今日想去西灣山炮台行吓，照習慣都一定會串埋其他路嚟一齊行。不過問題係自己對呢一帶唔多熟，行過嘅山徑亦都唔多。所以今次只係行短線，試行西灣濾水廠同埋猛鬼橋，跟住就搭埋過去自從中學時期之後都冇再去過嘅西灣炮台。結果因為行咗第二條路冇去到猛鬼橋，而上到西灣山又發現有唔少小徑。有理由比自己遲啲再嚟行多次，今日就當係探路啦。
路線：小西灣>馬塘坳>大潭峽>西灣濾水廠>大潭道>柴灣道>西灣山炮台>柴灣道>筲箕灣
全長：8.13km
時間：3小時28分
今日起點係喺小西灣海濱花園入面嘅龍躍徑，座狗鐵嚟到柴灣站再轉47M小巴喺運動場站落車就可以。如果想行過嚟其實都唔係好遠，由A出口出行人天穚之後一直行就去到小西灣。
一出站就會見到青年廣場，好耐之前入去行過，不過家陣有武肺要用安心上路就無謂再入去喇。
喺行人天穚落地之後繼續沿柴灣道一直去。
行多陣就經過漁灣邨，其實冇乜特別嘢好睇，只係經過見到影張相咁解。
镜頭一轉就已經嚟到海濱花園入面龍躍徑入口，行樓梯上去跟住條路一直行就會到歌連臣角道。
沿龍躍徑一路上山，大約行1公里就嚟到哥連臣角道，之後就接呢條樓梯繼續上去。
樓梯口有地圖，跟住落嚟係沿郊遊徑一直行，先經過馬塘坳之後再去大潭峽。跟住就到正場由大潭峽行去筲箕灣。
上完一大段樓梯之後又再落，跟住再接一段平坦嘅引水道。
行完段引水道之後就嚟到馬塘坳，跟住係另一段好易行嘅石屎路。
再行多大約1公里多啲就嚟到超多人嘅龍脊入口，當然唔會埋去同人迫啦，繼續沿路行落去巴士站。
行到郊遊徑尾就會見到落石澳道嘅指示牌。
落去石澳道之後要向前行一少段馬路過去大潭道。
由石澳道出大潭道除咗要行一小段冇行人路嘅馬路之外，出到去大潭道喺迴旋處再過馬路其實都有小小危險嘅。我比較鐘意經斜坡維修道行過去，咁就可以避開喺迴旋處過路。落地位置就啱啱好係行去西灣濾水廠嘅路口。
行維修道好處除咗係比較安全，仲會經過機槍堡，未入去參觀過嘅不妨睇吓。
沿維修道繼續行，最後就落返嚟大潭道，右邊就已經係落濾水廠嘅路口，fit晒。
一直沿路行去。
落咗一段路之後嚟到一個路口，右邊有個牌寫住柏架山下引水道，行入去有啲似係水務設施嘅建築。左邊就見有人喺渠口位寫咗柴灣兩個字，攞張地圖睇吓，似乎兩條路都一樣。咁就行埋落去望吓有乜嘢睇先。
呢條路就等之後再行呢度嘅時候先至再試啦。呢個時候仲未知道行下路就會錯過猛鬼橋一段。
繼續沿斜路落去。
最後落到嚟一個好似地盤入口嘅地方，旁邊有條樓梯可繼續行落去。
落到嚟見一座可能係荒廢咗嘅水廠宿舍。圍封晒冇嘢睇。
似乎可以繼續沿樓梯落去，一於行埋落去望吓。
初時仲諗住跟住要行啲密林路，原來行落條路又幾開揚幾靚喎。
行多陣見到右邊有個樓梯口。
睇地圖條樓梯係落去峰華邨嘅，整得咁企理應該冇乜伏，如果陣間有乜唔對路可以返嚟呢度走佬。家陣先繼續直行睇睇，試吓行出去柴灣道再上西灣山。
繼續行條路都好正常吖～
行多陣就變成咁，勉強見到好似有路向前，估計係繼續通去配水庫嘅。今日冇打算要試啲穿林路(再行可能係爆添)，都係回頭是岸算了。
行返轉頭少少有條向上行嘅樓梯，睇地圖應該係上去先前喺濾水站見到嗰引水道嘅，咁就行上去睇吓先啦。
果然係上返嚟引水道，咁可以繼續照計劃行去筲箕灣喇。
條條引水道都差唔多樣完全冇特別，不過第一次行就影吓佢啦。
沿引水道行多一陣見到下面有個配水庫空地，估計如果之前繼續穿林應該會去到呢個草地。就咁望似乎就算去到都未必有路走，好在冇試。
行前多少少見到鐵絲網邊好似有路落去配水庫，可能有路落走唔定。不過都係唔好偏離計劃太遠，繼續行埋條引水道好啲。
其實今日係一路行一路拎住分地圖嚟睇，可惜郊區地圖比例大用嚟行啲小徑幫助不大。通常都要去到啲大嘅路口位先至知啱唔啱路，呢度應該係繼續直去。
其實如果唔睇地圖，我一定會行出去馬路邊而唔會揀前面條路仔。
繼續行嚟試吓。
行多幾步最後都係出返去馬路邊，即係大潭道。
又再出到嚟大潭道，其實最簡單係沿行人路一直行落去柴灣道，不過行山就試吓盡量行少啲行人路啦。過對面再上引水道行。
之後嘅一少段引水道，其實仍然係先前嗰條柏架山下引水道，一樣係冇乜特別嘢睇。
好快就嚟到引水道盡頭，見到條車路。
行出嚟之後左望右望睇咗一陣，安全簡單做法係沿車路落大潭道。不過咁就行多咗啲冤枉路有少少戇居，一於試吓行上去睇下有冇路先。
行上少少發現路邊有個樓梯口。
直覺覺得係有路可以落柴灣道，落去睇吓無妨。
落嚟見到係一條引水道，右邊就有一條泥路小徑嘅入口。睇情況冇十成都有八成係有路可以落去。
嘩，有個好靚嘅指示喎。咁都差唔多可以肯定呢條係街坊晨運客嘅主徑嚟，一於繼續落。
得咗～見到熟口熟面嘅柴灣道。
落到嚟柴灣道口跟手過斑馬線去對面行人路。
之後沿行人路一直落斜。
嚟到見鯉魚門公園個路口就轉上去。
原本諗住沿車路一直行上去，點知喺路口見到有個山友由抽水站旁邊條樓梯行落嚟(即係有路啦)。咁不如就試吓行樓梯上去。
條路唔錯喎，郊遊徑feel。
原來條小徑唔可以直接行到上炮台，冇耐就接返條車路。
繼續沿車路行上去，冇耐就見到啲屋。以前啲軍事設施真係一望埋去就知，無論係邊度見到啲”建築風格”都係一樣。
到咗炮台了，呢度有啲特別，個炮台係喺間屋上面嘅。
見屋頂有啲枝架同墻身呢個圈，唔知會唔會係以前整嚟吊啲炮彈上去用嘅呢？
同平時見開嗰啲有個圓形地基嘅炮台唔同，呢度得外圍有幾幅石屎墻。睇介紹資料話呢度係防空炮台嚟嘅，照咁諗打飛機同打船枝炮當然係會好唔同，咁就知點解個地基同平時見嗰啲唔同。
炮台附近有好多介紹炮台歷史嘅資料，不過我通常都唔會有耐性企定定睇。影晒佢返屋企慢慢睇仲好。
除咗兩個炮台地基遺蹟，山頂仲有其他建築物，不過就見唔到有介紹資料。唔知會唔會係以前嘅瞭望台之類嘅嘢嚟呢?
睇呢啲鐵欄杆嘅樣夠晒古典，分分鐘係由day1已經係咁喺度。夠晒歷史價值。
呢其好似話好興搵啲界石，唔知呢個會唔會係其中一個軍事界石嚟呢?
再四維行吓，見到有個好奇怪嘅拱門。照計冇乜理由咁戇居整條樓梯上去一個掘頭拱門嘅，九成係炮台堡壘荒廢之後就封咗個入口。
睇完嘢就原路行落山，冇耐就行到嚟渡假村閘口。本來係諗住行先前用嚟上山嘅小徑落山，不過自己冇留意行到過咗龍，一於將錯就錯由呢邊落去啦。
閘口旁邊有條小徑可以行。
行咗一大段斜路之後又再返到嚟柴灣道了，跟住就轉右落去筲箕灣。
行到落嚟阿公岩道口，可以繼續沿柴灣道向下行，亦可以轉入去阿公岩道經明華大廈落筲箕灣。
話說細個嘅時候有親戚住喺明華大廈，所以間唔中就會嚟呢度。已經好多年冇嚟過，家陣經開就順便轉入嚟行吓。
N年前同啲表哥表妹喺走廊玩，呢度咁多年嚟好似都冇乜點變過。
最後落到嚟金華街嘅城隍廟， 係咪應該要入去求番枝好籤呢？
好，今日就用筲箕彎電車總站嚟做終點啦。
路線記錄
Total climbing: 665 m
Total time: 03:28:24
發表迴響