戴住口罩去行山 — 油塘魔鬼石礦場 — 碉堡炮台行個圈 • Samson's Blog

魔鬼山山頂碉堡同附近嘅歌賦炮台因為上落容易成為咗郊遊熱點，但喺山腰嘅砵甸乍炮台因為入口唔明顯同要穿林而相對少人行。不過近年開始見到啲路越開越闊，好多草同小樹都清走咗。家陣行山資訊爆炸，門檻低又有趣嘅地方都好難可以再收收埋埋自私行。講到底”其實自私”背後其實係擔心隨住多人行而帶嚟嘅真正自私鬼，嗰啲亂掉垃圾嘅福街。既然家陣都揚晒，就唔差在我喺自己個樹窿講埋一分，出個post自娛一吓同做個記錄。

路線：鯉魚門邨>歌賦炮台>魔鬼山碉堡>砵甸乍炮台>探射燈塔>石礦場>鯉魚門海濱
全長：6.68km
時間：2小時30分

起點係油塘鯉魚門邨旁邊嘅高超道，邨下面就係巴士總站，唔想座狗鐵可以考慮座巴士嚟。沿行人路直去，行到見到華人永遠墳場個入口就轉上去。

呢度個斜坡工程都好似攪咗好耐。

一直沿斜路上，行到見到左邊條樓梯就過馬路行上去。

上樓梯之後會見到左邊同右邊都有山徑可以行，其實兩邊都一樣可以上到山頂，不過十個有九個都會行左邊上嘅。所以每次見到人多我就會揀右邊條路嚟行。

話咁快就行到上嚟歌賦炮台，今日呢度好熱鬧。

炮台下面係彈葯庫。睇墻身另一邊之前應該係有個屋頂嘅，全部都塌晒囉。

睇完炮台就繼續上山頂，行到嚟見到呢個分岔路轉左同轉右都可以。大部分人都會跟指牌轉左，所以行右邊會少人啲啲，仲可以睇多一個碉堡添。

印像之中呢度之前好係密林嚟(唔肯定自己有冇記錯)﹐感覺好似啲樹比人暫晒咁🤔。

再行多陣就上到嚟山頂嘅碉堡，難得啲人啱啱換位比我影到一張冇人嘅相。算係近年少有。

行去另一邊影多張魔鬼山嘅招牌維港景先，今日個天好清可以清楚望到太平山山頂。

呢度除咗靚風景，其實仲有紅葉睇嘅。可惜呢棵樹健康麻麻哋，啲葉唔多仲比蟲蛀晒。

喺山頂打完個白鴿轉，跟住就由碉堡嘅另一邊小徑落山。

又再落到嚟馬路邊，跟住過馬路轉左，開始今日嘅正場。

一直沿行人路去，行到見到右邊呢個路口就轉落去。留意繼續行前少少有個涼亭嘅地方，嗰度有有條樓梯行落去，落去之後行一陣就可以去到安聯古道，睇到個生鏽門牌。不過今日冇打算行過嗰邊。

之後就沿呢條小徑行出去。

都有一段時間冇行呢段路，似乎早排發生過山火，附近啲草全部都燒晒。

再行多一陣就嚟到砵甸乍炮台，見到第一個炮台。跟住兜去另一邊就會見到去第二個炮台。

(回帶1) 話說2014年第一次嚟，嗰時啲草比人清走晒仲未再生出嚟。

(回帶2) 到2017年買咗第一隻航拍機，嚟呢度拍咗個炮台全景。可以見到嗰時仲有棵大樹喺正個炮台中間。

舊年再嚟嘅時候棵樹好似比人連根拔起咁，淨低個窿喺度。

除咗兩個炮台，呢度附近仲有啲屋。但唔知係唔係全部都屬於以前嘅軍事設施，呢舊嘢就睇嚟睇去都唔估唔到係乜嘢嚟。聽講話呢度附近之前英軍撤走大炮之後附近村民就攞咗嚟用，到底呢啲係唔係後期嘅民間建築嚟呢?

舊年年頭嚟嘅時候都仲要穿吓林，家陣越嚟越多人嚟啲林同雜草好多都比人清晒，變得好好行了。

呢段路直頭清到差唔多認佢唔到。

繼續沿路落去，冇耐就會見到有座石屎建築物。

路邊有個好奇怪嘅石屎大圖餅，上面有個牌寫住禮明徑。呢個牌又係近年先至出現，其實整還整，冇乜必要釘塊牌上去呢個咁特別嘅地標上面啦。

轉埋個灣就落到嚟發電站，以前英軍啲軍事設施設計同外形都係大同小異。發電站喺山上面比較高嘅位置，然後下面懸崖險要位置就有探射燈塔。就好似之前好出名嘅歌連臣角大電視咁，可惜最後都因打風吹爛咗，冇埋了。

呢個發電站比起歌連臣角嗰個大好多。

吖～估唔到以前人影都唔多隻嘅地方，家陣竟然有人嚟晒臘味。。。

繼續沿小徑行落去，嚟到呢個分岔路口就靠左行落去。睇完兩個探射燈塔之後就要原路上嚟再經右邊條樓梯上返去炮台。

再落多少少又會有一個分岔路，各自落去兩個探射燈塔。

呢邊風景比較靚，先嚟呢邊影吓相。

如果個屋頂仲喺到，呢度應該一早就成為咗打咭熱點。

沿小徑行去另一邊嘅射燈塔。

呢邊方向望到南灣半島，感覺唔太好。

喺呢邊嘅射燈塔仲可以望到石礦場，但如果企喺石礦場嗰邊望過嚟，其實唔係咁容易留意到嘅。見過有啲人喺礦場沿石崖邊行過嚟，其實都有啲危險。最好都係由正途經炮台行過嚟啦。

行完兩個射燈塔就原路返上去，後接另一邊小徑返去炮台。沿路會經過一啲另類景點，就係一排山墳。行山遇到山墳並唔出奇，不過呢度幾個墳應該係空嘅(當然我冇驗証過啦，望落係似嘅😅) 。聽講話以前英軍掉走大炮之後碉堡設施荒廢，啲村民就開始佔用留底嘅地方。後來仲攞埋嚟做山墳，呢度話晒都係軍事用地(雖然已經唔用) 攞嚟做墳又實在有啲過分，當年政府就下令要啲人清走。所以最後留底咗啲空墳喺度。不過呢個都市傳說真確性有幾高就唔知喇，當係聽吓故仔都唔錯吖。