今日去行南區海濱長廊嘅另一段，由海洋公園站出發行入赤柱。相比堅尼地城去海洋公園，呢邊嘅路程會短啲，但無論係風景同空氣都絕對比起行前段好。更重要係呢條路線堅係可以行落個海到，又有近乎係郊區嘅路段，仲有少少山要上。輕鬆得嚟又有行山感覺，去到終點站赤柱可以有後續活動，絕對係得閒就可以嚟行一行嘅路線。
路線：海洋公園>香島道>苗鍾徑>深水灣泳灘>麗海堤岸路>淺水灣泳灘>天后公園>南灣道>赤柱峽道>環角道>馬坑公園>美利樓
全長：8.13 km
時間：1小時59分
狗鐵海洋公園站 C 出口落地面。
之後轉右，沿著橋底行人路一直行。
行多陣就發現路邊有個咁嘅地圖板，介紹呢段所謂嘅南區海濱長廊。其實當中冇一段路係新起嘅，只係沿路加咗啲指示板就將呢啲原來有嘅行人路串埋一齊就叫長廊。
通常都係由赤柱或者係淺水灣行出嚟海洋公園，今日應該係第二次掉轉頭行入去。
繼續沿香島道行。
嚟到前面呢個唔多似係入口嘅地方行落去。
一轉落嚟就見到苗鍾徑個牌，落去之後就可以一路沿著海邊行。吹住海風都幾舒嘅。
行多陣就會見到深水灣。
沿住海邊行成個海灘都好多人，游水嘅游水，玩水嘅玩水。就係冇人會因為呢個告示而唔落水
離開深水灣繼續沿海邊行，下一個站係淺水灣。
前面段叫麗海堤岸路，再行多一陣就會到淺水灣。
呢座弧形嘅豪宅係淺水灣地標建築，離遠望都好易認得到。
藍天白雲咁鬼好天，真係正到爆。
其實海灘旁邊有一個比較少人留意嘅機槍堡，早前睇書知道深水灣同淺水灣都有二戰時嘅機槍堡。不過如果唔係有心搵，就咁行過未必會留意到。家陣佢只係淨得個頂，其他都埋咗喺沙下面了。應該係因為改建泳灘時要倒大量海沙埋咗，而唔係陸沉?。
呢個好似煙囪嘅柱係要嚟比堡入面嘅士兵睇水用嘅。
難得見到有個牌喺到介紹，估計政虎至少會’保育’ 呢個戰時遺跡，就算唔理都唔會拆咗佢。
冇耐就行到嚟海灘盡頭嘅天后廟，好少有咁清靜。
呢到叫天后公園，但又咁大個觀音像喺到。
呢條叫做長壽橋，係咪行過就會長壽啲嘅呢？
喺海邊參觀完，由廟旁邊嘅路行去後面。
上嚟之後又有另一個花園。
唔好講話外國遊客，就連我呢啲地道港燦都覺得特別，次次嚟都會睇吓。
睇完嘢就上嚟南灣道，跟住又沿行人路直去。
一路行一路行，留意住左邊，行到見樓梯口就過馬路上去。
樓梯口有個牌好易認。
上完樓梯之後係一段比較避靜嘅小徑，沿路都有樹陰行起上嚟都算舒服。
行到尾沿樓梯上去。
上嚟之後就係淺水灣道嘅巴士站，跟住要轉右過馬路，行去赤柱峽道。
一直行到前面路口過馬路。
過去對面就會見到落去環角道嘅樓梯口。
見到呢個牌就知冇行錯。
跟住就沿呢條樓梯落去。
落嚟之後就就轉右，沿環角道嘅行人路一直落去。
行到迴旋處過去斜對面嘅觀音寺。
今次由正門入去。
又影吓個觀站先。
前門入，後門走。
觀音寺後門一出嚟就係馬坑公園嘅入口，跟住轉上去就可以落去赤柱市集。
路線記錄
Total climbing: 324 m
Total time: 01:59:15
發表迴響