記得好耐以前試過約朋友一齊行山,將會合點定喺山上面(喺山頂枝標到等)。要估算自己腳程之餘仲要估埋”同伴”嘅腳程,結果(梗係)時間掌握得唔好,朋友等得唔耐煩自己走咗。而遲到嘅我又冇去追佢行咗另一條路落山,兩條友約埋但分開行兩條唔同嘅山路,呢單嘢真係諗起都好笑。今日又再試一次約朋友中途會合去行山,但今次會合地點唔再定喺山上面,成功各自行唔同嘅頭段之後再一齊行尾段。
路線:大埔墟>逹運道>衛7(碗窰路>新屋家>鉛鑛坳)>麥7(草山>針山>城門水塘)>麥6(金山>九龍水塘)>麥5>鷹巢山自然教育徑>大埔道>深水埗
全長:21.45km
時間:6小時19分
今日唔係行好遠所以唔洗倒塔咁早出發,可以食完早餐先座車入嚟大埔。亦因為要夾埋隊友喺城門集合,唔想太早攪到要戇居居喺城門等佢。
喺A出口出站之後轉左落行人隧道。
落到隧道之後轉右,跟住一直行到尾。
墻身有指示牌,一直行到尾去運頭塘邨。
上地面之後可以揀經運頭塘商場或者係沿單車徑行都得。
今日唔入商場,沿單車徑旁邊行。
行到嚟街口就過馬路,之後就轉左繼續沿行人路去。其實唔過馬路就咁喺路口轉左仲會方便少少添。
不過我慣咗過馬路嚟呢邊嘅行人路。
一直行一直行。
行到嚟街口再過斑馬線。
跟住行前少少就會見到有條樓梯落去橋底。
落嚟橋底之後直行,跟住就轉右沿單車徑行。
之後一直沿行人路就會去到碗窰路。
沿碗窰路行一陣嚟到呢個路口,留意路旁有一個好鬼崇嘅W90標距柱,由呢度就開始算係行梗衛奕信徑了。
如果唔想行開頭呢段市區路,係可以由火車站座23K小巴過嚟新屋家總站呢度先至起步嘅。之不過由火車站行過嚟都只係20分鐘,等小巴加埋車程兜路嘅時間分分鐘會慢過行路。
經過小巴站之後繼續沿住碗窰路行。
繼續沿路行上去。
見到指示牌就跟住轉左。
行多幾步又有個路口,繼續轉左。之後一直沿路直去。
依?唔知佢整乜呢?啲水碼咁排又幾靚喎。
行多一陣就會見到右手邊有個樓梯口,跟住就沿樓梯上山去鉛鑛坳。
今日呢段路唔算多人,可以間中除低個口罩吸下新鮮空氣。
行餐飽終於嚟到鉛礦坳了。
好多人喺涼亭到休息喎,即係話我唔好再迫埋去喇,拿拿臨繼續行程仲好。
好,望吓個地圖板先。啱啱由衛奕信徑上嚟,去城門最快就梗係沿衛7路線行水塘過。不過咁行法好似頽咗少少,所以要轉行麥徑兜一兜草山同針山先至落去城門。
上草山嘅路就係地圖板旁邊,出發~
行一陣就會嚟到呢個分岔路口,雖然兩邊都可以上到草山,但如果跟指示牌方向行上草山就會唔順路。所以要行左邊條路上去先啱。
再行多一陣就會見到麥徑個指示路標,跟佢轉右上樓梯。如果掛住9衝直去,就會去咗大埔滘架喇。
今日好喎,好似冇乜人行呢邊咁。又除吓罩先。
好L辛苦咁上咗一大段樓梯,見到麥徑枝標距柱。見到佢即係就嚟到山頂了。
上到嚟了,跟手轉左上頂睇吓風景先。
呢塊大石係草山地標嚟,比起山頂枝標更加值得影相。仲要冇乜人爭唔洗等。
行多幾步過嚟草山山頂枝測量柱,見勁多人喺到打梗咭。咁我唔同人迫了,走~
離開草山向針山進發。
離遠望到好鬼尖嘅針山,每次望到佢都有啲唔係好想行嘅感覺。
繼續沿路落山,留意左手邊一條好濶嘅山徑,轉入去就可以去到X形石。雖然約咗人,不過行埋過去影張相應該都唔會花太多時間,一於出去睇睇先。
X形石就係喺電塔附近,望住個電塔方向行過去就啱架喇。
另一個角度望針山。
到電塔了,啲人圍住舊石影梗相。
今日人都唔算多,好容易就可以獨佔舊石影相。
影飽相,鏡頭一轉就返到嚟麥徑。跟住係前面嘅路口轉左。
行麥徑嘅好處係每個路口都有指示,只要留意吓行錯路嘅機會應該好細。
由草山山頂行過嚟針山都有一段距離,差唔多行咗3公里終於嚟到針山山腳。望埋去好似好攞命咁,其實行落又冇乜嘢嘅,行吓行吓又會上到頂。
上到嚟山頂,影吓個牌之餘入埋後面個獅子山個畫面會豐富啲。
今日都都好天,除咗隻獅子,仲可以遠望到老遠嘅飛䳘山。
山頂嘅另一邊可以望到晒成個城門水塘。
影完相又開始落山了。
主壩在望,雖然望到好近但其實都仲有一段路先可以落到去。
依?今次喺路邊留意到有枝寫咗字嘅石柱喎,不過自己啲中文水平太底左望右望都睇唔到呢個係乜嘢字。
到水塘了。
望吓地圖先,之前經紅波波路線上到鉛鐮坳,路住轉行藍波波上草山針山,嚟到水壩之後繼續跟藍波路線出去金山。
影多張相就去會合等梗我嘅隊友了。
行出嚟就見到喺到等梗我嘅隊友,今日下半場就係同佢搭路一齊行出鴨記。
嘩,雪榚車好吸引。。。引我唔到嘅,唔食~
嚟到今日第二個補給站,勁多人喎。
正喎,有加水機可以用。不過家陣有武肺都係唔好搏了。
好喇,開始逆行第六段出去九龍水塘。
見到呢個白色石柱就知冇行錯路。
麥徑6段有好多軍事遺蹟睇,呢度就有啲好特別嘅隧道。
每次行都會聽到隧道入面傳嚟人聲,睇嚟有好多人都唔理啲警告牌走入去玩。
兩條隧道入口都寫住名,好似街名咁。都幾特別。
落去就係金山道了。
依?掛咗紅籏喎。呢段路唔係經常行,之前經過都冇留意原來有個練靶場喺附近。
前面有個地圖板喎,行埋去望吓先。
睇吓地圖先。。。吖,方向唔啱。可能冇預計啲人會逆行,張圖淨係睇到啱啱由城門行過嚟嘅路。
見到條水壩就知道到咗九龍水塘了。
每逢水塘乾水啲人就會走落去行,個個水塘都係咁。
雖然係冇乜特別,但一場嚟到都要影吓個水壩嘅。
1910年,都過百年歴史囉。不過以水利設施嚟計佢又唔算係日最古老,印像當中係黄泥涌水塘見過係18xx嘅。
過完水壩再行前少少就上返嚟大埔道。
又有地圖可以望吓,跟住會跟麥徑嘅路行一段,去到鷹巢山就會再轉返落去大埔道。
好喇,過完馬路就繼續行程。
開始進入麥徑第5段,其實呢度亦係鷹巢山自然教育徑入口,如果唔想兜麥徑係可以直接由教育徑去鷹巢山,會快好多嘅。
不過同朋友一齊就梗係兜要遠少少,結果行餐慒先至嚟到(有少少後悔)。
上完幾級樓梯之後就轉入去自然教育徑。
再行多一少段路就嚟到落山嘅路口。
個牌寫住蘇屋,其實落到去只係大埔道嚟。
其實呢段小徑唔算崎嶇,不過條路難唔難行呢嘢好主觀,你覺得容易可能有人覺得難(好似我朋友咁)。
開始聽到馬路下面啲車聲。
就快到出口了。
小徑嘅出口就係大埔道。
出嚟之後轉左,沿住行人路落去。
行一陣見到條行人天穚就經佢過對面馬路。
落穚之後繼續向下行,左同右兩條路都係一樣嘅。
繼續喺橋底之間穿插~
一直行到落嚟嘉頓,就用呢度做今日行程嘅終點啦。
執番啲嘢食返屋企先~
路線記錄
Total climbing: 1667 m
Total time: 06:19:18
發表迴響