琴日行完山理應休息一下，但係見到咁好天又忍唔住想出嚟行吓。今日一於輕鬆啲，搭埋幾段容易嘅路嚟行，全程大至上係平路或者係微斜。由南區出發，先沿海邊行去淺水灣再上赤柱峽道，之後接孖崗山引水道行返轉頭去淺水灣坳。再上紫蘿蘭山徑過黃泥涌，接布力徑甘道同白加道上頂，最後座巴士走人，行上唔行落，膝頭好安樂✌?。
路線：海洋公園站>苗鍾徑>深水灣>麗海堤岸路>淺水灣泳灘>南灣道>淺水灣道>赤柱峽道>孖崗山引水道>淺水灣坳>紫蘿蘭山徑>黃泥涌水塘>布力徑>甘道>白加道>山頂
全長：22.7km
時間：4小時56分
座狗鐵去海洋公園站出發，喺C出口出嚟轉右沿行人路直去就得了。
行冇耐就見到南區海濱長廊嘅指示牌，路線終點係赤柱。今日行程會跟住長廊一路去到赤柱峽道，之後就會轉入小徑上去引水道。
沿香島道行多一段路嚟到見到前呢個路口就行落去。
落樓梯之後就嚟到呢條沿住海邊興建嘅苗鍾徑，一邊行一邊吹吓海風都幾鬼舒服架。
搭晒棚唔知整乜鬼呢？
沿苗鍾徑行到尾會上番去香島道，繼續再行前少少就係深水灣。
泳灘唔開一個人都冇，好啱影相?。
離開深水灣繼續行多一陣接入嚟麗海堤岸路。
一個人都冇嘅淺水灣，影到嘅機會唔多。不過因為瘟疫而封嘅就真係可免則免啦。
少咗人出街，就連天后公園呢邊都冇乜人。
有個藍天撞啲黃色落去影相特別靚。
天氣好影乜都覺得靚啲。
穿過公園後面嘅拯溺總會上到嚟南灣道，跟住就繼續沿行人路直去。
再行多一段路就由左邊呢條樓梯上去，之後一直行到尾上去就係赤柱峽。
呢段小徑由之前鬼影都唔多隻到依家人來人往，自自然然就會出現啲冇公德心嘅自私鬼。兩個口罩一大一細掉落地，即係大嘅唔教細。咁細大咗都唔識教番細，一代一代咁將陋習傳落去?。
小徑盡頭上到嚟見到巴士站。
吖～有啲攰，好唔好座車走呢？???
由巴士站再向前行就係赤峽。
過去前面有條樓梯可以落去赤柱，而繼續直去就係上引水道嘅小徑入口。
前面路牌個位置就係上引水道小徑入口，其實係一條斜坡維修道嚟嘅。
過馬路之後就會見到呢個維修道入口，跟住行上去。
行上少少之後就轉右，小徑入口好明顯好容易見到。
沿小徑再向上行多一少段就會上到嚟引水道。
上到嚟又長又悶嘅孖崗山引水道，向淺水灣坳進發(即係兜返轉頭)。
行咗一陣又再見到淺水灣，不過家陣住置就高咗好多。成個海灘好平靜，一個人都冇。
行餐飽終於嚟到淺水灣坳，今日呢到好熱鬧喎(其實假日通常都多人)。
跟住就沿石級上紫蘿蘭山，只係上一少段之後就會轉過去紫蘿蘭山徑。
上到嚟見到山徑個指示牌就轉右。
嚟梗又係一段鬼咁長嘅路。
離開淺水灣越嚟越遠了??。
跟住嚟到山徑盡頭。
靠右邊直去，之後再轉左上樓梯就係黃泥涌水塘。
總係覺得以前有得撐艇仔嘅水塘靚啲。
由水塘出嚟再沿大潭水塘道落斜。
一直行到見到巴士站就過馬路，之後再轉右行前少少就會見到布力徑入口。
轉過嚟布力徑繼續行程。
見到涼亭繼續直去，
完成布力徑嚟到灣仔峽，過埋馬路再直行就係甘道。
繼續沿甘道上去。
上到嚟山頂道就轉左，沿行人路行剪少少就會見到白加道入口。
跟住一直沿白加道行到尾去纜車站。
沿路行有無敵靚view???。
嚟到白加道站可以影吓纜車。
轉埋個灣上嚟就到咗山頂廣場。
跟住梗係繼續上埋山頂公園先啦。
嘩～咁多人嘅～影張相拿臨走人。
離遠望過去西高山山頂見好似企滿晒人，睇嚟之後一段時間都唔全再上去西高山。
行咗咁耐都冇食過嘢，係時候食個午餐?。
食完嘢休息完就落山。轉個頭又返到落嚟山頂廣場，今日行夠了，座車走人。
嘩~乜有咁鬼多人排隊座巴士。。。應該上到車呱？
路線記錄
Total climbing: 1487 m
Total time: 04:55:44
發表迴響