延續 part1 行程，經過頭段由灣仔碼頭邊行邊睇嘢嚟到目的地灣仔峽道嘅堅尼地道入口。由呢度開始正式行山(雖然都係石屎路)﹐一開波就係大斜路😅。
路線：灣仔碼頭>灣仔海旁主題公園>太源街>藍屋>石水渠街>堅尼地道>灣仔峽道>寶雲道建身徑>子午石(來回)>灣仔峽>金馬麟山道>香港仔水塘道>香港仔下水塘>香港仔上水塘>班納山>海洋公園道>黃竹坑道>警校道>南朗山道>南朗亭>南朗山山頂>南朗山道>黃竹坑站
沿灣仔峽道一直上，行餐死嘅上到嚟人來人往嘅寶雲徑。因為喺市區又交通方便(可以座車嚟)﹐所以好多人會嚟跑步或者散步。而且空氣又好，男女老幼都啱行。
平時由灣仔峽行到上嚟健身徑嘅十字頭口都會繼續直上，今日要轉左行一少段去睇啲嘢，不過就唔係睇姻緣石。
一路行一路留意住右手邊山坡嘅維修道。。。呢個唔多似。
行到嚟呢個有啲似，埋去望真啲先。
似喇，仲有條絲帶喺度。一於行上去望吓。
Yeah, 終於都比我見到你了。呢個係以前用嚟比人較時嘅子午石，喺佢同另一支喺尖咀嘅子午石之間拉條直線就成為咗子午線。當太陽經過呢條線嘅時候就係12點喇，雖然唔知道實際操作係點，但照常理諗當年呢個山頭應該係光禿禿冇樹，如果唔係睇鬼到碌嘢嚟較咩🤣。
喺子午石嘅正前方地下見到個三角形，呢個唔知會唔會係家陣啲三角測量柱嘅祖先呢？1893 即係已經有過百年嘅歷吏了。
影多一張相就走人了。
沿維修道行返落去寶雲徑，原來都幾高架喎。
由維修道嘅另一邊落返嚟健身徑，基本上事但由一邊上都可以，但呢邊就冇咁好”擒”。
維修道口有人綁咗帶，但係唔特別搵未必會留意到。
睇完子午石原路行返去灣仔峽道，跟住轉左繼續上斜去水塘。
最後行到上嚟灣仔峽，呢度要小心過馬路。
嚟到灣仔峽可以接甘道上山頂，又可以接布力徑去黃泥涌，今次就直行入去金馬麟山道再轉落去香港仔水塘。
沿金馬麟山道行一陣就會見到右手邊呢個路口，轉落去就可以去到香港仔水塘。
呢條係水塘路嚟，所以唔會難行得去邊。大致上係一條係咁落嘅大斜路。
港島徑有一少段路同水塘道重疊，所以行行吓會見到港島徑嘅入口指示牌。
好多時行水塘都會見到呢啲封住晒嘅屋仔，有時都攪唔清楚到底呢啲係以前水塘嘅設施，定係軍事設施嚟。
落完晒條大斜路就嚟到香港仔水塘，右手邊有一條樓梯行上去可以接去港島徑。
再行前多幾步嚟到分岔路口，直行就係水塘水壩，轉右就行落去香港仔下水塘。左邊呢。。。有地圖，望吓先~
好，跟住落嚟嘅兜路計劃係先落去下水塘，再沿下水塘邊行返上嚟上水塘。跟住就行小徑過去上班納山，再試吓由另一邊落去黃竹坑。
起行落去下水塘，呢段路比較悶冇乜嘢睇。
冇嘢睇嘅水塘路條條都係咁上下，得個行字。
依？行行吓都有個位望到條主壩喎，影吓相先~
差唔多到了，繼續落。
依？前面好似有嘢睇喎，入去打個轉先。
唔係第一次行呢段路，可能係之前掛住９衝或者係發雞肓冇留意到呢度有個傷健樂園。
兜咗一陣見有個樹木廊喎，點之一行入去就比人叫安心上路，即時掉頭走。
行到嚟水塘出口，嚟一個u-turn轉入另一邊行返去上水塘。
由之前地圖板起點行到嚟１號位置，跟住就兜返去３號嘅上水塘，再兜埋另一邊去４號，之後就上班納山。再落去７號位置嘅黃竹坑。
轉過頭就嚟到下水塘嘅水壩，去班納山其實由呢度過水壩去係最直接，不過今日想試吓兜啲水塘路嚟行所以繼續上。
水塘邊又幾靚喎。
轉個頭又行到返嚟上水塘，見到條水壩了。
路住要行一段樓梯上返去山壩頂。
上嚟之後會見到一個隱藏咗嘅戰時機槍堡，大部分已經比啲石屎封住咗。
繼續行程，行過去水壩另一邊。上到嚟壩頂梗係要影吓相，就咁望落去都好似幾高咁喎。
繼續沿路行多一陣，行到嚟見到呢個指示牌就留意右邊，跟住要轉落去自然教育徑行。
由呢個樓梯口落去。
呢段路相對比較少人行，可以除吓個罩吸啲新鮮空氣。
一直行到嚟見到路口就轉左繼續行上去。
依，又開始見到有其他山友了。
再上一段樓梯之後就繼續上
上山入口好明顯，就喺碌柱旁邊。之後冇分岔路一直跟住行就會到山頂。
班納山西面山脊比較易行，東面山脊就比較斜同崎嶇。如果只係要上班納山，由東面上西面落會好行啲，不過今日行程要由西面上東面落先至順路。
上到嚟班納山山頂，見到枝標了。睇地圖話呢度有214米高。
望一望陣間要去嘅目標南朗山，就咁望埋去都好似幾高咁喎。
落山嘅小徑係有啲斜，但啲路唔跣唔算難行。不過都係嗰句，難唔難呢啲嘢好主觀。唯一肯定係唔會有鋪好咗嘅石屎路或者樓梯，如果想試但行行吓見唔對路就返轉頭。呢條路唔會有唔上唔落嘅情況，就算落唔到都應該一定可以原路返上去到上嚟。
落完一段之後嚟到一條主徑，之後轉右行前少少就會見到繼續落山嘅小徑入口。
落吓落吓嚟到一個石屎壆位，見有張貼紙黐咗喺度。落去之後睇吓，原來係隻好可愛嘅🐷仔嚟。
尾段有啲路比較斜同跣，不過好容易搵到啲樹借力，路況仲算可以。
最後落到嚟似係護土牆嘅地方，右邊有好明顯嘅路，咁梗係跟住行啦。點知行咗一陣就冇路再落，唯有行返轉頭試吓左邊。
穿咗少少林，行到尾先至見到條絲帶，靠佢搵路就屎得了。不過都好，見到佢即刻有路行，可以繼續。
掂~ 見到維修道即刻應該有路走，繼續落去睇睇先。
得咗~ 下面應該係南風道了。之後沿路行出去黃竹坑再去今日嘅尾站南朗山。
＞＞＞ 繼續 part-3 行程
發表迴響