早兩日行完大運理應休息一下，但係初三赤口冇嘢做又想再出動去行山。今日一於就搵啲唔會太辛苦上落唔大嘅路嚟行吓。聽朋友講話過年鴨記會有市集好熱鬧，咁就行山落鴨記睇吓啦，順路上一上獅子山咁就生生猛猛喇。
路線：油塘>魔鬼山>藍田晨運徑>藍田公園>馬油塘>井欄樹>大藍湖>東洋山>大老坳>飛鵝山道>沙田坳道>沙田坳>獅子山>筆架山>鷹巢山自然教育徑>大埔道>鴨寮街
全長：25.85km
時間：6小時46分
出發地點係由塘高超道旁邊嘅鋰魚門邨，沿路行前少少就會見到華人永遠墳場嘅入口。之後沿行人路一直上山就得。
沿斜路一直上嚟到入口，左右兩邊條路都一樣可以上去魔鬼山嘅。不過大部分人都會行左邊，所以為咗避一避人潮今次就行左邊啦。
呢邊條路相對少人，可以除一除個口罩吸啖新鮮空氣。
行咗一陣就望到起梗嘅調景嶺至康城跨海橋，好似話第時仲可以踩單車過橋架喎。
轉頭就行到上嚟歌賦炮台，行個圈影張相就走人。
繼續行上去山頂碉堡，沿路可以望到遠處嘅飛鵝山同獅子山。今日冇打算上飛鵝，不過就會上獅山。
上到嚟山頂又係人山人海，估唔到今日都有咁多人嚟行山。都係影張相就就走人算了。
轉個頭又落到嚟
鏡頭一轉已經行到嚟到澳景路嘅衛徑入口，家陣有鬼咁大個指示牌啲人就算未嚟過唔識路都應該唔會搵唔到。
涼亭落嚟之後嚟到呢個分岔路口，今日唔會跟衛徑上山，直行經藍田晨運徑去藍田。
區外行山仕通常會跟衛徑路線上五桂山落馬油塘，一來因為係官方路線，二來貪佢有風景睇同有山上落。而呢條晨運徑就係繞住五桂山山腰過嘅hea路，啱晒啲唔需要大運動量嘅街坊，或者係我呢啲想hea行嘅懶鬼。
晨運徑大致上係平路，大部分時間都冇乜特別嘢睇。途中比較特別嘅就係呢啲涼亭。
沿路行到嚟藍田公園，呢到有一間叫地母元君嘅廟。平時行山經過都見有人嚟參拜，過時過節就更加熱鬧。
吖～估你唔到，傳統中式嘅廟都會有番鬼佬情人節嘅
今日年初三，啲人個個都嚟燒香拜神，香火好鼎盛。
呢間廟都好靚，睇個屋頂就知唔會流得去邊。
經過元君廟繼續行就會見到藍田公園公厠，跟住轉右沿路再行。
一直行到見到綠色圍欄就轉出，今次行發現路邊多咗個神壇喎。
之後一直沿路行又見到做梗斜坡公程，包到實晒。
最後見到呢個熟口熟面嘅樓梯口，呢條就係衛徑由五桂山落嚟嘅樓梯。以前沿路上去仲有啲石像公仔，不過家陣全部比人拆晒囉。都係唔講咁多，繼續直行好過。
繼續行多一陣就嚟到馬油塘村，跟住就轉右沿路一直行。
一直沿馬油塘路行出嚟村口，最後出到嚟寶琳路。吖～黃色呢間屋又幾靚喎。
出到嚟村口，之後過斑馬線去對面嘅翠琳路。
沿翠琳路行，一直行到見到左邊呢個路口就行過去。
再沿路行到尾見到停車場就轉左行入村。
入村之後沿路行到尾間屋，喺左邊會見到山徑嘅樓梯。
之後繼續沿山徑行。
行到見到呢個路口，轉右行落去係小夏威夷徑，直行就繼續去井欄樹。
以前可以好清楚睇晒成條運水橋，家陣比樹遮咗一半了。
呢條溪好似都幾靚咁喎。
出到嚟清水灣道，過去對面馬路就係井欄樹。轉左再行前少少就有行人隧道可以過馬路。
吖～本來諗住嚟士多買枝嘢飲吓，唔醒起今日係年初三，鬼有人會開鋪咩。
之後穿過九曲十三灣嘅井欄樹村嚟到衛徑第4段嘅入口。
出發前又望吓張地圖先，今日諗住試吓跟足衛徑路線嚟上山，唔經百花林同飛鵝山。
呢棵植物幾特別喎。
由入口行1公里多啲就嚟到呢個分岔路口，之前每次都會轉左上去百花林。今次要轉右試吓跟足衛徑嘅路線行一次。
轉灣冇耐就會見到一間大屋，已經荒廢咗好耐。
呢間屋新嘅時候都應該會幾靚。
八掛完就繼續行程，沿山徑行落去。
條路又鋪得幾靚喎。。
山徑盡頭落到嚟大藍湖路，出口好似有個地圖板，落去望吓先。
好，路線正確。沿車路行多一段喺左邊有路轉上山。
好，照指示繼續行。
喺出名指示不足同做得衰嘅衛徑，難得見到有指示牌。通常都係喺你搵唔到路最需需要嗰時就冇，到冇需要嗰時又整喺啲當眼嘅地方。
好喇，行到嚟見到呢個路口就轉左入去。
得一條路行上去。
依～有啲屋喺到喎，睇落好似已經荒廢咗冇人住。
呢間咁嘅樣肯定冇人住啦?，仲有隻舊碗喺度。
啲茶壺唔係我擺嘅，可能係其他拍友set落。
睇完廢屋廢就繼續行程，沿小徑繼續上。
呢段路可以話係正正常，都幾好行。
正喎，估唔到今日行山都有吊鐘花睇。
依？改咗路？其實今日係第一次行呢段路，咁對我嚟講就唔係改路喇，條路本來就係咁行嘅?。
離遠望到飛鵝山。
第一次上嚟東洋山，呢度都幾好風喎。
休息咗一陣就行返落去飛鵝山道。
哦，原來原本嘅路線係唔駛上東洋山，咁慳力好多喎。
下面就係飛鵝山道，落去之後沿馬路直去。
睇吓地圖先，家陣喺大老坳，行多一段就會到平時去開嗰個涼亭。
行一陣嚟到見到呢個路口就轉左落去。
跟住再行一少段就嚟到飛鵝山涼亭，今日人山人海喎。
又望吓個地圖板，跟住係繼續沿衛徑行落去沙田坳。
遠望一下陣間嘅目標獅子山。
沿路一直落到嚟札山道交界，繼續沿飛鵝山道向前行。
再行多一段就落到嚟沙田坳，今日個個都嚟行山好鬼熱鬧。
呢啲黃色花好靚喎。
本來諗住入士多買枝保腳力飲吓，但排隊排到打晒蛇餅。都係行落嚟接麥5上獅子山繼續行程。
起步前又望吓張地圖，跟住係沿紅色波波行。
上一段山已經好L辛苦，影張相順便回一回氣。擰轉頭影張相順便回一回氣，今日冇上去飛鵝山，望唔到自己啱啱行完嘅路段。
呢段麥徑之前行過好多次，今次想試吓沿路影晒啲有標示嘅軍事遺蹟。第一個見到係呢個6號座標石。
7號座標石，有歷史價值但就冇乜觀賞價值囉。
一直沿麥徑行中途嚟到涼亭，如果唔夠時間或者行行吓想走人可以諗吓由呢度落山。
自己一次都未試過行呢條路落山，但眼見有啲行山人仕一家大細都由呢條路落，段估應該係啲正正常常級別嘅郊遊徑。
我就梗係繼續行程啦，向筆架山進發。
8號。。。
9號。。。
10 號座標石。
行到嚟上獅子山嘅樓梯口，見到好大堆垃圾?。都唔明啲人拎得嚟行山，點解唔繼續拎埋落山，係都要一飲完就掉咁PK。
好，開始上獅子山。
好L辛苦咁上咗10分鐘樓梯終於上到嚟獅尾，呢度又係人山人海。
吖，邊個咁應節整個輝春喺到，張萬事如意係咪比風吹走咗呢？
頂～又係一大堆垃圾。
獅頭都塞滿人，都係唔去同人迫了，影多張相就落山走人。
有時啲路慢慢落係會辛苦過快步落嘅，但係遇上塞人就要辛苦啲。
落返到嚟麥徑嘅大涼亭。
繼續向筆架山進發。
又望吓呢度個地圖牌，由沙田坳出發行咗一半嚟到第一個涼，跟住去到第二個涼亭就唔會再跟麥徑行。
先前上離開咗麥徑上獅子山山頂行少咗一節麥徑，家陣再見到啲軍事古蹟已經係第16個。開始有少少懷疑係自己睇漏咗。。。
之後再上一段樓梯嚟就到畢架山觀景台，呢度風景好靚。
又嚟到消失的波波嘅位置。
行到出嚟龍欣道，之後經前條條樓梯上去。
呢度有枝測量柱，應該冇乜打咭友會對佢有興趣。
上完一少段樓梯之後就見到個雷逹波波，仲有矮佢少少嗰枝測量柱。
影完相就繼續沿麥徑落山。
有耐又再見到條龍欣道，繼續係過左佢直去。
第3次見到條龍欣道，繼續係過咗佢再落。
一直行到見第二個涼亭之後就唔再跟麥徑，轉左行入去鷹巢山自然教育徑。
再行一段之後就會見到落山嘅指示牌。
跟住就沿小徑一直落山，大致上係正常山徑，唔算難行。
落到尾段遇到另外兩位落梗山嘅山友，佢哋話落得慢比我行先。
就快到出口了。
忽然間聽到有啲聲嚇一嚇，原來係有馬騮，仲唔止一隻。估唔到落到嚟呢個位都有馬騮。
到出口了。
出到嚟見到大埔道，跟住轉左沿行人路落去。
向前行多一陣就過馬路。
行到見到上行人天穚就過對面馬路。
喺天橋上可以望到李鄭屋邨，落到行人路之後跟住一直行落去就得。
呢度左同右兩條路係一樣，不過㨂右邊會好啲。
之後一直見路就跟住行。
行行吓冇路行？唔駛驚～行多兩步就有轉機。
呢個死角位鬼鬼祟祟有條樓梯落橋底，唔係行到埋嚟都幾難會見到嘅。
去澤安邨嘅行人天橋，唔係要上去。繼續落就得了。
繼續沿大埔道行落去，會見到舊北九龍裁判法院。記得好耐之前話批咗比間大學攪活化，但後來唔知因乜事攪唔成之後就一直都冇咗影。
前面街口轉埋個灣就到深水埗。
嚟到尾段都仲有個市區景點影吓，就係呢座活化咗嘅美荷樓。就算唔係為咗睇佢，都有機會會喺佢旁邊條樓梯上過嘉頓山。
馬路中心個安全島有賀牛牛年花燈喎，呢啲嘢雖然係頽頽哋，不過要隔12年先影到一次就影吓佢啦。
終於都落到嚟到深水埗了。
順路經過諗住去玩具鋪睇吓嘢，都唔醒起今日係年初三又點會開。。。
終於嚟到鴨記，今日行山行程結束✌?。跟住開始第二心 part 行夜市?。
路線記錄
Total climbing: 1831 m
Total time: 06:46:27
發表迴響