今日係一年一度為自己而設嘅節日，咁高興決定要請一日假期去行山。行程主要目標係睇吓以前義勇軍喺山上留底嘅軍徽，仲有清潮時期已經喺山頂嘅求雨碑。當然唔少得就係放吓航拍影吓相啦。路線安排由虎地坳出發上杉山，再沿橫跨華山脈嘅石屎車路(即係軍路) 去平輋，難度唔高得嚟風景又靚，絕對值得去影吓相。
路線：虎地坳>華山軍路(杉山>華山>大嶺靶場>犀牛望月>馬頭嶺>松山)>坪輋
全長：8.64km
時間：3小時25分
今日嘅起步點係虎地坳，需要座火車嚟到上水站再轉巴士入去。
出閘之後睇吓地圖，跟住係要行過去巴士站座73k。
不過有時睇完地圖都冇用，因為自己將判斷力交咗比個小腦，一見到巴士站就9衝咗落去。結果搵嚟搵去都搵唔到個站?。
最後死死地氣喺附近搵咗個啊姐問吓，原來個站喺對面馬路，真係低能到不得了(好L應節啊)。
過馬路之後好快就見到有73K嘅指示。
個站一個人都冇，睇嚟都似係啱啱走咗班車?。
嚟到虎地坳站落車之後就返方向行，喺前少少嘅斑馬線過馬路。
喺斑馬線過馬路。
過馬路之後喺右邊個路口行入去。
之後一直沿車路行。
轉個灣之後經過一個貨倉，門口冇部氣水機可以喺出發前做最後補給。
繼續沿車路行，一直去到見分岔路就靠左直去。
冇耐就開始上山，之後一條路跟住行就得。
呢度啲樹又幾靚喎，叫杉山咁呢啲唔知係唔係杉樹嚟呢？個樣又唔多似咁?
嘩，呢度望落去風景都唔錯喎。
山頂有一枝好矮嘅測量柱，睇番地圖呢個原來係高程點嚟嘅。標高115米。
影飽相就繼續行程，向華山進發。
嘩，啲人行山上嚟打沙包，勁喎。
咁得意有個風向袋插咗喺到?，初時唔知係乜事，再行多一陣就清楚晒了。呢個袋係飛機友放喺度用嚟把風嘅。
呢段”軍路”雖然係沿山脊上上落，但係就一級樓梯都冇(因為要行車吖嘛)，有啲好好腳力嘅車友仲會嚟踩單車。以行山嚟計呢條路絕對算係好行，風景仲好靚添。依?前面仲見到一位放梗滑翔機嘅機友， 行前少少八吓先。
呢度夠晒空曠又好風，唔怪之得啲人會嚟放✈。查實如果唔係已經有人放梗我應該都拎咗隻航拍出嚟放了?。
嚟到見到呢個分岔路口，繼續沿住石屎路行就得。如果覺得行石屎路太頽可以試吓直行剷山路落，不過我自己就一定唔會咁做喇?。
嘩，有架爛車喺度，睇落好似燒過，又似係比hulk打過嚟咁。
睇落似乎已經喺度一段時間，唔知發生咗乜事呢？
要留意如果一直只係沿石屎路行係唔會經過華山山頂嘅，因為山頂離開石屎路有一少段距離。只需要行嘅時候留意住右手邊，好容易就會見到上山頂嘅小徑入口。
由虎地坳出發向平輋行會先經過華山，睇到呢祈雨碑。跟據上面啲刻字寫嘅年號，呢塊石碑係清朝時期整嘅。望埋去個樣就真係冇乜特別，但係就夠晒歷史囉。
華山山頂呢度有個高程點，但係睇地圖上就冇標示。應該係我用嗰張郊區地圖太舊了，係時候要換過一張新嘅。返到屋企上網參考OSM地圖，呢個高程點應該有139米高。
喺華山山頂可以望到成個大嶺靶場，起初大近視望埋去仲以為係個小形機場。唔知點解啲路會起到有少少似跑道，等我試吓兜埋過另一邊睇吓先。
由山頂沿小徑落會經過一個小山，呢度係山車友嚟玩同練車嘅地方，叫做天平山。
結果行吓行吓行埋落嚟。咁啱遇到兩個山車友，試吓問佢知唔知係咪有路喺呢邊直接上山，不過車友唔係山友，解答唔到我嘅問題。對吓張地圖睇落似乎要穿林搵路上，穩陣起見都係行一條睇得到嘅路好啲。
離遠可以見到上山嘅路，包穩陣啦。
石屎路盡頭接泥路小徑再去。
戇居居兜咗個圈又再返到上嚟軍路了，繼續行程。
行多一段就嚟到今日行程入面最高嘅地方，叫做犀牛望月(唔知點解會有個咁奇怪嘅名)。需然話係今日最高位，但都只係得164米。
有山友整咗個牌提醒其他山友唔好亂掉垃圾，其實提嚟冇用，因為會掉垃圾嗰班PK唔會因為見到個牌叫唔好就真係聽話唔掉。
由另一個角度望落去靶場。
離開犀牛望月繼續行程，沿路可以望到遠處嘅紅花嶺，佢都係我想要去試吓行嘅目標嚟嘅。等我先行吓呢度附近週邊啲地方，遲啲安排好路線就會去試。
好，到逹今日目的地，見到個軍徽了。
呢個軍徽真係好特別，之前一直都想睇但唔知確實位置。直到最近上網睇到路線介紹先至知原來咁易就可以行到嚟影相。今次完成咗心願，遲啲一定會再嚟影多啲相。
一場嚟到實在係冇乜理由唔影張打咭相嘅?。
正諗住起飛時聽到有其他航拍機嘅尖叫聲，應該係有人喺附近放梗FPV。為咗安全都唔敢飛得高，飛離開少少影幾一兩張相就降落了。估唔到今日抬咗隻機出嚟飛一陣就要收工，既然係人哋嚟先又無乜理由夾硬飛嘅，費事攪到大家都冇癮啦。自己又冇耐性等，都係第日早啲再嚟過。
人地放飛機係揸車上嚟，我放飛機就身水身汗咁行上嚟。好在行山對我嚟講都係娛樂嚟，咁我一次過滿足兩個願望，應該係滿足過佢先啱?(啊Q 精神) 。
行行吓又見到路邊有一個疑似高程點，但係喺地圖上就搵唔到有近以嘅位置。估計應該又係關我張地圖太舊嘅事。無謂深究都係繼續上路好啲。
吖~估唔到呢個時間都仲有芒草睇，仲要係幾鬼靚。
嚟到出口附近見到有個鐵閘同一間屋仔。
呢個該係當時閘口嘅嘅守衛室嚟，已經又殘又爛了。
行到軍路盡頭，落到嚟馬路出口就轉左。
跟住就行入去右邊條路，一直行到尾出平輋。
行到出嚟路口就係坪輋路，口路有人企喺到等梗小巴，心諗就算有車都唔知有冇位上，都係去座巴士穩陣啲。望都唔望就轉右行去等巴士。
點知過馬路之後行咗冇幾耐後面就有小巴由後面飛過，仲要大把位座?。不過我都幾肯定如果我頭先企喺到等，嚟嗰架小巴就會係座滿冇位上。所以我會同自己講冇蝕到。
沿坪輋路繼續向前行多一陣就會見到巴士站。
行多陣就嚟到巴士站，可以座79k返上水。今日行程結束，下次再嚟試吓行附近啲地方。
路線記錄
Total climbing: 547 m
Total time: 03:24:58
發表迴響