經常都會去行棧道當做運動，發現因為疫情關係近來多咗好多人去行，但見個個都唔戴口罩實在係有啲危險，不如今日試吓㨂條少啲人行嘅路線嚟避吓人潮，等自己可以除罩吸吓新鮮空氣。今次由䃟石村上去彌勒山轉向站，大致上係由棧道對面嘅另一邊山脊上。結果計劃好成功，由䃟石村開始上山直到轉向站全程都冇遇到人，可惜係路況有啲變化攪到自己損手爛腳(堅係太少人行了)。
路線：東涌>逸東>東澳古道(䃟頭)>彌勒山轉向站>彌勒山郊遊徑>昂坪市集>360救援徑(昂坪棧道)>逸東>東涌
全長：17.84km
時間：5小時15分
今日天氣麻麻地冇乜陽光，今日未必可以睇到靚風景了。
跟住沿東堤灣畔旁邊行人路出發。
行到見隧道就轉入去，之後沿單車徑旁邊行到見隧道口就轉右。
上路面之後就一直行，其實就係去行東澳古條路，所以都冇必要再講多了。
鏡頭一轉已經嚟到古道，天色仍然係麻麻哋。
經過棧道入口之後，繼續沿著東澳古道行多一段
行行吓見到纜車喺頭頂經過，應該都算係景點嚟。
再行多陣見路旁多咗條好闊好新企理嘅樓梯，之前唔覺(可能冇留意)。段估通去山墳(係山徑機會不大), 不過通去墓地嘅樓梯又好少會做到咁闊，一於行上去八吓先。
沿樓梯上咗一陣嚟到盡頭，乜都冇。唔多覺眼有小徑入口，沿路亦見唔到有山墳。咁呢條樓梯起嚟做乜架呢？???
八掛完行返落嚟古道，又變得人頭湧湧。
行多陣就嚟到䃟頭村，鬼咁大個告示叫人入村帶口罩。
轉灣位有隻狗狗喺屋頂見人行過就吠，不過睇落佢唔多似係凶梗人，似歡迎遊客多啲。
士多放咗盤幾得意嘅花出嚟，我係話個花盤幾得意?。
再沿古道行多一陣過咗䃟頭村公厠之後，留意喺左手邊嘅小徑入口(直行係古道)。
由熱鬧嘅古道轉入嚟之後即時變得好清靜，一般郊遊或者行山打咭嘅人好少會行呢段路。
頭段路徑好明顯，之後小徑會收窄，大致上跟住水管旁邊行就得。
其實自己都只係第二次行呢段路，記得第一次嚟嘅時候條路冇咁多雜草。聽講呢段路以前係 KOTH 嘅比賽路線嚟嘅，唔知係咪近年越嚟越少人行呢段路所以生多咗好多雜草出嚟。
唔太肯定係自己記錯，定真係新整咗一條水管。
一直沿水管旁邊行，行到見一到右邊呢條條小溪就轉上去，旁邊有路唔需要行澗嘅。
之後嘅路徑好明顯，有行開小徑嘅應該好輕鬆唔需要搵路。
行吓行吓見到有啲奇怪嘅建築物，後來先至知原來係附近礦洞嘅設施嚟。下次再嚟要慢慢喺附近行吓搵吓有乜嘢睇，不過應該都要等到出年冬天了。
可以好肯定呢段路啲草比起之前濃密咗好多，大部分路都比草覆蓋著，要推開啲雜草一步一步慢慢行，用多咗勁多體力。對腳就比啲雜草樹枝?到花晒，流晒蚊飯?。
唯一收穫係又見到好特別嘅花，唔知叫做乜嘢花，個形有少少依蘭花，不過應該唔係?。
好L辛苦終於都上到嚟見到個轉向站了。
對腳終於有好日子過了，同時要開始上罩?。
嚟到市集，先去厠所洗吓傷口hea一陣先至再出發。
回程了，由棧道返東涌條路會輕鬆好多，全程帶罩都冇問題。
又返到嚟轉向站，天色似乎好咗啲喎。
查實棧道行過N次，好似去運動場跑圈咁，都冇乜嘢特別好影。
結果回程呢段要用70分鐘嚟完成，肯定唔係快㗎喇，不過做吓運動又冇必要吓吓chur住自己嚟追時間嘅?。跟住行出去東涌嗰段會再慢啲。
返到嚟東涌結束今日行程，去食餐好嘅先????。
路線記錄
Total climbing: 1330 m
Total time: 05:15:23
發表迴響