今日同朋友一齊試下行摩星嶺，兩個唔識路嘅傻佬由堅尼地城站出發，再沿域多利道上。喺路旁一個唔多起眼嘅樓梯口上山開始摩星之旅
時間：1小時21分
全長：2.54KM(大約)
路線記錄(起步時掛住影相唔記得開機，頭一小段冇咗)
Total climbing: 225 m
Total time: 01:21:10
入口位置雖然係喺馬路旁邊，但如果從未行過拎住份地圖嚟到都未必可以肯定眼前嘅地方就係上山入口。整個街景圖方便認一認路
望落條樓梯都算乾淨企理，但係就乜指示都冇。對照地圖附近已經搵唔到一個比佢更似嘅入口了，一於試下上去睇睇
之後條路越嚟越窄，緊緊夠一個人通過。如果係大隻佬應該要打側身先至過到，卡比獸就諗都唔洗諗了?
跟住係一段幾長嘅樓梯，係咁上係咁上。經過好多蜘蛛絲同荒廢村屋之後，大約二十分鐘(上升100M左右)就上到嚟摩星嶺徑
之後就轉左，繼續沿馬路行上去就得了
路口有一個生晒青苔嘅路牌，指示啱啱行完嗰條路可以落去域多利道。頂～咁點解下面入口又唔整番個指示牌呢下？
呢段路好似冇乜人行咁
有古蹟睇了，睇介紹資料話呢到以前係港島西射擊指揮總部嚟喎~
其實啲炮台個個都差唔多，就咁望都幾難分到邊個打邊個
離開炮台繼續上山，冇耐就見到路旁呢條叫區議會徑嘅樓梯。由呢到上去可以好快上到青年旅社，但隊友話唔想再上樓梯(查實我都唔想)，於是繼續沿住條迂迴嘅摩星嶺徑上山
終於到咗青年旅社，附近冇乜嘢睇
繼續向山頂進發，最後一段斜路了
上到嚟山頂第一樣見到嘅就係呢碌微波天線
再四維行下，原來呢到都有幾大面積嘅建築群。應該就係以前指揮部同營房了
本來想行入去慢慢睇下，不過實在太多蚊。都係等秋天之後再嚟
以為一路行一路有資料介紹啦，點鬼知佢咁冇誠意。由第一個炮台到呢到啲房，見嘅每一個牌所寫啲容都係一模一樣。
幾特別，一定要再嚟一次影下相
好快咁打咗一個圈然後就原路落山了。吖，唔算原路，因為落山貪快行咗區議會徑
發表迴響