今日想去睇吓早排好多人去嘅赤柱古橋。最直接嘅方法係座6號巴士，去到赤柱峽嘅衛徑起點行落去。不過以我性格可以行到過去嘅地方又點會座車呢，梗係由海洋公園行過去啦。但就算行多兩個海灘計落路程好似都仲係短咗少少，咁不如就行遠少少去埋小西灣啦。咁兜法雖然好似有啲長，其實成個行程除咗孖崗山一段比較吃力之外其他路段都算係易行，人流亦唔算太多，當做吓運動行吓都唔錯。
路線：海洋公園>深水灣>淺水灣>赤柱古道(古橋)>赤柱峽道>孖崗山(徫徑1)>淺水灣坳(紫崗橋)>大潭西引水道>大潭中水塘>大潭上水塘>大潭道>石澳道>馬塘坳>龍躍徑>小西灣
全長：30.35km
時間：5小時35分
自從南港島線通咗車之後，海洋公園(站)變成一個我經常嚟嘅地方，以行山嚟計呢度係一個好方便嘅起點同終點。今次行程又用海洋公園站做起點，由C出口起步，第一站係行去深水灣。
跟住馬路旁邊嘅行人路一直向前行。
行到嚟呢個轉灣位就會見到有個樓梯口可以行落去。
落去之後就係苗鍾徑，係一條沿海邊起嘅步道。唔駛喺馬路邊吸住廢氣，好舒服咁行去深水灣。
正喎，今日成條路都冇乜人。
轉個頭就行到嚟深水灣，泳灘開放番就梗係要落嚟行吓啦。
尖尖嘅就係南朗山，早排行過一次見上面風景唔錯，遲啲要再去多一次。家陣先享受吓浪聲同海風?。
離開深水灣繼續行，接入海濱長廊嚟另一段麗海堤岸路。
行完條堤岸路就嚟到淺水灣了，正喎~又係冇乜人。
差不多每次嚟到淺水灣都會過嚟天后公園呢邊打個轉，影幾張相先至走。除咗影相，想行去赤柱過嚟公園亦係最順路嘅方法。
影完相跟住就由廟後面嘅樓梯上去南灣道。
上到嚟南灣道就沿行人路繼續去。
一直行到見左邊呢個樓梯口就行上去。
上嚟之後係一段小徑，以前好清靜，近來多咗人行就變得好熱鬧。今日又回復平靜了。
唔知點解今日四維都好似冇乜人咁，近期少有。
行到小徑嘅盡頭再上去淺水灣道，差唔多到赤柱了。
跟住再行前少少，轉埋個灣就係赤柱峽道。
再行前多個路口就會見到南區海濱長廊個牌，跟住由旁邊個樓梯口行落去。
沿樓梯一路落一路留意住左手邊。好快就會見到一條好明顯嘅小徑入口，跟住就要擒欄杆出去。
有山友喺樹上面綁咗個指示牌，應該好難會見唔到。
一路沿小徑行，沿途見到啲石碑，睇個樣都應該有啲歷史。
連地下都有喎，不過呢個個樣似乎係近代少少。
再行多陣見到條水管就由旁邊條泥路行落去。
行落嚟之後就見到條古橋了，喺上面行過真係唔會知道原來下面係條拱橋嚟。
橋嘅另一邊見到有個依係排水窿嘅物體，可惜開始有一大團人行咗落嚟，都係快啲走人去埋下一條橋影相好的。睇吓第時有機會再嚟就擒上去睇吓。
拿拿臨繼續沿古道行，冇耐就嚟到見到第二條古橋。
一樣係由旁邊行落嚟，呢條個拱門比起啱啱睇嗰條細好多。
影完條古橋行返上嚟，行前少少就見到有兩個指示牌。直行可以去到赤柱廣場，轉左上就係赤柱峽道(亦係衛徑入口) 。
今日諗住行去小西灣，所以要上去衛徑。
離遠見到個郊遊徑地圖牌，即係到衛徑嘅起點，亦行完咗呢段短短嘅古道了。
都有一段長時間冇嚟過呢度，原來路口有人整咗個牌，咁就包唔會搵唔到入口喇。諗起好耐以前行完孖崗山落到嚟，見地圖上有條小徑可以落去下面，試過喺附近草叢搵入口，但見到個馬坑監獄警告牌就嚇到走頭了。
回帶～ 當年試過搵地圖上面嘅小徑入口，但搵吓搵吓搵到個警告牌。之後已經打消咗呢個念頭冇再諗住行(當年比較驚死)。點估到家陣會變成熱門路線。
好喇，之前行嗰啲當熱身，上到嚟衛徑先至算係行山。
行咗一少段樓梯就上到嚟赤柱西引水道，如果唔想行得辛苦係可以經引水道行去淺水灣坳嘅(全程平路)。不過行山做運動總唔可以太hea，一於繼續上孖筋山啦～ 吖，孖崗先啱?。
繼續上山之前想行過嚟望吓盡頭嗰小徑入口，以前未知道有其他路線落赤柱嘅時候試過由呢度剷上去接赤柱東引水道。呢條小徑唔係咁多人會行，家陣有條好行嘅路就更加唔會揀條咁崎嶇嘅路嚟落赤柱喇。繼續行程上孖筋～
好L辛苦咁上咗一段樓梯，可以離遠望返落去赤柱。影完相就拿臨繼續上路了。
鏡頭一轉就黐完條孖筋落到嚟淺水灣坳，跟住仲要再上多一少段樓梯先可以駁到去引水道。
轉個頭就上到嚟連接紫蘿蘭山徑嘅十字路口，跟住就轉左。其實都唔係好明點解路口三條路都有指示，淨係呢條去大潭嘅冇，條路又唔係難行有乜嘢危險點解唔做指示呢。不過都好，部分人唔知條路去邊就唔行入去，咁呢段路就少人啲。
一路沿山徑行，中途可以離遠望到大潭中水塘。
行一少段山徑之後就連接到嚟大潭西引水道，之後行晒條引水道就去到大潭副水塘。
引水道途經通去員工宿舍嘅小徑嘅入口，上次行完好似都有一段時間了，今日又入去行個圈先。
宿舍廢墟入面最特別就係呢碌嘢了，完全諗唔到佢有乜嘢用途。
個痰罐自己冇腳，但每次嚟個位置都有唔同。唔知會唔會係啲人用佢嚟影相，定係嫌佢阻住搬開佢呢？搬還搬，小心啲唔好整爛呢件古董呀。
架運泥車唔見咗，原來比人掉咗入嚟呢度。
今日時間多可以再四維行吓，行吓行吓行咗落嚟水塘邊。
呢個位影相又幾靚喎，有晒倒影成塊鏡咁。
加埋今日藍天白雲咁好天真係好正~
影飽相原路行返轉頭上引水道，轉個頭就行到嚟出口。
轉個頭就行到過嚟上水塘，跟住沿港島徑上多一少段，之後就轉過去行另一條少啲人嘅路。
行到嚟呢個路口，見到柏架山上引水道個牌就轉右。如果繼續行上就會上到大風坳架喇。
右邊呢條係港島林徑，行呢邊可以接小徑落去大潭道。亦可以兜個大圈避人行上大風坳。
呢段路通常都比較少人行，又可以除吓個罩吸啲新鮮空氣。
沿石屎路行到盡頭會見到大風坳嘅指示牌，繼續跟泥路山徑向前行。
留意住右邊，行一少段之後就會見到有一個好明顯嘅小徑入口。
呢條小徑越嚟越多人行，估唔到家陣仲有人拉埋繩。其實呢啲路實在係冇咁嘅需要，綁吓絲帶咪算囉。如果行啲咁普通嘅路都要靠繩，其實係唔應該嚟行小徑。
轉個頭就行到嚟出口，見到條維修道了。出去之後就轉右。
行落少少嚟到斜坡邊，下面就係大潭道連接石澳道嘅迴旋處。左邊同右邊都有樓梯可以落地面，但係由左邊落去就啱啱係啲車嘅轉灣位會比較危險。只適合由對面過嚟上山用，今次反方向落大潭道比較安全做法係行右邊。
維修道落地面就係馬路，冇行人路。所以喺轉灣位過馬路視線受阻有車嚟會睇唔到就會比較危險，由石澳道嗰邊過行上嚟問題不大，反方向行就唔好了。
今次就行右邊落去。
落嚟呢邊嘅大潭道兩面嚟嘅車都睇到，咁會安全好多。
跟手就行入石澳道。
今次咁好彩一架車都冇？行到過去見到原來係有架巴士埋站上客所以頂住晒啲車，可以好似大爺咁行。
無驚無險過到嚟，跟住行埋條樓梯上去就可以接郊遊徑去小西灣喇。
行咗一陣就經過上龍脊嘅路口，開始進入港島徑第一段嘅路線。呢度一般嚟講都會聚埋好大班人，冇乜必要都係唔好喺呢個位停低。
未有條橋之前覺得呢個位影嘢冇乜特別，家陣多左條橋感覺又唔同晒喎。
行吓行吓又行到嚟馬塘坳涼亭，繼續直去係一段引水道。
過咗呢個指示牌就唔再係行梗港島徑路線，距離小西灣就仲有一段距離。
唔係好記得對上一次行係幾耐之前，今日行發現有舊大石比人油白咗仲寫咗啲字上去。
繼續上路，跟住再落一段樓梯，就快行完了。
落完大段樓梯之後就嚟哥連臣角道，跟住轉右。行落少少就會見到有路可以接龍躍徑。
差不多到出口了。
估到臨尾都仲有特別嘢睇，比我喺樹上見到好可愛嘅松鼠仔，仲要出奇地唔係好驚人(通常離開九丈遠就走咗) 。可能係比附近啲街坊餵慣咗開始唔驚人，雖然有得影係過癮，不過其實唔係好事嚟。
最後落到嚟運動場嘅樓梯口，係龍躍徑嘅終點。
跟住由運動場出嚟之後再行前少少就係南灣廣場，嚟到今日最後一個”景點”。行程結束去食嘢~
行咗咁耐都冇食過嘢，喺donki食個蛋先。
路線記錄
Total climbing: 1255 m
Total time: 05:34:59
每次買完新版地圖會對比吓有乜嘢分別，通常都唔搵唔到攺咗啲乜。今次行程無意中比我留意改版嘅分別，原來2009年嗰時呢段古道係實線嚟，但2015版開始就變咗虛線(我只得09, 15, 20三份嚟做對照)。其實呢條路點睇都唔似係橙虛級數嘅路段，反而家陣條路有人開闊咗，應該連上去赤柱峽道嗰一小段都轉做橙實先啱。
發表迴響