今次係第我一次去金沢，對呢個地方完全唔認識。出之發前又冇做功課，淨係知道金沢有一個地方叫做兼六園，又有一個行到人落去嘅水池，同埋有包咗金箔嘅雪榚食。結果所有目標都逹到了，仲意外地玩埋踩單車，可以算係超標完成。如果有機會再嚟嘅話一定會 plan 得好啲，好好享受單車 hea 遊金沢。
金沢車站入面有一個好大嘅旅遊案內中心，如果同我一樣冇乜準備，可以喺入面拎張觀光地圖照住嚟行。GPX 路線紀錄係由租車開始一直到最後返 金沢還車，當中只係包括幾個景點，可能對其他人冇乜參考價值。
Total climbing: 242 m
Total time: 05:35:22
如果冇興趣睇我廢嗡，可以直接跳去介紹租車部分
話說我一行出車站就見到有個牌指住話有單車租，咁冇乜理由唔行過去睇下啦
沿住車站旁邊行咗一陣，喺一個好似係停車場入口嘅地方搵到租車點。行入去望下又見到另一個牌寫住話冇車可以租(運吉)，唯有呢個指示行去下一個租車地點睇睇。
搵咗一輪終於搵到第二個比較隱蔽嘅租車點，見到有幾個人正喺到租車(按圖有GPS位置)
我頂～有冇咁黑～最後三架都比佢地掃走埋。冇橋啦，放棄唔踩車行路去兼六園
行咗一段路之後，無意中經過第三個租車站(武蔵)，發現仲有兩架車可以租喎。開心晒，即時埋去攪攪佢先(按圖有GPS位置)
租車站有一個LCD touch screen，可以即時用信用咭登記開一個戶口。開戶之後佢會比一個 8 位數字嘅password比你。跟住你就可以用佢嚟租車
架單車鋼水好好(重到無鄰)，只有 3 個波段，由於太重加上我又雞腳，所以大部分時間只可以用最慳力(即係慢)個波嚟踩。座位高度可以有限度調較，以我呢個矮仔嚟計，就算set到最高都仲係要曲住腳嚟踩，有少少辛苦。扺讚嘅係佢有一條固定車鎖，只要搵到嘢穿住就可以就咁拍落去車身前轆鎖實，再唔係自鎖前轆都得，用起嚟幾方便
望住地圖轆下轆下去到金沢嘅名勝兼六園，今日免費入場喎，慳番300yen
嚟金沢嘅重點當然係食個金箔雪榚啦，鬼咁大塊金箔包到實，喺陽光之下閃到爆，勁滿足(土豪mode ON)。食完就可以走人返東京了?
行去金沢城途中見到佢，好鬼Q喎
行完兼六園出嚟，喺旁邊個公園行下櫻花(加手作)祭。真好彩只做兩日都比我遇到，有嘢食又有嘢睇
睇完嘢行過對面馬路21世紀美術館。呢個地標景點梗係要嚟影張相啦，到此一遊吖嘛。跟住行多兩步就係14號広坂租車站，出架車去下一個景點
鏡頭一轉就轆咗架車嚟到東山嘅茶屋街泊車站(18 – 東山，按圖有GPS位置)
泊好車行前少少入到嚟茶屋街，第一樣吸引到我嘅嘢(又)係金箔雪榚
查實我只為影相，冇乜興趣嚟呢到飲茶。如果單純以影相計，呢到真係有啲失望。感覺冇乜特別，行咗一個圏就走人了
轆返去金沢站途中經過蓄音器館
噢撈~冇泊位，唯有走人(17 – 尾張町，按圖有GPS位置)
聽講話近江町呢個魚市場係金沢其中一個必到景點，食海鮮平靚正。不過我呢條鹹魚唔食魚，到此一遊算了
返到嚟金沢還車，可以印番張使用紀錄出嚟，會清楚列明時間，由邊個站出車到邊個站還車。有冇追加付款，夠晒均真。玩咗幾轉都只係收我200yen，加埋基本料金都係400yen，真係要比個like佢
除咗租車同印單，佢個系統仲可以即時查到每個 port 位嘅使用情況。之不過用電話上網睇方便好多
交通
除咗座北陸新幹線，去金沢仲有好多方法。不過我呢個遊日小學雞只係識得買個 JR PASS 去手指指訂車飛，咁我就介紹一下座子彈火車嘅資料。北陸同其他地區嘅新幹線一樣有唔同嘅編組，分別主要在於停站次數多少。停得站多自然就要用多啲時間，由東京去金沢有はくたか(hakutaka) 同かがやき(kagayaki) 兩種車可以座。かがやき少停站座大約兩粒半鐘就到，而はくたか就係站站停嘅慢車，部分班次要座差唔多四粒鐘，座到你發毛。咁應該冇人會咁笨座はくたか掛？其實除咗停站次數多少，仲有指定席同自由席嘅分別。指定席一定要預早去排隊訂飛，時間同座位都固定。而自由席就可以隨時 walk-in 有位就座得，相對方便一啲。快車係冇自由席嘅，可以嘅話就提早一兩日就去訂飛。就算唔 plan 行程都要定好座車時間，可以參考呢個時刻表，就住自己心水時間座車。快車同慢車會梅花間竹大約隔兩粒鐘一班。如果 miss 咗一班車，就至少要等一粒鐘先至再有車座。
租車流程簡介
租車公司官方網站有詳盡資料介紹租車方法同收費，不過(暫時)只有日文版本。
租車第一步梗係先要搵到個車站，佢哋叫做ポート(port)嘅地方。除咗要知道位置，仲要留意個站仲有冇車。建議係一行出金沢站就即時開佢地個地圖睇睇，見到邊樹多車就衝過去。最近嘅站係19-金沢B，然後係01-金沢A。如果兩個站都冇車，可以考慮先喺站附近行下。佢地有架貨車係市區走嚟走去，會搬啲單車去補充冇車嘅站。開住個 webpage 不時 refresh 一下留意住就得，如果心急可以搏下行一段路去02-武蔵站。
去到租車站會見到呢啲柱，走埋去個 LCD touch screen 到可以揀唔同語言，有中文同英文。可以即場登記開一個戶口，照畫面指示入完名同電話號碼再插張信用咭入去確認就得。完成登記之後佢會印一個 8 位數字嘅 password 比你。跟住喺主目錄揀貸出，再揀パスワード，然後再入番個 password 入去，入完之後佢就會顕示可以撰擇嘅車位，再禁個 number 把鎖就會打開，可以拖部車出嚟。時間由你拖架車出嚟開以計，直到你踩完推番架車入去鎖定為止。單車車頭有個 sensor，只要推架車埋去鎖好還車程序就自動完成，可以拍蘿柚走人
咁租金又點計？基本收費係200yen 一日，但其實個 password 只可以用到同一日嘅 22:30。每次出車都有 30 分鐘免費時間，過咗之後就每隔 30 分鐘比多 200yen。如果你每次都喺 30 分鐘之內還車，無論你踩幾多次都只係收基本嘅 200yen。最正係佢哋喺主要景點附近都有租車站，泊好車行兩步就有嘢睇。如果路線 plan 得好用 200yen 去玩晒啲旅遊景點都未必冇可能，抵到爛
踩車方面金沢同日本其他地方冇分別，行人路上一般係可以踩單車嘅。喺行人路上當然上係行人優先啦，喺人多路窄嘅情況之下就落車推。要做個有 manner 嘅 jojo。除咗行人路，馬路都可以踩。官網就有一幅安心走行MAP，可以參考一下。
發表迴響