位，接住嘅係另一條叫鴨川．同樣係好靚，不過想去哲學之道就要係條叫今出川通嘅大馬路轉左向東行．行到尾就係另一個好正嘅景點 － 哲學之道．不過呢到同賀茂川有一個好大分別，就係多人到爆．由於太多人踩唔到單車，推左好耐車先行晒成條哲學之道，沿路睇住兩邊滿開嘅櫻花真係好靚．

為左趕火車落大阪，離開哲學之道就快腳踩返京都．踩踩下經過蹴上見到有香港人係到影婚紗相，於是停車八掛左一陣．

打開google map望下京都站係自己西南面，於是就諗住向西９衝再向南行，結果領野入左去三条．．．嗰到多人到爆同埋唔比踩單車，就連推車都比人’眼望望’．結果都係miss左班火車，要座自由席落大阪．早知就唔鬼洗咁趕．