早兩日第一次試行咗華山軍路，完成心願去咗一軍徽影相。今日放低隻航拍喺屋企再次出發行呢段路，試吓行遠少少入埋平輋睇嘢，順便探吓路準備第時安排串連行上紅花嶺。其實今日前面大部分路段都係跟官方介紹嘅郊遊路線嚟行，難度係家樂徑級數得嚟又有幾多嘢睇，絶對值得跟住嚟行吓。睇完古樟樹之後尾段少部分有少少算係＂搵路嚟行＂，但亦可以當係路線伸延增加雲泉仙館呢個景點同埋方便座巴士走人。
路線：虎地坳>華山軍路(杉山>華山>犀牛望月>馬頭嶺>松山)>坪輋路>坪洋壁畫邨>三鄉亭>禾徑山村>禾徑山路>五洲路>坪輋路>雲湶仙館
全長：15.8km
時間：4小時14分
座火車去到上水站，喺A出口出閘之後沿行人天橋去上水廣場。
經過上次7完之後，今次有經驗識得由商場行落去巴士站。
嘩~好多人喎，好彩最後都上到車。
一直座到嚟虎地坳站落車，睇嚟今日有好多山友同我一樣嚟行華山。
入口就喺斑馬線旁邊。
過馬路之後一直沿路行就得。
行到嚟見到分岔路就靠左繼續去。
轉個頭就上到嚟杉山山頂，吹一陣風再影張相就走人。
杉山都幾特別，附近一帶都冇樹，淨係呢度一個山頭有密麻麻嘅樹，不過就唔係好肯定呢啲係咪杉樹。
離開杉山繼續行冇耐嚟到第二個景點，望住呢條沿山嶺一直伸延嘅路都真係幾靚。雖然路上面冇城墻，但形態上的確係有啲啲似萬里長城嘅。
行多陣嚟到一個分岔路口，雖然睇落好似係要直行咁，但其實係唔需要離開條石屎路嘅。沿路轉右落去就得喇。
跟住上吓落吓，留意住其中一段斜路嘅右手邊有條泥路小徑，行上去上面就係山頂祈雨石。就算見唔到條路，山頂仲有一枝簱杆好容易就會認到。
上到嚟華山山頂，最特別嘅就係呢塊清朝時期嘅祈雨石。唔知當時為乜要喺呢度祈雨呢？
由山頂望落去可以見到大嶺靶場全景。
離開華山山頂繼續行，見到路邊有舊大石寫住綠悠山。查過地圖唔覺有標示呢個山，估計都係啲山友老作出嚟寫上去。至於後面個貨櫃場，睇 googlemap 話呢個叫做合力貨櫃場。
行前多少少見到另一舊石，見啲人好鐘意喺呢舊石旁邊打咭影相，其實我又唔覺得佢有乜嘢特別。
繼續行又有大斜路要上，之後又係喺右邊有條小徑可以行上去。今次上去嘅地方叫做犀牛望月，唔知點解會改個咁奇怪嘅名。
犀牛望月，呢度係成條軍路入面最高嘅地方，有164高。
影完相又繼續行程出去平輋，離遠望到紅花嶺。今日其中一個目標係想試吓搵路上去。
睇個樣呢碌嘢似係高程點，但係喺地圖上搵唔到附近有。應該又係因為我分地圖太舊了。
落到嚟出口守衛室，即係行完呢段軍路了。
落到嚟馬路轉右。
之後再行左邊條馬路出去坪輋路。
出到嚟坪輋路，過馬路之後就轉右沿行人路去。不過我行到路口見到另一條路好似有嘢睇(其實係冇嘢睇嘅) ，結果行入去兜咗一陣。
其實兜入嚟呢條路就係因為見到呢間屋，見佢寫住長江兩個字幾特別。之後繼續行都冇其他嘢睇，走回頭路返出去坪輋路。返到屋企再睇地圖先知原來呢條都係五洲路嚟，下次再嚟嘅時候可以諗吓行呢度過去。
返到出嚟坪輋路繼續向前行。
行到街口見到有個導遊指示牌，望吓有乜嘢睇先。
嘩~ 矇查查睇唔清楚，淨係見到附近好似有個廟，一於行入去睇吓先。
初時以為五洲路係咪乜嘢特別地方，其實只係一條路。
行到街尾見唔到有廟，呢個又點睇都唔多似。放棄唔搵了，行返出去繼續入壁畫村仲好。
返到出嚟平輋路見路邊生咗啲好靚嘅五爪金龍，冇錯呢啲粉紫色嘅花叫做五爪金龍，真唔上網查都唔知。之前一直以為呢啲叫啦叭花﹐好彩冇亂講嘢唔係就真係7到冇朋友。
一直行到嚟呢個路口見到九記士多就轉入去坪原路。
跟住又沿馬路邊一直行入去。
好快就開始有嘢睇了。
樹上面釘住個木牌雖然有啲殘破但都好靚喎，新嗰時應該會仲靚。
喺村口嘅卓榮記士多旁邊見到指示，咁就梗係跟住佢行人去啦。
又話係壁畫做乜畫晒喺地下嘅？?又畫得幾鬼cute喎。
其實如果以畫嘢嚟計畫emoji就係最容易，不過就係因為簡單得嚟又可愛先至會咁受歡迎?smile~☺。
嘩，呢幅壁畫好靚喎，長到轉咗角都仲有夠晒特色。
繼續沿村路行入去參觀。
呢個我like喎，淨係見到連登個膠花樣就開心晒。
見到呢間屋將啲壁畫畫花晒，估計應該係啲打咭友影相太過份打擾到住戶，人哋無辦法之下唯有畫花晒佢等班友冇得影。香港人就係咁，啲嘢好地地喺到唔肯自律，係都要玩爛個場攪到大家都冇得玩先安樂。
好彩繼續行都仲有啲嘢睇，不過就唔多算係壁畫喇。
好似兜晒了，咁行返出去去下一個景點睇東東石同古樟樹。
坪洋陳氏宗祠
初時嚟到奇怪點解呢個亭冇乜特別都會有咁多人嚟嘅呢？後來見啲人由個旁邊條路行去個大泥地先知係為咗睇芒草，不過其實都已經係4月，就算未甩晒淨低嘅都唔會靚得去邊。但仍然都係咁多人。
吖，呢度又有工程封咗上唔到去。
沿住條路行去禾徑山村。
呢度似係村口，見唔到有指示。試吓行入去睇睇，原來行入去一陣就會見到啲樟樹。
終於嚟到見到啲樟樹，原來因為有蟲害棵樹斷咗一枝樹幹(原來樟木防蟲都唔係萬能嘅) ，因為驚有危險已腳圍封咗。見條路都差不多比啲雜草遮晒，可能已經係咁一段時間了，打咭熱過咗就少人會再嚟。
行出去禾徑山路。
出到嚟見到條大馬路就係禾徑山路，會有大泥頭車喺到飛過。出嚟之後沿行人路繼續向前行。
行到嚟見到有個好新淨嘅斜坡維修道入口。
呢個位似係可以上去，不過對地圖山徑入口位置好似係對住五洲 路。都係再行前啲睇睇。
呢個鬼祟位睇落似了。
原來行到埋嚟情況又唔係太差咋喎，不過上埋幾級樓梯之後就已經係泥路小徑。
穿小徑一上咗一段之後見到有防落山泥傾瀉嘅大圍網，向前行咗一陣都唔似有位入。睇嚟係長山隧道嘅斜坡工程打斷咗原先上山嘅小徑，咁睇嚟啱啱經過嗰個維修道入口係唯一希望了。算啦，計落時間都唔多夠，今日探路到此為止。
行返落嚟橋底，見到對面馬路鬼咁大個牌指住坪輋。行過去實冇錯了。
行咗一陣好快就有個分岔路口，見到入口個路牌加埋條路咁靚真係好容易比佢fake咗。睇地圖原來右邊呢條係掘頭路嚟，左邊嗰條先可以返到坪輋。
幾靚咁喎，不過好似冇乜人行咁。
行吓行吓終於出返嚟大路(即係五洲路)，之後轉右。
之後繼續沿路行出去。
哦～原來先前喺導遊指示牌見到嗰個廟就係喺呢度，可惜冇開入唔到去參觀。
呢度個介紹牌又係甩晒色，隱約見到寫住平源天后廟。其他介紹資料睇唔清楚了。
行返出嚟坪輋路轉右沿行人路去下一個景點。
見到指示牌，去仙館繼續直行就得了。
終於行到嚟今日最後一站雲泉仙館喇，入去睇吓有咩睇先。
呢個水車好明顯係用嚟比人影相嘅假狗，我鐘意～
如果個池有荷花應該會好靚，但呢個季節就得啲泥。
先行坪洋壁畫村時離遠望到呢間屋覺得好靚，但嚟到近睇又發現唔算係好特別，不過第一次嚟行吓影吓相都ok嘅。
呢個立體壁畫都幾靚喎，影埋佢就走人了。
雲泉仙館一出嚟就係巴士站，座巴士返去上水夠晒方便。今日行程結束～
路線記錄
Total climbing: 540 m
Total time: 04:13:51
發表迴響