啱啱行完海洋公園纜車救援徑，沿黃竹坑道一路向香港仔方向行。嚟到香港仔工業學校旁邊嘅天橋底就係今日第二節行山行程嘅起點。其實行之前冇詳細研究過呢段路，只係喺郊區地圖上見到有小徑連接就諗住嚟試吓。結果發現路況唔理想要放棄，又意外地撞咗另一條路行上石排灣邨，順路接水塘道完成目標行程。
路線：香港仔工業學院>漁光道>香港仔水塘道>灣仔峽公園>甘道>山頂道>白加道>山頂廣場>山頂花園來回
全長：9.85km
時間：2小時51分
起點係香港仔工業學校旁邊嘅天穚底嘅公園，其實如果唔係因為有上半場應該都唔會㨂個咁吊腳嘅地方嚟做起點。不過如果由海洋公園行過嚟(其實都遠嘅)都勉強可以叫做順路嘅。
入口一啲都唔起眼，如果唔係有個牌喺度應該會搵佢唔到。
沿住條小徑行，旁邊見到條好好水嘅石澗。
嘩~條路窄到呢~ 唔好講話肥啲過唔到，連瘦嘅都未必過到(shit~卡住咗個肚腩🙈) 。
幾靚，可惜部電話冇M-mode﹐又冇除身帶住塊ND﹐影唔到絲滑流水了。
呢條澗上游係香港仔水塘，所以流落嚟啲水好清。
睇呢啲啲包膠欄杆應該係郊遊徑設施，但條路就唔多”似樣”。唔知會唔會N年前曾經係正式山徑，但起咗條大水管之後就荒廢咗呢？自己行山資歷大少唔清楚😅，郊區地圖係有標示呢段路嘅，不過自己行唔行到又係另一回事。
行吓行吓啲路好似唔多好。其實呢。。。今日嘅狀況真係冇打算行啲穿林路，都係走頭算了。
行返轉頭影吓路邊嘅消防水龍頭，諗吓其實呢條會唔會係以前木屋區啲村路嚟呢？
基於少少好奇心，喺走回頭路出返去之前行入去廢村睇吓先。
有人綁咗繩，即係應該有路走喎。其實啲路都唔難行綁乜鬼嘢繩呢。
行行吓跟甩咗條路，又或者真係冇路。都話咗今日冇諗住要穿林，爆就更加唔使講。掉頭走~
見到另一邊有啲舊屋，又行過去四維望吓先。
發現咗一個舊式屎塔💩💩💩，仲有好懷舊嘅紙皮石。睇吓啲駁位砌得咁靚，估計當時應該算係個靚厠嚟。
依？似有路走喎，剷上去望吓咩環境先。
似係啲公園或者晨運徑咁喎。
擒出嚟見到有個牌都幾攪笑喎，教人企喺碌柱後面避豬撞。整得個咁嘅牌似乎附近應該有唔少野豬，好彩佢哋日頭冇出嚟。
沿樓梯上嚟即時開個 google map 睇吓，原來嚟到漁光道。啱晒喎，沿路就可以行去香港仔水塘。
一路沿漁光道行，經過扶康會康復中心。
繼續行到街口，轉出去就係香港仔水塘道了。
再上多一段斜路就到入口。
嚟到水塘入口，左邊條路直接行去上水塘，右邊條路就會先經過下水塘最尾都可以行上去上水塘嘅。其實應該行左邊多會多啲嘢睇可以影吓相，不過我又做咗個戇居嘅決定揀咗左邊條悶路嚟行。
其實如果唔介意冇嘢嘢睇，去上水塘行呢邊會快啲(感覺上)。
全段路悶到爆冇乜嘢睇，唯一得一個位可以望到條水壩影張相。
終於都行到上嚟了，見啲水滿到瀉，一於行出去水壩影張相先至繼續行程。
話咁快就嚟到水壩頂。
今日係第一次睇香港仔水塘放水。其實水壩個設計係冇得放水嘅，只係啲水滿到邊位就自己瀉出嚟。但係叫放水好似順口啲，都係叫番放水啦。
睇完放水就繼續行程，沿水塘道一路行上去灣仔峽。
行餐飽終於行完條水塘道上到嚟金馬麟山道，跟住就轉左行出去公園仔。
行去公園嘅另一邊出口就可以接去甘道。
嚟到公園仔甘道出口，跟住就沿甘道行到尾上去山頂道。到山頂道之後再轉左行多一陣就會見到白加道入口。
沿山頂道行多陣就嚟到白加道口，跟住就轉入去一路行到尾。
行白加道好處除咗係易行，就係免費有億萬豪宅 view 睇。
繼續沿白加道行。
行多陣嚟到白加道嘅招牌風景位，呢個時候要請今日嘅主角出場影相了。
最後嚟白加道盡頭見到個纜車站，轉埋上去就到山頂廣場。
睇吓條路軌發現新嘅纜車車軌比起之前窄咗。
上到嚟山頂廣場，馬不停蹄繼續上埋去山頂花園先。
上到嚟山頂觀景台，算係登山完畢。影埋張相就可以搵個地方座低食嘢了。
今日天氣好好，能見度高。好清楚望晒成個南丫島，仲有近少少企到滿晒人嘅西高山。
行咗咁耐其實今日重點項目係佢哋，因為慌死買唔到一早就帶埋個保溫袋去買，但買完啲要雪凍嘅 mousse 跟住走去行山就確係有啲特別。所以今日行要啲簡單輕鬆路線，無驚無險咁帶叮噹上山頂影相😆。
一打開隻叮噹，最擔心嘅事真係發生咗。個 mousse 溶晒，一開就有啲黃色嘅液體滴出嚟。隻叮噹好似喺度瀨屎咁。
朱古力呢個情況好好多，仲係維持固體。食完應該唔會肚痛掛？😅😅😅
食完之後即刻拎兩隻叮噹入厠所洗，抹乾之後就可以開始同佢影相了。
你睇佢一有豆沙包就開心到咁😄
食完甜品到食今日嘅正餐，山頂小食亭嘅燒賣😜。
食完嘢就行返落嚟山頂廣場，本來時間同體力都足夠可以行落山，但係食咗兩杯溶晒嘅 mousse 之後要控制一吓風險，拿拿臨座車返落山好啲。萬一爆發起上嚟搵地方排洪都方便啲吖嘛，今日就到此為止，行完收皮～
路線記錄
Total climbing: 908 m
Total time: 02:50:41
發表迴響