年初一行大運 — 花瓶行山入東涌

大年初一唔去拜年有乜好做？梗係去行山啦。今日行程冇為自己定完成目標，諗住行到幾遠就去幾遠。先試吓行未去過嘅草灣花上瓶石，再練習+熟習之後一段到鴨腳瀝嘅路線。希望有朝一日有能力完成終極目標 — 打橫行晒成個大嶼山，由最東(草灣) 行到最西(分流)。不過今日只係行得半個大嶼山，離開目標仲有一大段距離?。

路線概覽(按圖放大)

路線：青馬收費廣場>汲水門大橋橋底>二轉>三轉>草灣>花瓶(石)>花瓶頂>大陰頂>昂船凹>大山>犁壁山>大輋峒>榴花峒>老虎頭>老虎頭郊遊徑>亞婆塱>雙東坳(鳯2)>黃龍坑郊遊徑>黃龍坑道>逸東>東涌
全長：29.27 km
時間：8小時36分

其實我係一個比較鐘意搭鐵去行山嘅人，不過如果座鐵由欣澳出發上山就唔可以順路行埋草灣同花瓶石。喺冇選擇嘅情況之下上咗架E車嚟到青馬收費廣場。望吓錶已經差唔多十點半，今日應該都唔去得好遠架喇。

落車之後就經隧道過對面，即係出市區方向嘅巴士站。

跟住就一直向前行。

繼續向大橋辦公大樓行，初時有少少擔心會有職員出嚟阻截。因為通常隧道同橋嘅入口附近都會劃為管制區，閒人免進。結果冇人理我，亦冇留意到有指示牌話唔比入。唔知係因為有太多人嚟行山佢哋費事理，定係呢條路根本唔係管制範圍可以自由出入。總之就係行得。

繼續沿行人路去橋邊，都幾遠嘅。

左邊有個小山，行上去望吓有乜嘢睇先。

原來都幾鬼高架喎。

由呢個角度影汲水門大橋應該比較少見喇掛～

依～原來有枝測量柱喺到。

睇完嘢落返去路行人路繼續行程。

終於到橋邊了，跟住沿橋邊落去。

沿路穿過橋底。

影吓個橋底先～

沿橋底可以行出去海邊，不過就冇乜特別嘢睇。

由海邊返上嚟，跟住喺路邊呢條泥路小徑行入去。

行入小徑之後好快就會見到一個鐵閘，閘門冇鎖打開就入得。

入嚟之前喺橋底遇到一位山友，佢提醒話樓梯左邊條路唔好行入去，因為有人住入去會比狗追。路口亦有個牌寫住”此路不通”。咁我當然唔會去試啦，後來先至知道原來呢到出去可以睇到個鎮流碑。到底係嗰位山友N年前比狗追過，定係行得太入呢？既然睇少咗一個景點，唯有等下一次再嚟親自入去驗証一吓。

沿住小徑一路上山，背後就係汲水門大橋。先影左邊，再影下面，家陣連右邊都影埋了。

繼續沿小徑行。

過咗涼亭再行多一陣，見有幾個山友由左邊泥路行出嚟。估計行出去都應該唔會有乜危險，一於出去八掛吓。

原來呢條路只係用嚟繞過一少段上斜梯級嘅捷徑，冇乜特別嘅。

又再回到石屎小徑，跟住向下行。

落到尾見到有個小沙灘，即時跳落去行吓。原來又係冇乜特別。

之後喺岸邊擒番上碼頭。影張相先。

沙灘嘅另一邊就係上山嘅山徑入口。

咁近距離有兩個碼頭，呢個估計都應該係舊嘅草灣碼頭啦。望落同深屈有少少似。

繼續沿石屎小徑進發。

路邊有一個好唔起眼嘅指示牌，跟住行就得了。

行咗冇耐就見到山上面個花瓶。

終於都上到嚟，由呢個角度睇都認唔到佢係花瓶石。

行嚟”正面”就認到了，不過我真係唔覺得佢似花瓶。

今日好多人嚟花瓶石，想話影一張少啲人嘅相都唔係咁容易。

完成第一個目標景點，跟住就向花瓶頂進發。

嚟到分岔路，轉左先去一去花瓶頂影張相，然後再返轉頭去大陰頂。

花瓶頂測量柱，標高273M。

由花瓶頂去大陰頂落昂船凹係有一段距離嚟。

天氣唔好影唔到靚相，印像之中好似都未試過喺呢個位影相係好天。

呢段山徑行完了，嚟到斜坡維修道，跟住行出去轉左沿樓梯落去。

一直落到㡳跟住再轉左。

直去，行前少少見右邊樓梯口就落去。

跟住繼續轉左。

見到出口了。

出嚟之後一個U-turn，跟住喺呢條樓梯落去過馬路。

由橋底穿過去。

之後又再沿樓梯上。

行到見綠色閘口就轉入去。

上山嘅小徑入口好明顯，之後一直跟住行就得了。

上一段之後有一枝測量柱，不過有柱唔一定係山頂囉。

嘩，做乜好似咁高咁嘅？?

終於又上到嚟。

由大山望番過去大陰頂，呢個位風景唔錯。咁靚梗要影張全景睇吓(按圖放大)

影完相就繼續行程，呢段路平時都係比較少人行，今日更加係一個人都冇。

山竹過後好多地方都有被吹斷嘅樹，市區嗰啲無一幸免要連根拔起。但喺冇乜人行嘅山徑啲樹就有重生機會。其實只要樹根健康，好快又可以再生出嫩葉，若干年後又係一棵大樹了。

呢棵打橫了，一樣長出綠葉。

由大陰頂到老虎頭要經過4上4落，先落昂船凹，跟住上大山，然後落四白坳上犁壁。再落三白坳上大輋峒，二白坳上榴花峒，最後到去到老虎頭。一路行一路見前面有一個又一個嘅山頭，雖然唔算係好高，但見到嘅時候總會有啲好辛苦嘅感覺。

大輋峒。

行行吓有少少肚餓，係時候食啲嘢。今日飽鋪冇開門，要食啲唔新鮮嘅7仔飽。

離大輋峒冇幾遠有一個發射站，除咗裝滿平時見慣嗰啲微波天線之外，仲有個慧星天線喎。

見到愉景灣了，即係就快到老虎頭。

就到就到好快到，其實只係口號嚟，並唔反映現實嘅。山仍然係要上?。

唔知點解呢一帶嘅山徑都係咁特別，路邊有一條好整齊嘅淺色嘅地帶。

行餐懵終於都嚟到老虎頭郊遊徑。

見到個老虎頭了，咁難得一個人都冇，梗係要行埋落去睇睇。

好，年初一喺老虎頭上食個飽。可惜呢個咖喱牛肉飽味道麻麻。

離開老虎頭沿郊遊徑去搵啊婆，中途經過呢個石陣，又係影相時間了。我成日都覺得佢似一隻?。

呢舊呢。。。係試劍石喎。

呢個係仙桃石，就啱角度睇真係有啲似桃嘅。

行咗大半日天氣都係麻麻，本來諗住行完老虎頭郊遊徑就轉去奧運徑落白芒。點知行到嚟又見佢出番太陽，即時又有啲想上埋個爛頭營。

行完郊遊徑嚟到亞婆塱，望吓錶差唔多4點，時間好尷尬。走人落白芒似乎有啲早，上埋大東天黑前又一定趕唔撤落山。左諗右諗忽然醒起仲有條可黃龍坑郊遊徑可以落山，咁計落又應該夠時間喎。一於去馬~

時間有啲緊，要馬上起行。小徑入口好明顯，好容易就會見到。

之後繼續沿小徑行，會經過幾個電纜架。其實今次係第二次行，大致上認得路，但係路面倩況同上一次有啲唔同，多咗好多雜草。睇自己之前記錄路線影嘅相幫助唔大，記得嘅已經識行，唔記得嘅睇完仍然唔記得。下次要考慮吓拍片先得?

啲電塔其實喺碌碌都差唔多樣，不過好似每枝都有獨立編號，再嚟時要試吓影低佢。

電塔旁邊有一條小路向下行，入口尚算易搵，但行多兩步條路就唔見咗。

之後嚟到呢個石澗，但印像之中嘅路口唔見咗。搵吓搵吓行咗入去一個長滿刺嘅草叢，出番嚟時隻手花晒。

最後都搵得番條路嚟到呢枝電線杆，之後上山嘅路就好清晰。不過唔代表啲路係易行嘅，跟住一路都係上斜嘅泥路，有啲仲會跣添。上山還好，如果行呢段路落山應該會跣到PK。

之後一路係咁上都冇乜特別嘢睇(因為大霧)，好彩行到近尾段時有啲吊鐘花睇吓。

幾靚喎～

之後沿路都有靚吊鐘，但到近山頂時就冇晒了。

就嚟到頂了。其實上面鴨腳瀝同三台山之間嘅一個山坳。

終於出到嚟大路，跟住轉左沿路行就可以去到雙東坳。

又係時候分段吔飽，今次呢個密瓜飽好好味喎。

行到蓮花山出口附近見有人放咗好多石陣喺到，又影吓先。

好喇，嚟到雙東坳，跟住接番鳯徑去爛頭營。

嚟到黃龍坑郊遊徑入口已經係6點，天色開始暗。

攞定電筒出嚟，預咗尾段要摸黑落山架喇。雖然係咁，都會試吓盡快落到幾多得幾多嘅。

由於一個人都冇，喺唔塞人嘅情況之下用咗13分鐘就跑落到嚟中途站，仲差1公里就到出口。

再用多10分鐘就跑到落嚟出口。用23分鐘由上面落到嚟自己都有啲意外，唔塞人係一個因素，對腳行咗成日完全進入戰鬥狀態先至係重點。我知呢個時間對跑友嚟講唔算快，但用我自己標準嚟計已經係好好了?。

正，最後都可以趕得撤喺天黑前落山。

由樓梯口行出黃龍坑道仲有一段距離，出到嚟已經黑齊了。

經過天后廟，影張相先。點解天后廟唔係喺海邊架呢？

原來赤立角村以前係喺赤鱲角島上面，即係家陣機場島上東面連接橋一帶。後來為咗起機場政府就將成條村搬咗嚟黃龍坑呢到。原來嘅島就剷平咗，只係淨低一座小山，即係家陣嘅觀景山。天后娘娘都可以休息一吓了。

上天橋過馬路，之後再沿裕東路行返東涌站。

到了，今日大運完成。

行程記錄

今日係試路性質，主要為咗熟習路線同預計時間，睇吓自己嘅計劃係咪可行。如果要由最東橫走到最西，路線要盡量直接，咁中途就唔會經過有補給嘅地方。拎得多又重，拎唔夠又唔得。真係要諗清諗楚，大東有水源可以做中途水站，如果天氣唔太熱帶2L應該夠由草灣行到大東，慳出嚟嘅重量夠拎多兩個橙。今次用8粒半鐘嚟行半個大嶼，已經包括咗最辛苦嘅路段。淨底嗰半個大嶼(到分流計)以落山同平路為主，理應可以行得快啲。不過仍然係有大約20公里嘅路，咁計全程50公里唔跑就真係冇乜可能行得完。如果扣除今日搵路影相同hea嘅時間，加埋下次早啲起步，可能會夠時間去到石壁水塘都唔定。跟住落嚟要先去連吓跑步，等時機再戰。