今日想試吓去行南朗山，但係如果直接座車由黃竹坑起步好似太過短癮。對住張地圖諗吓有乜嘢方法可以串埋其他地方一齊行，結果諗到條屎穚試吓由班納山行落黃竹坑再行去南朗山。之不過班納山本身都唔係落車行一陣就去到嘅地方，所以又加插行吓香港仔水塘上山。再諗吓去香港仔水塘座車都唔太方便，不如就近近哋由灣仔行過去順便睇埋個子午石。咁落得去灣仔又冇理由唔四維行吓，結果又行埋灣仔海濱同藍屋。左搭右搭就計劃咗今日行程，去兩個未行過嘅地方睇嘢，當中大部分路段唔係行過就係大路嘅山徑。唯一由班納落黃竹坑一段未行過唔知道路況，諗住大不了最多就原路返轉頭敗走。結果同預期差唔多有少少穿林路要行，但大致上路況都叫可以。識多一條可以打通去南區嘅路線。
今日頭段只係灣仔碼頭行去起點灣仔峽道之間睇嘢記錄，同行山無關嘅。
路線：灣仔碼頭>灣仔海旁主題公園>太源街>藍屋>石水渠街>堅尼地道>灣仔峽道>寶雲道建身徑>子午石(來回)>灣仔峽>金馬麟山道>香港仔水塘道>香港仔下水塘>香港仔上水塘>班納山>海洋公園道>黃竹坑道>警校道>南朗山道>南朗亭>南朗山山頂>南朗山道>黃竹坑站
全長：19.55km
時間：6小時30分
起點係灣仔碼頭，落船出嚟之後先行吓喺海邊嘅主題公園。
呢條粉紅玫瑰隧道好靚喎。
喺隧道旁邊又有另一條粉紅通道，旁邊放咗啲大玫瑰。
跟住穿過巴士站就係主題公園了。
慌死唔知係維多利亞港，咁啲遊客應該會好鐘意。
呢度全部都係 chocolate rain 公仔，全部都靚，想話影晒都要啲時間。
除咗地下啲畫，圍板上面都有公仔。幾得意喎。
呢啲可唔可以用嚟做招牌相呢吓?。
冇得返鄉下睇櫻花，見到呢幅畫都可以幻想吓。
呢度全九成九都係平面，如果多啲立體公仔就更加好。
呢位靚女好嘆咁喎，等我又影吓你個嘆樣先。影完就走人去行山。
睇個指示牌啱啱行完嗰個係水上活動主題區，粉紅色玫瑰花嗰邊係係渡輪馬頭主題區。不過家陣除咗條圍板通道之外好似乜都未有。
啲幾隻水碼圍板推跌咗，似乎有人好心急想知入面係點情況咁喎。
繼續扮吓遊客影吓天星小輪泊碼頭先。
碼頭嘅另一海旁整咗好多燈箱，全部都係灣仔一帶嘅街道名。就咁睇就唔夠水上活動主題區咁吸引，可能到夜晚開咗燈會好啲。
其實自己成日喺灣仔蒲都冇留意到原來有啲咁嘅街名。
石水渠街就成日都會去，陣間就會行過去。
一路行到嚟會展旁邊嘅萬麗酒店，穿入去就可以上行人天橋過去中環中心。
酒店有扶手電梯上，仲有冷氣可以涼一涼。
之後一直沿行人天穚行去灣仔站。
啲人話重要嘅事要講三次，咁呢個應該係超級重要嘅巴士站喇???。
落到嚟灣仔道，跟住過馬路入去太原街。
太原街有好多排檔，有賣植物嘅，賣嘢食嘅，賣底衫褲嘅，仲有最緊要係賣玩具嘅。真係乜Q都有。
太原街絕對有條件成為遊客必到景點，可能已經係，只係我唔知?。
嘩，有特價叮噹喎。不過呢隻唔多啱心水。
話說掛banner呢檔蛇店都幾出名，好耐之前都同朋友嚟食過一次。
呢檔賣老虎頭背囊嘅都算係呢度特色排檔之一，之前見仲有一隻係白色，掛咗好鬼耐終於都賣出咗了(我估)。
行完太原街去到尾就係皇后大道東，之後出街口轉左。
街口都仲有嘢睇，就係對面嘅舊灣仔郵政局。係法定古蹟嚟架。
繼續沿大道東行，好快就嚟到藍屋。
我估應該每個嚟藍屋參觀嘅都會喺呢個門口影過相打咭。
藍屋地下係香港故事館，入面有介紹以前灣仔嘅資料同好多舊嘢睇。
嘩~呢啲咁舊式嘅收站機實物真係唔係咁容易見到。
藍屋隔離仲有一座黃屋，不過冇開放冇得參觀。
穿入去後巷見到有個叫兔仔里，望落去個路牌好似好堅，但去埋地政處個地圖都搵唔到呢個名。唔知係咪貪過瘾老作出嚟架呢?
雖然話係舊唧，係咪真係古老到會用石啲石磨呢?
藍屋呢度之前係有人住嘅，活化咗之後都繼續有人住。呢啲咁特別嘅係住戶信箱嚟。
啲立體信箱真係好過癮，郵差唔洗上樓都可以＂派信入屋＂喇。
離開藍屋沿石水渠街行上去，行到尾就嚟到石水渠街花園。行入去就會見到有樓梯上去堅尼地道。
石水渠街花園有間北帝廟，係法定古蹟嚟架，如果未行過可以用少少時間入去參觀吓。
今日唔入廟了，直接由北帝廟旁邊嘅公園仔上樓梯去堅尼地道。
過馬之後再沿堅尼地道行上少少。
行到嚟灣仔峽道，正式開始行山。
＞＞＞ 繼續 part-2行程
發表迴響