今日諗唔到有邊度特別想去，行長途唔夠時間行辛苦嘅又唔願。結果又係串埋啲”事但”路線嚟行，貪佢行過N次唔洗諗又容易，做吓運動之餘又消磨咗半日時間。由中環出發上山頂之前參觀埋新開放嘅中環街市，行程悶得嚟都叫做有少少新嘢啦。
路線：香港站>中環街市>中環至半山扶手電梯>干德道>香雪道>舊山頂道>山頂>白加道>甘道>布力徑>黃泥涌水塘>紫蘿蘭山徑>淺水灣坳>淺水灣泳灘>麗海堤岸路>深水灣>苗鍾徑>海洋公園站
全長：20.81km
時間：4小時45分
座狗鐵去到香港站，直上IFC就嚟到今日嘅起點。
經行人天穚過去對面空置咗十鳩幾年，最後活化咗變成商場嘅中環街市。
好似都仲有少少工程未完成咁喎。
之前有見過啲攝影前輩喺度影嘅黑白相，自己就從來都冇入過嚟。今日到自己嚟影，好冇誠意咁求其用電話㩒幾張就算了。
吖，呢啲燈離開咗張豬肉枱之後經常成為藝術裝置。咁又係幾特別嘅，影影影~
街市活化之後都保留咗部分之前嘅攤檔，咁真係諗住嚟睇吓歷史築嘅都未至於會太失望。呢個係賣魚嘅檔位，以今日嘅眼光嚟睇設有啲奇怪。
呢個檔呢。。。係賣豬肉嘅。
呢檔係賣水果，啲間隔定到梗晒以今日嘅睇法其實唔多實用。
參觀完中環街市就繼續行程，街市另一邊出口連接住登山電梯嘅行人天穚，好方便。
開始”登山”了。
沿登山電梯上，好快就會經過另一個歷史建築大館。呢度以前係監獄嚟嘅，家陣要安心上路先比入，喺門口影張相就算。
吖，唔知邊個咁唔小心留低咗隻鞋仔喺度呢？
好~上到嚟登山電梯嘅終點干德道，冇得偷懶喇，開始上山頂。
沿干德道行人路一直去。
行到嚟見到斑馬線就過對面，之後沿香雪道行。
呢棵石墻樹都幾特別，每次經過都會影一影佢。
香雪道行到尾見到個樓梯口就轉上去。
跟住再上一段好L斜嘅路，去豪宅樓下黐吓啲貴氣。
經過啲豪宅之後繼續沿路上，轉埋前面個灣就到舊山頂道嘅入口。
到入口了，個指示牌話行多30分鐘就會到山頂。
轉個頭就上到嚟，再行前少少就係白加道纜車站。
山頂纜車做梗大執工程，連帶車站都閂晒。啲欄杆忽然多咗個新用途，就係用嚟放手套🤣。幾過癮呀，好似玩包剪揼咁。
跟住沿芬梨徑上去山頂廣場。
跟手就繼續上。
轉個頭又上到嚟山頂觀景台，今日出奇地冇人喎(係一個都冇)。
就連平時企滿人嘅西高山都冇乜人🤔。
放飯時間，座底飲枝補奶力先。飲完就可以落山。
落山途中見到好多蝴蝶，咁又影吓佢先。
返到落嚟山頂廣場仍然係冇乜人，咁可以嚟呢架平時唔會入嘅纜車影相。
完成山頂行程，跟住係去下一站淺水灣。由芬梨徑落返去白加道。
跟住沿白加道行到尾，一直去到山頂道。
行咗一陣喺路邊見到啲好靚嘅花。
繼續直去。
終於行晒成條白加道，前面就係山頂道，出去之後轉左。
沿山頂道再行多一陣就嚟到甘道口，跟住轉落去。
行完條甘道落到嚟灣仔峽，直望就係布力徑。跟住就過馬路入布力徑再行到尾。
出去之後繼續沿行人路落，一直行到出路口。
行到落嚟路口轉左，之後喺巴士站前面過馬路，跟住沿大潭水塘道行上去。
一直行到上嚟黃泥涌水塘，行上去打個轉。
以前有艇仔玩熱鬧好多。
影完水塘就沿水壩一直行到尾落樓梯，之後轉左就係紫羅蘭山徑。
紫羅蘭山徑係沿紫羅蘭山山腰打橫嘅平路，頭段係好易行嘅引水道，後段係一般嘅泥路山徑。經常都懶鬼避開上山行呢段路過，路程係遠咗不過就舒服得多。
山徑當中有兩小段懸崖路，裝晒欄杆好安全嘅。懸崖邊風景仲好靚，不過有人嘅話就唔好企定定影相喇，會塞住條路嘅。
行完條紫羅蘭山徑嚟到呢個十字路口，繼續直行可以去大潭水塘，轉右落去就係淺水灣坳。
今日諗住去淺水灣，先要落去淺水灣坳。
落到嚟淺水灣坳，一個人都冇，真係少有。
跟住就轉入去引水道旁邊嘅小徑落淺水灣。
路口有個警告牌好易認。其實呢條路都唔算大崎嶇，近來仲好似越嚟越多人行。
轉個頭就落到嚟馬路邊，跟住就可以沿行人路行落去淺水灣。
出到嚟見迴旋處轉右，之後過對面行人路繼續直行。
行多一段會見到左邊有樓梯。
落埋條樓梯就係淺水灣了。
熱到傻，去厠所洗個面先。
一場嚟到又過嚟公園呢邊行個圈。
熱到嘔諗住入7仔買枝凍水涼一涼佢，點鬼知佢唔夠凍😒。可能天氣熱啲水好賣未雪夠就比人(包括我) 清晒。
行完淺水灣就走人，沿麗海堤岸路出海洋公園。行行吓喺海邊啲樹上面見到松鼠😍。
行埋條苗鍾徑就好快到海洋公園。
其實南朗山望埋去都尖尖哋嘅，不過行上去又唔算係好金。
最後一段好L辛苦嘅長樓梯，上埋去就係香島道，之後沿行人路一直行就會到海洋公園站。
到步~ 今日行完收皮。
路線記錄
Total climbing: 1300 m
Total time: 04:47:22
發表迴響