除咗華山軍路嘅義勇軍軍徽之外，原來喺大石磨附近隱藏咗一個歷史更悠久嘅軍徽。可惜一直都唔知軍徽嘅確實位置唔識得點去，連上網搵資料都無從入手(因為連叫乜名都攪唔清楚) 。最近因為古洞發展工程呢件事又再次浮面，相關嘅資訊都多咗，又再挑起咗我條筋想去睇吓。試過由大石磨出發行去，發現地盤位置打斷咗原有落去嘅山徑，面績仲擴大到去軍徽所在嘅山坡。初探之後返屋企再睇地圖，見有其他可以上去山坡附近嘅路，今日就再嚟試吓。
路線：上水站>彩園路>石上河>雙魚河>河上鄉路>羅湖懲教所>墳區>軍徽(原路折返)>羅太>大石磨(原路折返)>雙魚河>石上河>上水站
距離：11.23km
時間：5小時02分
出發地點係上水站，由於路程唔太遠所以會直接由由火車站行入去。如果懶到出汁唔想行(咁不如唔好嚟行山), 係可以座51k小巴入去河上鄉先至起步嘅。
好喇，望吓地圖先。由 A2 出口出，之後就一直沿行人路直去。
沿彩園路旁邊嘅行人路一直去。
一直行到去寶石湖邨。
喺邨旁邊嘅行人隧道過馬路，之後繼續直去。
沿單車徑旁邊一直行，嚟到見呢條天橋就過去。
喺天橋可以離遠望到大石磨，同時見到山嶺嘅另一邊已經被挖到見到黃泥色。
落橋之後轉右，跟住沿單車徑旁邊一直行。
依？呢度好似攪梗新嘢喎，可能遲啲有新地方可以行吓。
一直行到嚟雙魚河就過穚，之後轉右。
行多陣嚟到呢個路口轉左。其實對單車友嚟講，呢邊啲路應該已經好熟。簡單講就係去羅太嗰度個路口。
轉灣之後當然唔係去食嘢啦，跟住係一直行，好快就會經過懲教所。
其實懲教所又冇乜特別嘢值得影嘅，既然過經過門口就影張相囉。BTW，呢個係女子監獄嚟嘅。
過咗懲教所之後一路沿河上鄉路行。
繼續沿行人路直去，留意呢個路口行入去可以去到小巴站。如果座小巴落車之後就會由呢條呢個路口行返出嚟。
呢頭講完嗰頭就有架小巴駛出嚟。
留意馬路右邊就係入口。
入口位置參考(Streetview)
其實呢，呢啲山徑入口係通去附近嘅山墳嘅，今日係借路經墳區上去。不過行山經過山墳其實都好常見，只要用平常心路過就冇問題。入到墳區之後向山上面行，路徑好明顯，離遠會見到座電塔，向電塔方向行過去就得了。
一路向住電塔方向行山去。
因為有山火燒過嚟，所以啲路好容易就睇到晒。
望到被工程削去咗嘅山坡。
已經見到個軍徽了，繼續向電塔行。
離遠望軍徽嘅山坡條小徑好似好窄好險，其實行近啲就會見到條幾正常嘅山路。
其實呢軍徽都算係香港歷史嘅一部分， 應該要保育吓先啱。
一場嚟到， 打個咭就緊架啦。打完咭影完相就可以走人了。
除咗睇到軍徽，山上面仲可以望到騎術學校。咁啱就見到下面有人騎梗馬。
之後落返嚟河上鄉路，轉左原路行返去羅太。
嚟到路口轉左。
好，入去飲個豆槳先。
本來諗住嚟羅太飲個豆漿座吓，點知多人到爆炸。咁算數了，影張相就走人。
嘢可以唔食，山就唔可以唔行。跟住係上去大石磨座吓吹吓風。
行上大石磨其實都幾鬼索氣嘅，之前推架單車上嚟都推到想死。所以啲車友話可以一腳上頂真係好L堅。
終於行到上嚟，跟住沿樓梯上去上面 hea 吓吹吓風。
大石磨呢度可以望到懲教所個屋頂，見到兩座圓轆轆嘅倉房。
鏡頭一轉已經由大石磨落返嚟河邊，經大水管呢邊走人了。由呢邊望過去可以睇到成個山脈，本來係可以由大石磨一直行過去軍徽嗰邊嘅。不過家陣山徑已經比個地盤打斷咗了。兩枝旗竿中間其實係屬於山下面個靶場範圍嚟嘅，如果下面啪啪啪嗰時就唔好行入去喇。
好，返到出嚟上水站。今日行程結束～
路線記錄
Total climbing: 460 m
Total time: 05:02:06
發表迴響