戴住口罩去行山 — 灣仔行去南朗山 – part3

延續 Part-2 行程，開始向今日最後一個景點南朗山進發。由黃竹坑開始行上去南朗山山頂，其實如果諗住只行南朗山，係可以直接座狗鐵嚟到黃竹坑站起步。冇必要行頭嗰兩段，不過如果好似我咁係要搵啲路嚟兜吓就另計🤣~

路線：灣仔碼頭>灣仔海旁主題公園>太源街>藍屋>石水渠街>堅尼地道>灣仔峽道>寶雲道建身徑>子午石(來回)>灣仔峽>金馬麟山道>香港仔水塘道>香港仔下水塘>香港仔上水塘>班納山>海洋公園道>黃竹坑道>警校道>南朗山道>南朗亭>南朗山山頂>南朗山道>黃竹坑站

由班納山落到嚟見到呢條叫做南風道，轉右沿行人路一直行出去黃竹坑道。跟住再轉右向香港仔方向行。

繼續沿黃竹坑道行冇耐就會見到油站，除咗啲車可以入，自己都可以去入吓油。

整枝zero補腳力飲吓，爽晒😄。

跟住喺油站旁邊嘅後巷行出去香葉道，見到一個意料之外嘅景點。

張壁畫咁靚，影咗佢用嚟做wallpaper都得😄。

出到嚟香葉道就會見到黃竹坑站，過馬路之後繼續沿行人路向前行。

前面見到天價新樓盤。

一直行到嚟南朗山道口就轉入去。

之後係一段大斜路。

經過加拿大國際學校見到一個幾特別嘅圖騰。

繼續沿南朗山道上，行行吓有個位可以望到避風塘，第一次嚟要影吓相先得。

之前戇居居行餐懵都影佢唔到，今日冇諗過影佢又比我見到。

行咗一大段斜路終於見到上山嘅樓梯口。

樓梯口寫住南朗亭，過咗亭子後繼續上就係山頂了。

普通山路唔難行，一般郊遊嘅都應該應付到。

上到嚟山頂了，見到個直升機坪。

呢度風景一流，可以近距離望到海洋公園。

另一邊可以睇晒成日深水灣同熨波洲，之前經常喺海邊行望上嚟，今次終於可以由山上面望返落去。

影完相就直升機坪繼續上去山頂嘅發射站，只要行多一段樓梯就到。

上到啲山頂梗係搵吓枝標嚟影張相先啦。

啱啱由班納山望過嚟南朗山，家陣可以掉轉由南朗望返過班納。

沿山頂發射站兜咗個圈，見到有個咁嘅警告牌。原本都唔肯定係咪可以行落䌫車救援徑(之前聽講係公園範圍禁入)，佢咁講一講就即係應該可以行。當然危險性亦係另一樣要考慮嘅事，唔係話可以行就9衝嘅。

今日冇打算要試行落去救援徑，只係行落少少望吓睇吓路況。有機會嘅話第時可能會考慮吓由下面行上嚟都唔定。今日就行住咁多先。

原路落山時見到有拍友set晒腳準備影日落，望落呢個位又真係幾靚，不過時間咁早仲有排等。都係繼續落山實際啲。

啱啱上山時經過冇影到南朗亭，家陣落山補影。

狗衝住上山時冇停底睇，家陣落山大把時間可以行入嚟睇吓呢個(估計係) 由晨運客搭建嘅花園仔。除咗種咗啲花，仲有個大肚佛喺度喎。

上山時冇望後面，落山時知可以先見到海洋公園，呢個應該係新嘅水上樂園。

返到落嚟南朗山道，跟住行返去黃竹坑站。

有巴士站喎，不過啲車全部都唔啱座。都係去座狗鐵算了。

好，嚟到黃竹坑站，今日行完收皮~

路線記錄

今日行程頭段喺市區行GPS接收唔準確出現亂跳情況，實際行程里數肯定會比記錄少。