今日行程係要試路準備之後玩長途，為咗想貼近實際情況需要消耗一定體力先至開始。安排由太和出發來回行一轉九龍坑山鶴藪，目標係試行由沙羅洞上九龍坑山呢段係從未去過嘅路。雖然最後因為低能行錯路漏咗平山仔一段，不過完成咗目標路段都算OK了，掌握咗實際路況同時間。下次再行應該十拿九穩。
路線：太和站>大埔頭>九龍坑山>鶴藪>沙羅洞>九龍坑山>大埔頭>太和站
全長：16.45km
時間：4小時15分
座火車去到太和站，之後入去太和廣場。記得之前唔需要特別搵就落到去巴士站，不過今日戇居居咁兜咗好耐都搵唔到落巴士站個出口。後來先知原來平時行開個出口因為做工程封咗?。
喺商場入面轉嚟轉去都唔係辦法，都係行出去室外再算。一出到嚟就見到有個地圖牌。
哦～原來行吓行吓行咗去第二度，原本經巴士站出嚟直行轉個灣就係，家陣要兜另一邊過。
以前成日都嚟踩單車，只要比我見到條單車徑就認得啲路點行了。
沿路一直行到尾。
嚟到路口轉左。
其實路口有指示牌。
終於都行到嚟起點大埔頭見到個地標，其實如果唔行錯路由太和站過嚟一陣間就到。如果想穩陣啲，可以考慮由大埔墟座21A小巴直接嚟到大埔頭落車起步。
喺大舊石旁邊沿住啲村屋一路行到尾。
呢到有個叫做敬羅家塾法定古蹟，未參觀過可以順便入去望吓(如果有開的話)。
村屋行到尾見到分岔路就靠右邊。
行前少少就會見到九龍坑山嘅指示牌。
照指示轉左再行。
行多少少就見到另一個指示牌。
之後沿樓梯上去就得了，一條路包唔會行錯。
行咗大約10分鐘嚟到第一個涼亭，路邊有枝好矮(似係已經荒廢咗)嘅測量柱。
繼續沿樓梯上去，見到第二個涼亭。
喺涼亭行前少少個傻人樂園，好耐之前入去參觀過，仲遇到一位好友善嘅陳先生請我飲茶。事隔咁多年都想再入去睇吓，不過自己次次都因為要＂趕路＂冇停落嚟。
搵返喺2014年影嘅相，似乎依家破落咗好多。唔知陳先生係咪己經交咗捧比其他義工接手打理呢度呢？
行到見到第三個涼亭，跟住有一段長樓梯要上。
雖然有好多樓梯要上，但係呢邊啲梯級做得好均稱所以行起嚟唔會太辛苦。
行到上嚟第四個涼亭，呢到地方好大，直頭可以話好似個公園仔咁。
呢啲明明係掛聖誕樹嘅波波，咁樣穿起成串又變咗中式掛飾幾得意喎。
吹咗一陣風就，跟山友自制咗指示牌繼續行程。
再行多一少段就上到嚟玉秀峰枝測量柱(288M)。
行咗咁耐終於開始見到九龍坑山。
呢個應該係九龍坑山嘅招牌位，望埋去都幾凶狠。其實呢到啲梯級做得好靚，唔會一級大一級細，行起上嚟唔係太辛苦。
鏡頭一轉已經上到嚟山頂嘅發射站。
另外呢個原本係電視發射站嚟，聽朋友講本來係由亞視負責，但係因為冇錢攪咗好耐都未起好，最後仲摺鬼埋。
影完相就由發射站旁邊落嚟接主徑繼續行程。
跟住轉左沿路落一段長命斜。
下一站係鶴藪水塘，同去流水响水塘係同一條路嚟。
一直落到嚟見到個涼亭就轉右。
路邊有去流水响水塘嘅指示牌。
一路行到嚟呢個分岔路口，要轉右落去鶴藪。直行就會去咗流水响。
其實路邊啲指示牌好清晰，除非係發雞肓，如果唔係應該冇乜可能會行錯。
落到嚟呢個路口繼續向前行。
見到鶴藪水塘了，再行多陣就到。
落埋條樓梯下面就係水塘。
影吓個水壩先～
之後一直沿水塘路行到尾，嚟到燒烤場就轉入去。
呢條係平時上八仙嶺會行嘅路，目標係想模擬由八仙嶺落嚟之後經平山仔去沙羅洞嘅情況。
可惜計劃同實際有啲出入，只因自己低能早咗一個路口就轉，結果行咗另一段郊遊徑。
兜咗個圏又返到嚟呢個路口。
無橋，既然都錯咗，就繼續行埋佢。呢邊都一樣可以行到去沙羅洞嘅。
轉個頭就嚟到沙羅洞，喺遠處望到下一個目標九龍坑山。
嚟到村口，轉右入去有嘢賣。好耐之前試過踩單車上嚟喺入面買水飲。唔知係咪因為時間晏咗，今次嚟有＂食蕉＂喺門口，企喺到影相都比佢凶。都係拿臨走人好啲。
呢個位置可以睇到螢火蟲架喎，不過唔就係呢個時候囉。
之前嚟沙羅洞呢邊係爛屋同荒地，家陣似係有村民搬咗返嚟重建，唔知仲可唔可以隨便行入去呢？
行咗咁耐終於嚟到今日主菜上去九龍坑山。
第一次行呢段，要睇吓路面情況同要行幾耐。
路況雖然唔係靚路，但都唔算太差。有泥路又有石屎路，啲石級有啲比較爛。另外就係呢段路原來都幾多人行架喎。
由沙羅洞出發上九龍坑山比由太和上慳咗大約170米嘅高度，不過行上嚟仍然係需要一定體力嘅?。
臨到山頂嘅最後一段樓梯整好企理。
終於上到嚟山頂，應該話又返到上嚟九龍坑山山頂先啱。
呢到望落去睇到成個大埔公業邨。
好喇，跟住係原路返去太和。上嚟嘅時候都冇留意到原來樓梯口有寫住956級。
之後嘅落山路段會輕鬆好多。
遠處望到大帽山，如果行完八仙九坑再過埋大帽山就真係堅揪囉。
嘩～呢到寫住1241級喎。其實唔係好多好快就可以行完。
冇公德心亂掉垃圾已經唔係腥香港人嘅尊利，會掉垃圾嗰啲亦唔會因為見到呢個牌而唔改變。
返到落嚟出口。
跟住穿過穚底過馬路去太和站。
最後返到嚟太和站完成今日行程。
路線記錄
Total climbing: 1114 m
Total time: 04:14:43
發表迴響