嚟到九月尾天氣終於涼番少少，又可以開始行吓山。作為開季第一擊，梗係要去我最 like 嘅大嶼山啦。路線唔算太長，試吓行個單M打個圈。但其實就算諗住行短線都冇乜理由攪到十一點幾先至出發嘅，今日實在係晏咗啲，好大機會行到天黑囉。
天氣係涼番少少，行半粒鐘嚟到入口都冇乜出汗。影張相馬上就起行。
冇行一排，黃龍坑郊遊徑感覺依然係好L辛苦。行咗半粒鐘先至到第一枝標距柱，應該係個人潺咗?
第二枝標距柱了，可以回一回氣。
今日沿路遇到好多山友，只中有一班係裝備齊全嘅義工隊，一路上山一路清理塌樹。好應該多謝一吓呢啲熱心嘅山友，冇佢哋幫手單靠漁記真係唔知要清到幾時。
行咗粒幾鐘終於上到嚟鳯凰徑。
嚟到爛頭營，梗係先去二東座吓享受吓靚風景先啦。可惜今日有煙霞，矇矇哋。
鏡頭一轉已經由二東行咗過另一邊嘅大東山，呢到可以望到啱啱去完嘅矮仔二東同埋遠少少嘅大嶼山第三高蓮花山。
Hea 咗一陣，轉個頭又落到嚟伯公坳。
潺仔明上身，落到伯公坳已經好鬼攰，不過都仲係要繼續下一半行程嘅。
好似超辛苦咁?
雖然只係差少少就到鳯頂，但已經頂唔住要座底抖抖。順便開餐食飽，今日好好彩比我見到中華白海豚喎?
開完餐行多一陣就上到頂了。鬼咁攰，要喺鳯頂座番一大排先至落山。
休息咗差唔係多半粒鐘，係時候要落山。
再行多半粒鐘返到落嚟昂平了。
日落照大彿，梗係要影番張相先啦。
今日抬咗3L水，嚟到昂平差唔多飲晒。一於買枝新嘢試吓先，仲係冇糖架喎。
好，出發返去東涌了。
唔知係咪支補腳力嘅功效，回程時狀態好咗，可以keep番用一粒鐘時間落到嚟出口。
繼續經村路出東涌，遠處又再見到今日行過嘅兩座大山。
候王宮外面佈置咗好多大形花牌，係慶祝候王誕嘅。話咁快又一年了，估唔到舊年諗住寫嘅post一年後都仲未出現。???
再返到嚟天橋轉灣位，打圈完成。
烏燈黑火嘅東涌，今日行程完滿結束✌
路線記錄
路線：東涌>黃龍坑郊遊徑>大東山>伯公坳>鳯凰山>昂平>360救援徑>東涌
全長：24 km
時間：7小時43分
Total climbing: 2197 m
Total time: 07:43:38
發表迴響