今日放假拎埋隻航拍諗住去鶴嘴影吓相拍吓嘢，諗住行埋落去海邊嘅機槍堡影相。估唔到原來就算係平日鶴嘴都一樣係有咁多人行，甚至連海邊嘅機槍堡都不斷有人落嚟。結果拍咗一陣就冇癮收檔走人，連鶴嘴都冇行入去。為咗要搵啲嘢做吓，放變計劃由座車轉為行山出市區。即興改變行程去行山一般都唔值得鼓勵，但視乎情況又未必一定會有風險嘅。例如本身已經去過要行嘅路段，有地圖喺身，目標路段係相對安全嘅山徑(龍脊喎?)，間中”即興”一吓都冇乜問題嘅。
路線：鶴嘴道>機槍堡>鶴嘴道>石澳道>港8(龍脊)>大潭峽>大風坳>鰂魚涌
全長：17.66km
時間：5小時43分
座狗鐵嚟到筲箕灣站，上嚟A2出口轉左就係小巴站。唔想座狗鐵就會用自己方法過嚟筲箕灣喇。
鏡頭一轉就嚟到鶴嘴道迴旋處，開始行入去。如果懶到出汁唔想行又有米可以考慮打的入嚟，的係士可以駛入鶴嘴道嘅。
沿鶴嚨道行一陣就可以離遠望到個機槍堡，不過要行落去都仲有一段距離架喎。
依？有條樓梯喎，機槍堡唔係由呢度落去嘅。唔好亂咁9衝。
繼續沿鶴咀道行嚟到呢個路口，再行前少少就係落去機槍堡嘅入口。
留意住右手邊有個小徑入口，落幾級樓梯之後沿路行就得。
小徑入口。
小徑初段唔算難行，臨近尾段比較崎嶇同有一少段急斜。沿途亦有分岔枝路，但大致上都會滙合埋一齊。諗住行嘅就要做好心理同身理準備，唔好諗住呢段係膠遊徑。
落落吓見到有間廢屋喎。
似乎以前呢度除咗有人住，仲可能係養埋家禽。
臨尾段路比較崎嶇，行慣山嘅應該唔難應付。
正~ 落到嚟了。時間尚早一個人都冇。
其實自己都唔係見過好多機槍堡，呢個暫時係我見過最特別嘅一個。
正面係咁嘅樣，企呢個位應該比人掃到變咗蜜蜂竇?
機槍堡入面都算係乾淨企理，旁邊個石陣係用嘅擒上屋頂嘅。
兩個機槍槍台。
由槍口望出去可以見有黃麻角衛星站，呢個可以算係小電視喎。
影完相之後即時起壇放飛機，可惜玩咗一陣就開始有人。結果等咗好耐先等到啲人走晒趁空檔影吓嘢。
放完飛機同自己打張咭就走人了。
轉頭頭行到返上嚟鶴咀道，原先計劃係影完機槍堡就入鶴咀再影，不過見到啲人沿沿不絕咁行入嚟都係算9數了。走人好過。仲有兩粒飽電又嘥料了。
行到返出嚟鶴嘴道迴旋處嘅小巴站，原本放晒隻飛機啲電會座車走，不過家陣飛機放唔到就要同自己放吓電，一於行吓山先啦。
要行路離開鶴嘴除咗落石澳之外仲可以經石澳道行返去港島徑嘅，家陣先要沿馬路邊行返出去石澳道。呢段路好少車會駛入嚟所以慢慢行都可以，唔危險嘅。
出到嚟石澳道就沿路都有行人路，轉左就可以一直行到去港島徑入口。
見到對面呢條級渠就諗起之前試過由龍脊直接剷落山，嚟到上面維修道經條渠落地。不過呢種行法唔係人人都接受到，安全又簡單嘅做法都係跟行人路過去會好啲。
好喇，出發行去港島徑。
由鶴嘴道行過嚟路程唔係好逺，大約5分鐘就可以行到過嚟。
嚟到港島徑第八段入口，開始今日第二節嘅行山行程。
呢段路之前行過一兩次，都係由小西灣落嚟。計落今次應該係第一次順走呢段路。
行龍脊嘅招牌景點就係呢個石澳view，又係真幾靚嘅。
記得早前好似話有人好做唔做整咗個怪雞鬼爪喺龍脊，比人負皮到要拆走。唔知係唔係呢個位置呢，無啦啦有個咁嘅空地。
又嚟到打咭位，冇乜特別，影張相做記錄就走人。
鏡頭一轉就行完條龍脊落到嚟路口，跟住就唔再跟港島徑，繼續直行落去石澳道巴士站。
落埋條樓梯就係石澳道，之後就再行出去大潭道。
又要行一小段冇行人路嘅馬路，呢段路有大巴士同其他車，唔好當自己大爺咁行。仲有呢度係香港，記住要左上右落。
今日冇上維修道經機槍堡過，想試吓由另一邊維條道上去。
喺巴士站旁邊就係維修道入口，位置上喺直路旁邊可以望到兩邊駛過嚟啲車，用嚟上同落都可以。另一邊條維修道因為喺轉灣位後面就只適合由對面馬路過去。
行上嚟之後再轉左繼續上。
上多一陣之後留意左邊會有一條好明顯嘅小徑入口，入去之後大致上係一條路跟住行就可以。
最後出到嚟再轉右。
再行前少少就會見到引水道。
嚟到引水道就再轉入去左邊嘅山徑。
山徑入口有指示牌，望一望就包冇錯。之後係一段微斜嘅林蔭山徑，唔太多人會行得幾舒服。
行咗大約X公里就上到嚟大風坳。
今日本來諗住放完飛機就座車走人，冇預備行山用嘅水量。家陣呢個情況最適合就係落山了(隻飛機好鬼重唔想行)。
沿柏架山道落山去鰂魚涌。
轉個頭就落到嚟出口了，跟往行出去鰂魚涌站座狗鐵走人。
到站～ 今日行完收皮～
路線記錄
Total climbing: 974 m
Total time: 05:42:53
發表迴響