今年農曆年假期天氣唔好，年初一落雨冇得去行大運。嚟到年初三天氣似乎好番少少，決定再次試吓挑戰目標縱走大嶼山。其實今次係有機會可以行到去石壁嘅，不過去到伯公坳時啲雨好似越落越密，為咗唔想入黑之後要又凍又落住雨企喺石壁等巴士，放棄行程由東涌道敗走。正式宣佈第二次挑戰失敗，比起上一次算係行遠咗少少。睇嚟可能要再失敗多一次，到第四次會成功都唔定。
路線：青馬收費廣場>汲水門大橋橋底>二轉>三轉>草灣>花瓶(石)>花瓶頂>大陰頂>昂船凹>大山>犁壁山>大輋峒>榴花峒>老虎頭郊遊徑>亞婆塱>鴨腳瀝>雙東坳(鳯2)>伯公坳>東涌道>東涌
全長： 32.21km
時間：8小時47
分路線概覽
一早座巴士入去青馬收費廣場，過穚時見天氣似乎唔錯拿拿臨影相。心諗今次實冇死啦，點知落車之後就開始天陰同落毛毛雨。
落車之後行前少少。
穿隧道過去另一邊。
跟住就向大橋方向行。
一直係咁行，喺呢個時候見個天開始好暗，仲有啲毛毛雨。
即時開個雷達圖嚟睇吓，天文台嘅預測靠唔住係人都知，不過雷達圖呢啲係已經發生咗嘅數據，應該唔會有伏。還掂都係段9估，咁不如自己估吓，賴咗嘢都冇咁嬲吖嘛?。以我多年段估經驗，啲雨雲唔會咁快嚟到，一於行多段睇睇先。
行到嚟大橋嘅下層入口，繼續沿旁邊嘅行人路直去。
之後沿小徑橫過橋底。
落嚟之後就會喺遠處見到有個閘口。
入去之後靠右上樓梯，左邊條路直去係可以去到鎮流碑嘅，今日諗住要去分流時間比較趕，都係留番下次先。下次又有下一次。。。
其實就算唔落去，沿路上山時都可以離遠望到嘅。
直去又得，轉左都得。咁我會揀左邊，因為可以上少一個山。
前面轉左落去。
經過沙灘直去
行多一少段之後喺右邊呢條樓梯上山。
行咗一大餐見到個花瓶了。可能因為時間早，成段路行咁耐都冇遇到其他山友。
嚟到呢個分岔路口終於見到人了，係一位拍友嚟。佢一早上嚟影?真係好有攝影熱誠，唔知佢會唔會好似我咁攪攪吓比行山騎劫咗個攝影興趣呢吓?。先唔好理人哋嘅事，呢個時候要決定由花瓶頂落山，定係繼續行程去大陰頂。睇完個雷達圖，決定繼續上路。
忽然個strom alert又响，話說隻錶有個功能識得提醒可能會出現嘅惡劣天氣情況。操作原理係靠監察特定時間入面嘅氣壓變化，如果氣壓下降達到指定幅度就代表有可能會落雨。雖然到目前為止都未試過有一次係準，不過多一個提示比自己都好嘅。
見到下一個目標大山，好似好高咁。
離開山徑，沿護士墻維修道落山。
繼續落。
落到盡就轉左。
之後行前少少，見到右邊樓梯就落去。
落到尾又再轉左。
再行前少少就係維修道出口。
出嚟之後嚟個180度U-turn再行前少少就會見到樓梯。
要靠右落去，唔好9衝行去左邊。
穿過公路橋底再上嚟。
繼續沿樓梯上去。
嚟到電訊站旁邊個閘口就轉入去。
入閘之後就係即時就係山徑，留意左邊有好明顯嘅上山入口。
可以認住呢兩條喉，見到就行上去。
行一段之後嚟到半山嘅測量柱，遇到一大班山友喺到休息同影相。佢哋話係由欣澳行過嚟嘅。
鏡頭一轉上到嚟大山頂，見到枝標。
望返過對面大陰頂同迪欣湖，加埋天上面啲雲超靚。
望吓欣澳嗰邊，有個形狀同馬屎洲有少少似嘅島，不過呢個就細好多。睇地圖話呢個地方叫長索。
新年流洗，本來係諗住將兩個吉由草灣運去分流。但喺草灣嗰時唔記得拎出嚟影相，唯有喺大山影嚟補數。可惜結果都係冇機會運佢哋去分流要敗走東涌，拎咗返屋企食。
離開大山繼續上路。
喺遠處望到蓮花山，今日冇打算要上去，只會喺佢山腰經過。
前面啲山脈好靚，可以放心跟住落嚟嘅路係會全部行晒佢哋嘅。
行餐飽之後又再見到測量柱，呢到係大輋峒。
再行前少少就會見到一個發射站，除咗平時見慣嘅微波天線之外，仲有慧星天線。
過大輋峒之後嚟到二白坳，可以望到愉景灣。
好L辛苦終於行到嚟老虎頭郊遊徑。
好，跟住係沿紅色波波行去搵啊婆。
係時候食個飽，唔係之後冇力上大東。
好，又嚟望吓跟住落嚟啲目標。蓮花山近咗好多，跟住遠啲見到大東，再老遠就見到鳯頂。
雖然睇漁記啲介紹話呢隻唔係龜，不過我點睇都覺得佢係隻龜，亦會繼續叫佢做龜。
呢個平時勁多人打咭影相嘅試劍石今日冇人，可以慢慢影。
跟住到仙桃石。過埋呢到就冇特別嘢睇，可以行快兩步。
行到見到球場即係差唔多到出口了。
出到嚟老虎頭郊遊徑盡頭，同澳運徑交接嘅路口。繼續直去就係上鴨腳
小徑入口唔太起眼，只要留心搵一搵就好易見到。
跟住落嚟歷史又再重演，我大至上係認得條路點行，但係睇番自己影啲相就形容唔到出嚟。如果想試行呢段，建議都係搵個熟路嘅人帶，或者預留多啲時間搵路。
認住蓮花山，要向佢嘅方向行。
跟住會經過一條小澗。
過埋條澗之後又會再見到呢啲電纜柱，唔好諗住認啲牌，個個都一樣嘅。全部都係第一回路51。
如果搵啱路(?) ，最後山徑會明顯。呢段小徑喺郊遊地圖係有標示嘅，不過實際行起上嚟唔係咁容易搵到。
依？又嚟料？
嘩，真係好大片雨雲飄咗埋嚟，好在只係毛毛雨嚟，都可以繼續行程。不過啲雨粉將本來已經濕濕哋嘅泥路攪到勁跣，一路上就一路PK。
好L辛苦終於行到上嚟，見到條大路了。出去之後轉左沿路行訧可以去双東坳。
前面就係双東坳，跟住轉右去爛頭營。
嚟到黃龍坑郊遊徑交界，時間係3點10分。如果繼續行天黑前一定夠時間去到石壁，分流就應該冇乜可能了。已經可預計到今次又失敗，不過仲有幾粒鐘點都行埋落去伯公坳先至再算。
落山途中見有人留低咗隻豬叔喎，可能係有山友唔小心跌咗，其他山友執到就放喺當眼處等人認領。眼見經過嘅山友都冇攪佢，應該個個都係諗住物主會自己返轉頭嚟攞。
又落到嚟伯公坳了。
本來諗住經地塘仔返落東涌，不過啲雨粉越落越密，都係行條最安全又最頽嘅東涌道落山算了。
好，返到嚟東涌，敗走完畢。睇嚟今年都未必再有機會，要寄望2021了。
路線記錄
Total climbing: 2296 m
Total time: 08:47:17